Read Nocte Naga Hibru 4 Bible Online

Hibru 4 - Nocte Naga bible

Hibru 4

¹Joban ma jabtah boanjek tôngthin pa nãngma chohrãng athângheh Joban ma nãngnâng toamsem ehi. Erohwah, nãngkhumin jetlihma dange, atema boanjek kohrãng toamsem tahpa henmejô lechoh nekchen dangeken.

²Chenrãngma ngako, thinma chohtattah rãngrãng jôba nãngmemin Nginkongsen pa chohtat eki. Rohkomin thinma nginkongsen pa mechohtat akomin, erepa thinrãng sekhota dângwah, chenrãngma ngako, chenthu thinma erengin pa chohtatko, erepa thinma putedâlem nungma kepmah.

³Rohkomin nãngkhuwah henhenma ereko putedâlem ekia, erehehma Joban ma boanjek kohrãng toamsem tahpa choheki. Erepa atema chenroh jabtah a ererãngrãng jôba, “Ngama rinkhah lekma toamsêm wah: ‘Ngama thinnâng boanjek tôngrãng koh ekang hahko thin chenthumin leta hûmin!’ ” Atema moatlem pa rang ahah hôan thuma tamo chhoan medang akomin atema arepa jabwah.

⁴Chenrãngma ngako, Joban nyapraang nâng atema jâengit jârãngma jabwah: “Ate moatlem chentô hehwah Joban a Jâengit jâko boantong rewah.”

⁵Are mãnthethin nginpa thengak jabeka: “Ngama thinnâng boanjek tôngrãng koh ekang hahko thin chenthumin leta hûmin.”

⁶Henhenma Nginkongsen pa khebeng thôan chohtattah a ere mihnyan hehma boanjek pa chohmah, chenrãngma ngako, thinma putedâlem mah. Rohkomin, ere boanjek pa ahan hehnâng chohthuk eka.

⁷Arepa Joban ma rangwo han thien lahma khesok ehi, ere rangwopa “Thejâ.” Ajahthem rangpâ diko atema Devit nâng jabthuk lahma Joban nyapraang nâng raangeka: “Nangma thejâ Joban roat metat oko, nanghung pa nekchehsiet.”

⁸Joban ma toamsem tah boanjek pa Josua ma mihnyan hehnâng kohchhoan dângnomako, Joban ma adiko rangwo ahan rãngma lethe jabtumin wah.

⁹Erohwah, Joban jâengit jâko boanjek tongtah rãngrãng Joban mihnyan hehrãng boanjek tông rangwopa tonga.

¹⁰Chenrãngma ngako, Joban ma toamsem tah boanjek pa henhenma choh eka ereheh Joban ate moatlem kowah boantongtah rãngrãng thinmin thin moatlem wah eboantong wak a.

¹¹Erohwah, nãngkhumin ere boanjek pa chohtôngrãng latriie, erohkoba nãngte nãngwa hehma leputedâlem junko boanjek lechoh dangtah rãngrãng nãngkhu wathejô nekchen dangeki.

¹²Joban jabkhab pa ahîn ngale achaan, ronghû rongka anah dãng nomemin anah. Ere pumma chentôpa thahdoak eka, Jule moang niimin taphandoak eka, ngale rokchî rãchîmin taphandoak eka. Ngale erepumma mihnyan hung khenwah thonghun eka hehmin lienjet eka.

¹³Joban nâng lejetthuk thangma chenjô tahuhriemmih; atema chentô hôantah heh ate mitkheko phangtang loatloat tuta. Ngale nãngkhuma chenni motih a ereheh phangtang nãngkhu dedema atenâng metkep khesokmin.

¹⁴Erohwah, nãngkhuma thôeki putedâlem ko rongtêngtêng lolihma putedâlem e. Chenrãngma ngako, Joban tâko tongwãng lahma nãngkhurãng Soam aroakte adongthânpa tonga erepa Joban Chha Jisu.

¹⁵Nãngkhu Soam aroakte adongthôanpa nãngkhu bôan anâko lemînchente dangmah. Rohkomin, nãngkhu Soam aroakte adongthôanjô medang komin nãng rãngrãng rongrup ngema ate hungmin thattôanwah, rohkomin atema pap moho.

¹⁶Erohwah, nãnghung arin dongsiet lihma mînchenchaan chohthin Joban tôngthin tâko tonghûe. Enâng nãngma map echoh e, ngale nãngma lêmpoatko nãngnâng chohsokrãng ate mînchenchaan pa echoh e.