Read Nocte Naga Jems 1 Bible Online

Jems 1 - Nocte Naga bible

Jems 1

¹Joban ngale Teso Jisu Krista haa Jems ma raangeka: Hahtokkhoh wah Joban mihnyan chentô thenâng phôangphan chhoante hehnâng salem koheka.

²Ngalemruchha heh, chenthu nekhoh nâng chentô chêmchei heh mehûrako nea khuhah nâhah dangen,

³chenrãng-ma ngako, nemajet, nema chêmchei choh eken junko atadôre eken.

⁴Ngale rongrup nâng lethe thangma athôan kotuk rongtêngtêng mamtadô en, eroh koba nea chenni nângjô lechhih thangma rongrup nâng asen ngale apun tuta edangen.

⁵Phumma nekhuwah hen komin buthi mongthem aho medang enko, nema Joban nâng rangsoam en, eko Joban ma nenâng ekohhèn; chenrãngma ngako, Joban ma anga nganâng mînchen lahma chhahme ma koheka.

⁶Rohkomin chenthu nema rangsoam ko, nehung nâng amãnchhajô letûngmaang thangma putedâlem letma soam en. Henhenma hungnâng tungmaang lahma rangsoam eka ereheh rangsoam pa josiwah pôngma jowaak rângditwaak a rãngrãngba.

⁷Nemin eroh nema chenni moeken a erepa nehung nerin nâng leta phensiet metungmaang enko, nema Teso wah chenni thaeken a ereheh echoh e ngama nekthonghun en.

⁹Tangchhih Kristan mihnyan heh chenthu Joban ma metoansiet tahko khuhah nâhah edanga,

¹⁰ngale ererãngrãng Kristan mihnyan techhu hehmin chenthu Joban ma menumsiet akomin khuhah nâhahjô edanga. Chenrãngma ngako, techhu dângpa wunwah chongpô chhihjâ rãngrãng mahjâmin.

¹¹San pa nyahrãng chaanhong lahma bãngko ekhamsah a; phumma chongpô pa jârit erea, ngale ate phangsên pa chhihjâ erea. Ererãngrãngjô techhu hehmin thin ngun akem phoanglêmbii poatko eroh echhihjâwak a.

¹²Henpa chêmchei chohpoat komin putedâlem nâng asen danglahma tongeka ereheh a rangkepte mihnyan, chenrãngma ngako, chenthu thinma chêmchoh ekapa metadô tahko, Joban ma atenâng hun achette mihnyan hehnâng kohrãng toamsem tah roandôngpa thinma echoh a.

¹³Nãngnâng arerãngrãng chêmchei junma hung methattoan hiko, nãngma, “Are chêmchoh ekangpa Joban wah chohkang” ngama lengamin. Chenrãngma ngako, Joban ma achhih ngema chenthumin nãnghung toanmahhi, ngale atema achhih ngema hen hungmin mathattoan eka.

¹⁴Rohkomin chenthu nãnghung khenwah achhih hongeka pumma kêsietchhoan junko achhih pumma nãnghung toanehi.

¹⁵Erediko thinhung khenwah achhih huneka pumma pap hongchhaeka; ngale ere pappa nyahrãng mehongdong tahko, ere pumma arit pa hongchhaeka.

¹⁶Ngapho nganya heh, nekdiap chhahrii en!

¹⁷Chentô asenli ngale apunli hînhô heh rangkhethung wah kaera; erepa rangkhethung wah wenphiak Hôante Joban tâwah kaera, atea chenthumin litjâmah, ngale chenthumin rangnyek rãng litjâmah.

¹⁸Ate hung junma ngale ate toangtang jabkhab junma nãngkhu nâng roandông kohehi, erohwah atema chentô tem atiektah hehwah nãngma khebeng thôan thepa choheki.

¹⁹Ngama nyahrãng ahun lemruchha heh! arepa thonghun en, Atat pa anga ngama senthemthem tat en, rohkomin jab pa ane jab en, ngale rin lemlienma nekkhah en.

²⁰Mihnyan nyuchha rinkhah junko chenthumin Joban ma huneka rãngrãng toangtang tadangmih.

²¹Eroh-wah chentô jatchhih patkhah ngale chentô kaamchhih hehwah ajekre en. Ngale numnene dangletma nehung nâng Joban ma ate jabkhab khietkoh ehènpa kepen, ere jabkhab pumma nekho eta pesiet hèn.

²²Joban nginpa atatlolo nekjetat en; erenoma Joban jabkhab pumma chenroh ngaeka eroh mo en.

²³Nema ate jabkhab ko jetatlolo jetat letma, jabkhab pumma chenroh ngaehèn a eroh lemo medang enko, nea dâpha sokmin nâng sûlahma atedede thhenpheng kheritte mihnyan rãngrãng.

²⁴Thin a dâpha sokmin nâng thindede senthemthem kherii lahmemin khôamchhoan diko thin chenroh kheriitah a erepa lemlienma rânglekphea.

²⁵Rohkomin nema mihnyan papwah pesiette Joban Niemarang Asenko namnam sûletma, atatlolo ledang, ere Niemarang pumma chenroh ngaeka ererãngrãng memo enko - nema chenjô memo enkomin ere kohko Joban ma rang ekohhèn.

²⁶Nekhuwah henma komin rangsoam niem kepte ngama thonghun eken a? Rangsoam niem kepte ngama ngaletma nedede thelipa lekit lorii medang enko, ne rangsoam niem pa sek ho, ngale ne dedeba diapchhahrii eken.

²⁷Joban Wama Asâ ngale Alinlin Joban nâng soam atôte pa are hehnângba ngaeka: janthoichha hehnâng sok arête ngale janthoinyu heh chêmcheiko chohsokte, ngale are hahtokkhoh wah achhih hehnâng lechhihsietrii tôngte hehnângba ngaeka.