Read Nocte Naga Jems 2 Bible Online

Jems 2 - Nocte Naga bible

Jems 2

¹Ngalemruchha heh, Nãng Teso Jisu Krista mîndongthôan chohte nâng putedâlemte dangletma, nema chenthumin mihnâng rangkhoh thhenphãng sûletma achhih asen pa lengamin.

²Chenjô komin nekhu chhangko techhuwa pa kem dekkhep pa pheng ngale khetsen pa kep relahma ehûra, ngale tangchhihwa pa khetchhih keplahma min ehûra.

³Phum-ma nema khetsen keplahma hokteko ajah khoakhem letma atenâng, “Are tôngthin senko tongwãngro,” ngama rooletma, tangchhih wako, “Ire riangko chep o, ba Ngada thongko walemko tongo,” menga enko.

⁴Nema nedede tungko mihnyan nâng achhih asen ngama rênpên junko the eken, chenrãngma ngako erepa nema achhih ngema renpen eken.

⁵Ngalemruchha heh, tattan en! Joban ma are hahtokkhoh wah tangchhih heh putedâlem ngenâng techhu dângrãng reneka, ngale henhenma atenâng hun achhâeka ereheh nâng kohrãng toamsem tah thepa thinnâng kohrãng reneka.

⁶Rohkomin nema tangchhih hehnâng thãjõ eken! Phumma ne namnek lahma chêmsiette erediko ne sekhamrãng nginpatte heh tânâng nesiethokte heh hen a? Ereheh a techhu heh ledangne!

⁷Ere hehma jôba nenâng mînsenthôan koh ehèn mînpa chhihthôeka.

⁸Joban nyapraang wah choheki Joban Hahsông Niemarang pa mekep enko nema kaampunli moeken, ereko aroh raangeka, “Ne humtok humkhung wah mihnyan hehnâng nedede hunrii eken rãngrãng hun en.”

⁹Rohkomin nema mihnyan hehnâng thhenphãng sûletma mekhoakhem enko, nema pap lâmotet, ngale Niemarang pumma nea niemarang chhihsiette ngaehèn.

¹⁰Henma komin Niemarang kowah wanthe lekep medang ako atema phangtang chhihsiet eka.

¹¹Chenrãngma ngako, “Dihiak dela kaamchhih nekmo en,” ngama thôkohte pumma jôba, “Mih nekritphe en,” ngamemin thôkoh ehi. Erohwah nema dihiak dela tungnâng kaamchhih lemoken komin, nema mih meritphe enko, nea niemarang chhihsiette lâdangtet.

¹²Chentô jab ajâ ngale moat akat nâng nãng pesiette niemarang pumma jôba achhih engahi ngama thonghun letma mo en.

¹³Chenrãngma ngako, mihnâng lemînchente hehnâng Joban ma thinnâng achhih asen renjâko lemînchen min; rohkomin mînchen metong hiko achhih asen rênpa nãngma tajien e.

¹⁴Ngalemruchha heh, nema putedâlem eki ngaletma nemoatlem pa putedâlem junko ledang medang enko ereko chenni asen etonga? Ererãngrãng putedâlem pumma nekho tapesiet hèn a?

¹⁵Chenjô komin nãngpho anaa hehnâng thok apohrãng khet aho, erediko jokphhek chhah thinmin aho lâdangtah.

¹⁶Phumma nema thinnâng, “Joban ma rang ekohhèn! ngale lembubu tongen erediko senthemthem jokphhek chhah en!” ngama lolo ngaletma thin roandông kowah chenni lemeka ereheh lekoh medang enko - thinrãng chenni ehongsen a?

¹⁷Erohwah koh amien pemin putedâlem demko aroamma dângmin: Putedâlem lolo danglahma moatlem aho medang ako, ere pemin aritthã jôba.

¹⁸Phumma wanwanthe ma enga a, “Wathenâng putedâlem, ngale ahan wathe nâng moatlem tonga.” Phumma Ngama atenâng edanthang ang, “Nganâng khesok tanhang, moat akat aho thangma putedâlem pa hennâng tongeka. Ngama nenâng Nga putedâlem ngale Nga moatlem pa khesok a.”

¹⁹Nema Joban pa wathelolo ngama putedâlem ekenle? Sen a! eroh pete joak ajo memin putedâlem eka - ngale nyahrãng tiilahma cheieka.

²⁰Nea aba! Nenâng moatlem aho thangma putedâlem pa sekhota ngama khesok hun eken a?

²¹Nãngte nãngwa Abraham pa Joban demnâng chenroh toangtang jiendângwah a? Erepa moatlem junma dângwah, atema ate chha Isak pa Joban nâng joapsoap rãng ritpherãng ngatwah.

²²Nema erepa khemetne? Ate putedâlem le ate moatlem nii aroamma dângwah; moatlem junko ate putedâlem pa sênsietwah.

²³Ngale Joban nyapraangma aroh ngatah pa toangtang dângwah, “Abraham ma Joban nâng putedâlem wah, ngale ate putedâlem junko Joban ma atea toangtang ngatwah.” Ngale erohwah Joban ma Abraham nâng lemruchha ngatwah.

²⁴Erohwah nema sûtan en, ne putedâlem junma lolo dangmah, moatlem junma nea Joban demnâng toangtang dangeken.

²⁵Ate phoang sengchhahte dihiaknyu Rahab demnâng min mãnthejô dângwah. Atemin Joban demnâng ate moatlem junma toangtang dângwah, atema Isrial mihnyan hehma jejette mihnyan huhchienwên tah hehnâng chohsû lahma lemhan ngema pêchhoan thukwah.

²⁶Erohwah, phoangko Ju aho medang ako phoangpa aritre eka rãngrãng, moatlem aho thangma putedâlem lolo pemin riichoanthã jôba.