Read Nocte Naga Jems 4 Bible Online

Jems 4 - Nocte Naga bible

Jems 4

¹Nekhu chhangnâng ran angem ngale mên ahiet pa chenwah hongeka? Ereheh nekhu hung arin khennâng roantangma khuhah nâhah chohrãng loatmîn eka junko hongeka.

²Nema chenni hunken a erepa tachohmet, erohwah nema mihritphe eken; nema chenni komin nyahrãng hunken, ere pemin nema tachohmet, erohwah nea mên ahietmîn re eken. Nema chenni hun eken a erepa nema tachohmet, chenrãngma ngako, nema erepa Joban wah thamet.

³Ngale nema metha enkomin, erepa nema chohmet, chenrãngma ngako, ne mongthem achhih demnâng thaeken; ngale nema ere sêmmak thaeken pa nedede rinmerãng keprãng thaeken.

⁴Joban nâng lepute dâlemte mihnyan heh! Nema jetmetne, hahtokkhoh demnâng lemruchha dangkenpa Joban demnâng ran dangeki ngama? Nema hahtokkhoh demnâng lemruchha dâng mehun enko, nema nedede a Joban ranrãng hôanrii eken.

⁵Nekthonghun en Joban nyapraangma ngaeka pa toangtang dangmah ngama, Joban nyapraangma aroh ngaeka, “Joban ma nãng khennâng thienkoh ehi Ju pumma nãngnâng nyahrãng hun ehi.”

⁶Rohkomin Joban ma nãngnâng ate mînchenchaan koh ehipa ere nomemin achaan. Joban nyapraangma ngaeka, “Joban ma ngam apoate mihnyan hehnâng hunmah, rohkomin numnene dângte mihnyan hehnâng ate mînchenchaan koheka.”

⁷Erohwah, Joban khenko tongletma ate nginkepkep dangen. Juchhih pa junloat re en, ngale erohkoba juchhih pa newah etaangchhoan hèn.

⁸Joban tânâng hûren, ngale erohkoba netânâng Joban enamra. Papi mihnyan heh nedek pa sâsoan en! ngale ahuh khoanglep heh, nehung pa sâsietre en!

⁹Hungchhih rekmah demnâng sep ajôangre en; Ne angitre eken litpa asepre en, ngale khuhah nâhah dangeken litpa hungchhihma tongen!

¹⁰Teso mathahko numnene dangletma tongen, ngale erohkoba atema ne echoangpe hèn.

¹¹Ngalemruchha heh, wathema wathe nâng nekchhih thômîn en. Nema nelemru Kristan ahan heh chhihthô, ngale thinnâng athe melo enko, nema Joban Niemarang ko achhih ngale athe ngaeken. Ngale nema Joban Niemarang nâng athe menga enko, nea Joban Niemarang kepte dangmet, rohkomin ere Niemarang ko athe loatteba.

¹²Joban loloba Niemarang kohte ngale athe loatte. Ate lolo jôba tâpesiette, ngale tâchhihsiette. Mihhan nâng athe loatrãng, nang hen ngama thonghunrii eko?

¹³Ade dangeka, aroh jabte hehma Ngangin jetat tanha, “Thejâba nènep nãngma wanthe hahdaang nâng chhoan lihma, eretheko nãng rangpâ pâtherãng tongchhoan e, ngale kaam molihma ngunwah jahmõang bie.”

¹⁴Nema nènep ne roandôngpa chenroh dângmin a erepa tumin jetmet! Nea wenkhuh chuthe chharãng hong lahma mahjâte wenkhuh rãngrãngba.

¹⁵Nema arohba tajab en: “Teso hungsi medang ako, nãng ehin e, ngale are moatlem heh emoe.”

¹⁶Rohkomin athângheh nea ngam apoarit reken, ngale rângthôrit re eken; Are chentô rângthôrii eken heh phangtang athe.

¹⁷Erohwah, nãngma moatlemsen ngama jetlihma ere moatlempa lemo medang eko, erepa nãngrãngma pap.