Read Nocte Naga 1 Piter 1 Bible Online

1 Piter 1 - Nocte Naga bible

1 Piter 1

¹Jisu Krista moattat chhoante Piter ngewah- Joban ma arên mihnyan heh Pontas diak ngale Galatien, Kapadokia, Asia, ngale Bithinia, diak hehnâng phoangphan chhoan lahma hum ahah ahote heh rãngrãng phoangsông chhoante hehnâng raangeka.

²Nea Joban Wa mongthem junko ren ehèn ngale Jisu Krista ngin kepte dângrãng ngale ate hei pumma sâsietrãng Joban ma ate Juma mihnyan Asârãng hôan ehèn. Nekhu khohnâng Joban mînchenchaan ngale mêmo ajahthem chentonghèn.

³Nãng Wa Joban ngale nãng Teso Jisu Krista nâng dangkoh a ngae! Chenrãngma ngako, atema nãngkhu nâng nyahrãng mînchen junko atema Jisu Krista ritwah ngakhinsiet lahma nãngkhu nâng roandông nyan kohehi. Ere pumma nãngkhu hungnâng ahîn dâlem kohehi,

⁴ngale erohwah Joban ma ate mihnyan hehnâng kohrãng rangkhethung nâng thientah heh nãngma chohrãng thonghun eki, ereheh rangkhethung nâng asânmin lesãnjâmin, ngale chhihmin lechhihmin, erediko chenthujô lejien rãjâli thenâng thienkoh ehèn.

⁵Ereheh nekhurãng, nekhu putedâlem junko athôan sanpoatko khope chohrãng Joban chaanma pepâng lahma thien ehèn.

⁶Erohwah rinroan letma tongen. Phumma athângheh sanpoatko nema rongrup ngema ajahthem chêmchei chohjunko hungchhih rekmah medangen komin.

⁷Nema chêmchoh eken junkoba ne putedâlem pa linlin dangale dangmah a erepa jienjetmin. Achhihjâli kem pemin chhih ale asen a ngama jetrãng wennâng rângthatsõa; erohwah kem nomemin abâmbâm adong ne putedâlem pemin linlin dang ale dangmah a ngama metkep thatsokmin, erohko ne putedâlem pumma chenmam tadôa. Erediko chenthu Jisu Krista hongkat Rangwo ko nema rô, ngale mîndông choangpe echoh en.

⁸Nema ate lekhejô medang enkomin atenâng hun achhâ eken, ngale nema athângheh ate lekhejô medang enkomin atenâng putedâlem eken. Erohwah, nea thunma tâthôli ledang khuhah nâhah dangeken,

⁹chenrãngma ngako nema atenâng putedâlem thã nejunâng khope choh eken.

¹⁰Are khope junma mõng hehma senthemthem lâthat lemtetah, ngale Joban ma nenâng koh ehèn hînhô hehrãng memin thinma profisi chihôantah.

¹¹Thinma erepa chenre sanpoatko dângmin a ngale erepa chenroh hokmin a ngama thatlemte wah. Ere sanpoatko thin khenwah Krista Ju tongeka pumma thinnâng Krista ma chêmchoh lahma atema ere chêmpa tadô lahma erediko atema mîndông rângthô choh eka heh jetthuk lahma loatthô thukwah.

¹²Joban ma ere mõng hehnâng thin moatlem pa thindede wokphoatrãng dangmah ngama loatjetthuk eka, rohkomin thinma nekhurãng moatwah, ngale rangkhethung wah chienkat era Asâthôanju chaan junma Nginkongsen phoangthôte mihnyan hehwah nema athângheh chohtat eken ngin heh thinma nekhurãng jabeka. Are heh rangkhethung wah Joban ngintatte hehmemin jet huneka.

¹³Erohwah, nehung nerin ma moatrãng chepen. Ngale jetletma tongen, erediko Jisu Krista hôngkat jâko nema Joban mînchenchaan chohminko senthemthem dâlem letma tongen.

¹⁴Joban nginkepkep dangen, ngale nea aba dângpoatko ne hungma chenroh huntet a ereko ne roandông pa nekdang thuktu en.

¹⁵Erenoma, neroote Joban pa Sâpoangpoang dangeka rãngrãng, nememin chenjô memo enkomin Sâpoangpoang dangletma mo en.

¹⁶Joban nyapraangma ngaeka, “Asâthôan dangen, chenrãngma ngako, Nga a Asâthôan.”

¹⁷Chenthu nema Joban nâng rangsoam ko nema atenâng Wa ngama rooeken, atema chentô mihnyan nâng mãntheko thieneka, ngale anga nganâng henma chenroh moeka erejunko atema achhih ba asen pa ren eka; erohwah, are hahtokkhoh ko ne roandôngko Joban ranchei letma songtongen.

¹⁸Chen-rãngma ngako, nete newa hehma nenâng roandông ko chhih akhahli moatlam thienla kohthen kowah nekhu pesietrãng chennithã thumtah a erepa nema jet. Erepa ngun akem rãngrãng chhihjâ lima thumwah dangmah;

¹⁹erepa nyahrãng thãchaan Krista roandông hei kohwah, atea mâmãn, erediko nyek alekmin aho saakchha rãngrãng dângwah.

²⁰Atea Joban ma rang ahah hôan mama rênwah, ngale are athôan sanpoatko nekhurãng sênrãngma hongeka.

²¹Ate junma nekhuma ate ritwah ngakhinsiet lahma atenâng mîndongthôan kohte nâng putedâlem eken; ngale erohwah nema Joban nâng putedâlem ngale tok anâ re eken.

²²Ade phumma nema toangtang nginkepkep dangletma nedede lâsâ sietriitet ngale putedâlemte mihnyan ahan hehnângmin nyahrãng hung arin kohletma lâhuntet, nekhu hung arin phangtang khenwah wathema wathe nâng hun achhâmîn en.

²³Chenrãng-ma ngako, roantang roanjêng ahîn Joban Jabkhab junma ne chenthujô leriite nyong awa chha rãngrãng lâthe ngakchhathen, aritte nyong awa rãngrãng heh chha rãngrãng dangtumet.

²⁴Joban nyapraangma ngaeka rãngrãng, “Chentô mihnyan nyuchha heh hin rãngrãng, ngale chentô thin mîndong eka hehmin wunwah chongpô rãngrãng. Hin heh choakjâ reka, ngale chongpô hehmin jârit reka,

²⁵rohkomin Teso jabkhab pa roantang roanjêng lechhihmin.” Are jabkhab pa nenâng thôkohthen Nginkongsen pa.