Read Nocte Naga 1 Piter 3 Bible Online

1 Piter 3 - Nocte Naga bible

1 Piter 3

¹Ererãngrãng tangnyu hehmin ne tangwa nginngin ko dangen, erohkoba henma akomin Joban jabkhab ko leputedâlem medang ako, ne jatsen patsen pa khelahma eputedâlem a. Nema jabkhab mejô chêmngatthin dangmah.

²Chenrãngma ngako thinma nejat apat sen pa ekhea.

³Nema phangsen chendange ngama rangkhoh nâng lolo khopa junkhit, kempa lit, ngale khet akhu sensen pa kepletma neksôa en.

⁴Erenoma, nehung khennâng phangsen chendangen, ngale hung khennâng sôala wah rãngrãng numnene erediko kihrinrin dangeken peba chenthumin leta chhihjâ min, ngale ere peba Joban ngenâng nyahrãng alemli thôan.

⁵Chenrãngma ngako, ama thuwah dihiaknyu hehma thin tangwa nginngin ko danglahma thinma Joban nâng putedâlem lahma thindede phang sênsietrit wah.

⁶Sara eroh dângwah; Atema Abraham nginkepkep danglahma atenâng teso ngama roowah. Erohwah chenni ranjô lechei kaamsen moletmejû medang enko, nemin Sara chha jôba.

⁷Ererãngrãng tangwa hehmin ne tangnyu heh demnâng senthemthem dangletma hungthe rintheko songtongen, chenrãngma ngako thin a nehang achaantô dangmah. Thinnâng senthemthem khoakhem en, chenrãngma ngako thinmemin Joban ngewah roandôngpa hînhô rãngrãng nekhu demnâng aroamma choh eka. Nema eroh memo enkoba ne rangsoam ko chenni mejô tengbeng mah.

⁸Athôanko dangeka: Nekhu anga nga hungthe rinthe ngale mãnthe tuta thonghun en; wathema wathe nâng hun achhâmin en, mînchenmîn re en, ngale wathema wathe demnâng numnene dangen.

⁹Nerãngma kaamchhih moatkohte hehrãng nema kaamchhih nekngak mokoh en, ngale nenâng têm athoakte hehnâng nekngak tem athoak en; erenoma, Joban ma thinnâng chenchohsûa ngama rangsoam koh en, chenrãngma ngako, Joban ma nenâng rangkoh a ngama toamsem lahma nekhu roowah.

¹⁰Joban nyapraangma ngaeka, “Nema roandôngko khuhah nâhah dâng mehun enko ngale roandôngsen dônghun medang enko, nema jabchhih jabkhah jabpa ajekre en ngale mothô thôpa jek rêmin.

¹¹Nema kaamchhih moatpa ajekre en ngale kaamsen mo en; nehung nerin phangtang kohletma mêmo dângrãng latrii en.

¹²Chenrãngma ngako Teso ma toangtang hehnâng bemsûeka ngale ereheh rangsoam ko jetat eka; rohkomin kaamchhih moatte hehnâng atema chhihchoh re eka.”

¹³Nema kaamsen memo enko henma nenâng ewat hèn a?

¹⁴Rohkomin nema kaamsen moattha chêm mere enko, nema rang ekepen! hen ranjô nekchei en, ngale nekpatrii en.

¹⁵Rohkomin nehung nerin nâng Krista jôba Teso ngama thienletma atenâng toak asân en. Ngale ne hungkhen wah nema dâlem eken junma henma akomin nenâng methongpha hènko ereheh nâng danthângrãng sanpoat roakweih bemkep tongen,

¹⁶rohkomin ere thôngphâte hehnâng numnene ngale senthemthem danthangen. Ngale nehung nerin sâpoangpoang thien en, erohkoba nea Krista dijunte dângdi ne jatsen patsen pa thinma mechhihthô hènko, thinma chenni jab ajaeka erethã rêsê erewak a.

¹⁷Chenrãngma ngako Joban hung junko medang ako kaamchhih moatthã chêmchoh noma kaamsen moatthã chêmchoh pa asen.

¹⁸Chenrãngma ngako nepap rãngma Krista rekthe riitah pa chentô rãngma riieka, ngale nekhu Joban tânâng sietwên rãngma papi mihnyan hehrãngma mihnyansen pa riieka. Atea phoangpa loloba ritphewah, rohkomin Ju nâng ngakhîn rewah,

¹⁹ngale ate Ju ngakhîn retah pumma phâtek nâng khhekritte ju hehnâng Joban ngin thôhok kohwah.

²⁰Are Ju heh dangeka, Noa ma khôankho tâhôan pa Joban ma hungmôngmông danglahma bêmpoatko Joban nginlekep dangtah ju heh. Khôankho ko mihnyan amãnchha - chentô tungko waeset lolo dângwah - ereheh ba jodôngma lûmko leritphe bâwah,

²¹Erepa dangeka, athâng hehwah ne pesietrãng baptijem kep eken thiakpa dângwah. Ngale erepa phoangwah ngek atek heh sâsôan dangmah, rohkomin hungsen rinsen danglihma Joban demnâng toamsem eki. Erepa Jisu Krista ritwah ngakhîn junma nekhu pepâng ehèn,

²²Atea rangkhethung nâng wãngtah, ngale Joban dekchah ngeko tonglahma chentô rangkhethung wah Joban ngintatte heh pêneka, ngale rangkhethung wah thôte jabte, erediko chaan ahang demnâng tôngte heh pêneka.