Read Nocte Naga 1 Piter 5 Bible Online

1 Piter 5 - Nocte Naga bible

1 Piter 5

¹Ngadede min Asâthem heh khhepho phannang danglekma nekhuchhang wah Asâthem heh khhepho phannang hehnâng rosep eka. Ngama Krista ma chêmchoh tahpa khetek, ngale chenthu ate mîndong lahma nãngnâng khesok jâko Ngamin ereko ejohroam ang. Ngama nenâng rosep eka

²Joban ma nenâng sokare rãng kohthen ate mihnyan heh saaksokte rãngrãng dangletma hungkoh letma Joban ma hun ehèn rãngrãng khoakhem en, erepa hung lekoh thangma metkepkep nekmo en. Ne moatlempa ngun mechoh tihko lâdangtah ngama thonghun letma nekmo en, linlin hung arinma moat hun letma mo en.

³Nema sokare rãng kohthen mihnyan heh khoko pênletma nekngam poarii en, rohkomin ere mihnyan hehnâng nema asen khesok en.

⁴Ngale chenthu Saaksokte adongthôanpa mehong tahko, nema aphiakthôan khophok echoh en, ngale ere khophok kowah phiak ekapa chenthumin leta mahmin.

⁵Ererãngrãng leta lechhih hehmin ne khhepho phannang heh khenko thin nginkepkep dangen. Ngale wathema wathe nâng jienchohsok mînrãng nekhu anga nga numnene tuta dangen; chenrãngma ngako Joban nyapraangma ngaeka, “Joban ma ngam apoate mihnyan hehnâng hunmah, rohkomin numnene dangte mihnyan hehnângba senchoh eka.”

⁶Erohwah, Joban achaanthôan dekkhen ko nedede numnene dangletma tongen, erohkoba Joban ma sanpoatsen pa mehû theko ne echoangpe hèn.

⁷Ne sekmah patrit heh phangtang atenâng koh en, chenrãngma ngako, nerãngma ate sekmahkoh ehèn.

⁸Jetletma tongen, ngale sûletma tongen! Neran, juchhih pa sahdong hinhoo rãngrãng huklahma, hen akomin chohphhek angle ngama lemsû lahma phoangkhoam eka.

⁹Ne putedâlem nâng rongtêngtêng tongletma ate junlo en, chenrãngma ngako, nemajet hahtokkhoh wah putedâlemte ahan hehmemin arerãngrãng mãnthe chêmchoh eka.

¹⁰Rohkomin nema poatthe chharãng chêmchoh diko, chentô mînchenchaan kohte Joban, ngale Jisu Krista demko roamletma ate mîndongko johroam thukrãng neroote Joban pumma ate dedema nekhu sâsiet lahma rongtêngtêng edangthuk hèn, ngale chaankoh lahma putedâlem senthemthem edangthuk hèn.

¹¹Atenâng jôba roantang roangjêng rãng chaantong eka! Amen.

¹²Ngama nenâng are siti athoanchha raang ekapa Silas ma chohsû lahma raangkat eka, Ngama jet Silas pa Kristansen. Ngama nekhu hung dôngsiet huneka, ngale Ngama nenâng arepa Joban mînchenchaan linlin ngama thôkoh huneka. Ere mînchenchaan junko Joban nâng rongtêngtêng putedâlem letma tongen.

¹³Ne nya anaa dihiaknya Babilon wah Asâthem, ngale Joban ma rênwah hehma, nenâng thin salem matkat ehèn, ngale echha Mak memin salem matkat ehèn.

¹⁴Wathema wathe nâng Kristan hun achetmîn junko dek sitpekmîn letma rânjabmîn en. Krista demko dângte nekhu chentô nâng mêmo chentonghèn.