Read Nocte Naga 1 Jon 2 Bible Online

1 Jon 2 - Nocte Naga bible

1 Jon 2

¹Ngachhu Ngachha heh, Ngama nenâng are sitipa raangeka, erohkoba nema papkaam lemo edangen; phumma henma komin papkaam memo enko, nãngrãngma Wa Joban ngewah rosep lahma mapthâkohte wathe tonga, erepa Jisu Krista, atea toangtang thôan.

²Ngale Krista junma jôba nãngpap heh mapkoh ehi, ngale nãngkhu pap heh lolo mapkoh dangmah, chentô mihnyan heh pap mapkoh eka.

³Nãngma Joban ngin mekep eko, linlinjô nãngma ate lâjettih.

⁴Phumma nãngma ate jet e ngalihma, ate nginlekep medang eko, nãnga mothô ngale nãngnâng toangtang pa aho.

⁵Phumma nãngma ate ngin mekep eko, nãngma atenâng linlin huneki. Eroh koba nãnga Joban demnâng linlinjô aroamma dangeki ngama ejet e:

⁶ngale nãngma nãnga Joban demnâng aroam mejôba dangeki mengaeko, nãngmin Jisu Krista ma chenroh motah a ererãngrãng sôngtôngmin.

⁷Ngalemruchha heh, Ngama nenâng are ngin raangkoh ekapa hôkum nyan raangkoh dangmah; arepa hôkum apã pejôba, are hôkum pa nema rangbeng hahbeng thuma chohtet. Hôkum apã nginkongpa nema râchohtattet.

⁸Rohkomin, athâng hehwah Ngama nenâng raang ekapa hôkum nyan, chenrãngma ngako, ere hôkum kowah toangtang pa Krista nângmin kheki ngale nekhu dede nângmin kheka. Chenrãngma ngako rangnyek pa lienchhoantah, ngale wenphiak linlin pa lâhongphiaktah.

⁹Phumma nãngma nia wenphiak nâng tongeki ngalihma, nãngpho anaa hehnâng mechhihchoh eko, nãnga athâng hehmin rangnyek khennâng jôba tongeki.

¹⁰Nãngma nãngpho anaa hehnâng mehun eko, nãnga wenphiak nâng tongeki, ngale nãngnâng mihhan heh pap dângthukthin chenjô aho.

¹¹Phumma nãngma nãngpho anaa nâng mechhihchoh eko, nãnga rangnyek nâng tongeki; nãnga rangnyek nâng khoam eki ngale chennâng dangekia ere pemin jetmih, chenrãngma ngako rangnyek pumma nãngmit doaksiet ehi.

¹²Ngachhu Ngachha heh, Ngama nenâng raangeka, chenrãngma ngako, Krista junma nepap heh map lâchohtet.

¹³Wa heh Ngama nenâng raangeka, chenrãngma ngako henpa rangbeng hahbeng thuma dangtah a erepa nemajet. Roandông pho anya heh Ngama nenâng raangeka, chenrãngma ngako nema Achhih pa tajien eken.

¹⁴Ngachhu Ngachha heh, Ngama nenâng raangeka, chenrãngma ngako nema Wa Joban pa ajet. Wa heh Ngama nenâng raangeka, chenrãngma ngako rangbeng hahbeng thuma henpa dangtah a erepa nemajet. Roandông pho nya heh Ngama nenâng raangeka, chenrãngma ngako nea lochaan poat; ngale Joban Jabkhab pa nekhen nâng tongehèn, ngale nema Achhih pa tajien eken.

¹⁵Hahtokkhoh ko nekphetwân en, ngale hahtokkhoh kowah chhahkhem chenni nângjô nekphetwân en. Nema hahtokkhoh nâng mephetwân enko, nema Wa Joban nâng hunmet.

¹⁶Hahtokkhoh thiakpa dangeka are heh - papi mihnyan nyuchha hung arinma huneka heh, mihnyan hehma chenni pa khelahma huneka ereheh, ngale chenni junma are hahtokkhoh wah mihnyan heh ngam apoarii eka ere chhahkhem heh - are heh wanthemin Joban Wa ngewah dangmah; are chentôpa phangtang hahtokkhoh ngewah hongeka.

¹⁷Hahtokkhoh ngale hahtokkhoh wah mihnyan nyuchha ma huneka chentô chhahkhem heh amahjâ rêmin; rohkomin henhenma Joban junko moeka ere mihnyan heh roantang roangjêng rãng hînmin.

¹⁸Ngachhu Ngachha heh, athôan sanpoat pa lânam hûtha! Nenâng Krista Ran ehûra ngama thôkotah; ngale athângheh mejô Krista ran ajahthem lâhongtah, ngale erohwah nãngma athôan sanpoat pa lânamtha ngama jeteka.

¹⁹Are mihnyan heh linlin nãng demnâng johroamte dangmah, ngale erohwah thinma nãngkhu thinphethien ehi; thin a nãngkhu demnâng aroam dângnomako, nãng demnâng chenjoh tongthi. Rohkomin thin a nãng tâwah chhoantah, erejunko thin a wathemin nãng demnâng dangmah ngama senthemthem jeteka.

²⁰Rohkomin nekhu khohnâng Krista ma Asâthôanju kohkat ehèn, ngale erohwah nekhu anga ngama toangtang pa jet eken.

²¹Phumma Ngama nenâng raang ekepa nema toangtang pa jetmet ngama thonghun lekma raang dangmek; rohkomin, nema toangtang pa ajet, ngale nema toangtang pumma chenthujô mothô thômah ngamemin ajet.

²²Eroh medang ako mothôpa hen a? Jisu pa Misaia dangmah ngatte peba mothô. Arerãngrãng mihnyan heh Krista Ran - thinma Joban Wa ngale ate Chha wanii niinâng putedâlem mah.

²³Chenrãngma ngako henhenma Chhako leputedâlem dangeka erehehma Wa nângmin putedâlem mah; ngale henhenma Chha nâng putedâlem eka erehehma Wa nângmin putedâlem eka.

²⁴Erohwah, nema nehung nâng khebengwah chenni chohtattet a ere nginkongpa senthemthem thien en. Nema ere nginkongpa senthemthem methien enko, nea roantangma Wa Achhanii demnâng aroamma edangen.

²⁵Ngale erepa Krista ate dedema nãngnâng kohrãng toamsêm wah - erepa roantang roanjêng roandông kohrãng toamsêm wah.

²⁶Ngama nenâng are raang ekapa nenâng diapchhah lahma lemkenâng sênchhoanrãng phungte heh junma raangeka.

²⁷Phumma nenâng Krista ma ate Ju nekhoh nâng kohkat ehèn. Chenthu ate Jupa nekhoh nâng tongehèn a eretôko nema nenâng hethôte henjô lemtumet. Chenrãngma ngako ate Ju pumma nekhu nâng rongrup heh hethô ehèn, ngale atema chenni hethô ehèn a ereheh amõang dangmah, phangtang toangtang. Juma hethô ehèn rãngrãng dangen, erediko Krista demnâng aroam mejû dangletma tongen.

²⁸Ngachhu Ngachha heh, linlinjô ate demnâng aroamma dangletma tongen, erohkoba chenthu ate meka theko, nãnghung dongdong edange, ngale ate katjâ Rangwo ko atenâng rêsê lihma lehuhtong edange.

²⁹Nema Krista pa toangtang ngama ajet; ngale nema are pemin jet en, henma akomin kaamsen moeka atea Joban chha.