Read Nocte Naga 1 Jon 4 Bible Online

1 Jon 4 - Nocte Naga bible

1 Jon 4

¹Ngalemruchha heh, ninâng Ju tonghi ngatte chentô nâng nekputedâlem en, rohkomin thin ngewah Jupa Joban wah dangale dangmah a ngama thaksokre en. Chenrãngma ngako mõngmõang heh chentô thenâng jahmõang lâphan chhoantah.

²Are junko nema arepa Joban Ju dangale dangmah a erepa tajetlo en: henhenma Jisu Krista pa mihnyan nyuchha rãngrãng danglahma katwah ngaeka ere Jupa Joban ngewah choh eka.

³Rohkomin henhenma Jisu Krista eroh kaho ngaeka ereheh nâng Joban Ju aho. Ere mihnyan heh ngewah ju pa Jisu Krista Ran ngewah ju; nema eroh ehûra ngama tattet pa athângheh are hahtokkhoh ko lâhongtah.

⁴Ngachhu Ngachha heh, rohkomin nea Joban thiakrãng lâdangtet, ngale mõngmõang heh nema lâtajientet, chenrãngma ngako, ne ngewah Jupa are hahtokkhoh thiakrãng dângte heh ju noma bâmbâm Juchaan.

⁵Ere mõngmõang hehma are hahtokkhoh junma ba ngin thôeka, ngale hahtokkhoh ma thin ngin kepeka, chenrãngma ngako thin a are hahtokkhoh thiak.

⁶Rohkomin nãnga Joban thiakrãng lâdangtih. Ngale henhen Joban jeteka erehehma nãngngin ekephi; ngale henhen Joban thiakrãng ledangtea erehehma nãngngin kepmahhi. Erohwah are junko nãngma chenpa toangtang Jua, ngale chenpa jumõanga erepa tajetloe.

⁷Lemruchha heh, wathema wathe nâng hun achhâmin e, chenrãngma ngako, ahun pa Joban ngewah kaera. Henhenma mihnâng hun achhâeka ereheh a Joban chha ngale thinma Joban lâjettah.

⁸Henhen nâng hun achet ahoa erehehma Joban jetmah, chenrãngma ngako Joban pa ahun.

⁹Ngale Joban ma nãngnâng ate hun pa are hahtokkhoh ko ate Chha wathelolo pa chienkat lahma khesok ehi, erohwah ate junma nãngkhuma roandông choheki.

¹⁰Ahun pa arerãngrãng: nãngma Joban nâng hun dangmih, rohkomin Joban ma nãngnâng hunlahma nãngpap heh mapkohrãng ate Chha chienkat era.

¹¹Lemruchha heh, Joban ma nãngnâng aroh mehun hiko, nãngmemin wathema wathe nâng hun achetmîn min.

¹²Henmejô Joban mathatkhe eka, rohkomin nãngma wathema wathe nâng mehunmîn eko, Joban nãng demnâng aroamma tongehi, ngale atewah hun pemin nãngnâng senthemthem tongehi.

¹³Nãngma linlin jeteki nãnga Joban demnâng aroamma songtong eki, ngale Joban min nãng demnâng aroamma tongehi, chenrãngma ngako atema nãngnâng ate Ju kohehi.

¹⁴Ngale Joban Wama ate Chha are hahtokkhoh Pângte rãng chienkat erapa nima lâkhetih ngama mihhan nâng phoangthôkoh eki.

¹⁵Nãngma Jisu Krista pa Joban Chha ngama menga eko, nãnga Joban demnâng aroamma tongeki, ngale Joban min nãng demnâng aroamma tongehi.

¹⁶Ngale Joban ma nãngnâng hun ehi ngama nãng dedema ajet ngale putedâlem eki. Joban pa ahun, ngale henhen hun achetmîn nungma songtong eka ereheh Joban demnâng aroamma tongeka, ngale Joban min thin demnâng aroamma tongeka.

¹⁷Ahun pa nãngnâng senthemthem tôngdi nãnga Arenjâ Rangwo ko hungdongdong danglihma etonge; ngale hungdongdong edange, chenrãngma ngako, are hahtokkhoh ko nãng roandôngpa Krista rãngrãng dangeki.

¹⁸Ahun nâng acheithin aho; senthemthem hun achet ma chentô achei heh junloeka. Erohwah, chephoat hehnâng hun achet pa senthemthem aho, chenrãngma ngako nãng achei mere eko nãngma kaamchhih moatthã chêmchohmin ngama jetlihma cheieki.

¹⁹Joban ma nãngnâng benghundi nãngmin hun achhâmin eki.

²⁰Nãngma Joban nâng huneki ngalihma, nãngpho anaa hehnâng memitchek eko, nãnga mothô. Chenrãngma ngako, nãngma mitma khe mihnyan hehnâng lehun medang eko, mitma lekhe Joban nângjã chenthujô jienhunmih.

²¹Krista ma nãngnâng arepa chien ehi: Henhenma Joban nâng huneka erehehma mâmâ pho anaa nângmin hunmin.