Read Nocte Naga 3 Jon 1 Bible Online

3 Jon 1 - Nocte Naga bible

3 Jon 1

¹Asâthem khhepho phannang wah- Ngama linlin nyahrãng ahun Gaius nâng raangki.

²Ngama nyahrãng ahun lemruchha, Ngama rangsoam ekang nang demnâng chentô pejô asen tuta chendangho, ngale nangphoang nângmin asenjô chenmam dangho - ngale Ngama ajet nanga Ju ngenâng min asen jôba dangeko.

³Chenthu Kristan mihnyan heh khuthe hûlahma Nganâng nanga toangtangko nyahrãng senthemthem putedâlem lohma tongeko ngama thôhokkoh phumma Nga nyahrãng khuhah nâhah dangekang - ngale roantang komin nanga toangtangjû danglohma songtong eko.

⁴Ngachhu Ngachha heh toangtang danglahma songtong eka ngama chohtatko khuhahtô Nga chenni nângjô khuhahmek.

⁵Ngama nyahrãng ahun lemruchha, nangma lethatjette Kristan mihnyan ahan hehnângmin nyahrãng hungkoh lohma chohsûeko pa nyahrãng kaamsen moeko.

⁶Nangma thinnâng hun nginpa thinma anângwah Asâthem hehnâng thôkotah. Thin chhoan demkomin arohjô mamchohsûo, erepumma Joban hung esensiet a.

⁷Chenrãngma ngako thinma Krista moatlem moatrãng chhoan ekako Joban lejette henwahjô chenjô letha thangma chhoanwak eka.

⁸Erohwah, nãng Kristan mihnyan hehma are mihnyan hehnâng metkep chohsokmin, erohkoba thinma toangtang rãng moekako nãngmin ejohroam e.

⁹Ngama Asâthem hehnâng siti athoanchha raangtek; rohkomin thin lemsênte khhepho phannang dânghunte Diotrephes ma Nga nginko nâletha edanga.

¹⁰Erohwah, chenthu Nga meka thangko, atema chentô motah heh nenâng eloatthôkoh a: atema ni lelatnâng chentô acheili ngin phoangthôtah hehmin ethôkoh a, ngale atema mothô phoangthôtah ngin hehmin ethôkoh a! Ngale atema ereheh lolomoat dangmah; chenthu Kristan mihnyan heh mehûra komin atema tãngroomah, ngale hen Kristan mihnyan ma tãngroo huneka ere mihnyan hehnângmin atema jektangeka, ngale atema ere mihnyan heh Asâthem heh demwahmin junloatrãng huneka!

¹¹Ngama nyahrãng ahun lemruchha heh, achhih ngin nek he en, chenpa asen a erengin he en. Henhenma kaamsen moeka ereheh a Joban chha; ngale henhen kaamchhih moeka erehehma Joban khemah.

¹²Anga ngama Demetrius senthôeka; ngale toangtang pummemin ate senthôeka. Ngale nimemin atea asen ngaeki, ngale nemajet nima chenni thôekia erepa toangtang.

¹³Ngama nenâng ajahthem ngin thôkohthin tonga, rohkomin erepa Ngama kôlem le sehima raang lekma thôkoh hunmek.

¹⁴Nga nedemnâng sitsiak echohmin hûa, ngale eko nãngkhu dedema echoh jabmîn e.

¹⁵Mêmo pa nedemnâng chentonghèn Ne lemruchha chentôma salem matkat ehèn. Nãngkhu lemruchha hehnângmin thindede phoangphoang nâng salem thôkoh en.