Read Nocte Naga Jud 1 Bible Online

Jud 1 - Nocte Naga bible

Jud 1

¹Jisu Krista haa, ngale Jems pho Jud ngewah- Joban ma rooeka mihnyan, ngale Joban Wama hun achhâ lahma songtong eka mihnyan, erediko Jisu Krista ma pepâng lahma thieneka mihnyan hehnâng raangeka:

²Joban ngewah mînchenchaan, mêmo, ngale hun achet pa nekhu khohnâng mênchong chentonghèn.

³Ngama nyahrãng ahun lemruchha heh, nãngkhu anga ngama mãnthema choheki khope junma nekhu nâng raang huneka, ngama nekhu nâng raanghun pa Joban ma roantang roangjêng rãng ate mihnyan hehnâng kohtah putedâlem ko hungkoh letma latrii mo en ngama nekhu hungdông sietrãng raang huneka.

⁴Chenrãngma ngako nãngma lejet tungko nãngkhu mongnâng Joban lejette mihnyan huhluphû lahma tonga, ere mihnyan hehma Joban ngewah mînchenchaan pa thintungko dihiak dela kaamchhih moatrãng chhihsiet eka, ngale thinma nãngnâng Hethôte ngale Teso wathe lolo Jisu Krista nginmin dakwak eka. Chenthu thuma Joban nyapraangma are mihnyan chhih heh mahrit nginpa thôwah.

⁵Chenrãngma ngako, nekhuma areheh phangtang mejô mejet enkomin, Ngama nekhu nâng ngakthôkoh huneka, Teso ma rekthe Isrial mihnyan heh Igip khenwah pêsietwah, rohkomin adiko henhenma leputedâlem dangtah a ere mihnyan heh phangtang ritphe rewah.

⁶Thonghuntan en Joban ngintatte heh thinnâng chaan kohtah junko ledang, thin tôngthin phethien lahma chhoante heh: thin a roantang roangjêng rãng janruma khhek lahma rangnyek khennâng thien eka, erepa Joban ma ate Rangwo dong jâko thinnâng achhih ngalahma ritpherãng thien eka.

⁷Sodom le Gomora, ngale ere kêanâ wah hahdaang heh thonghuntan en, Joban ngintatte hehma chhihmotah rãngrãng enângwah mihnyan hehma dihiak dela tungko kaamchhih moeka ngale rongrup achhihli hehmin moeka: thin a roantang roanjêng lemutthin papwendô ko khamrii ekapa kaamchhih moatte chentôpa eroh khâmritmin ngama khesok ehi.

⁸Ererãngrãngjô, are mihnyan chhih hehma thindede phoangrãng pap dêngli moeka; thinma Joban hôkum min kepmah, ngale rangkhethung wah achoangthôan wah Joban ngintatte hehnângmin jõjêm eka.

⁹Arerãngrãng rangkhethung wah Joban ngintatte hehwah adongthôan Mikel metômin momah. Chenthu Mikel Juchhih heh demnâng Mosa phoang henma chohmin a ngama nyenmîn tahko, Mikel ma Juchhih nâng thãjô jabkhab ma ngaho, atema “Teso ma chenjet hèn!” ngama loloba ngatwah.

¹⁰Phumma are mihnyan hehma chenpa lejet dangeka ereko jõjêm wakeka; ngale thinma wunngem hehma nêm atek junko rângjet arãngrãng thinma chenni jeteka ereheh mejôba thinchhihsiet eka.

¹¹Thinrãng chentô chhih dângmin a! Thinma Kain damãnko juntoan eka. Chenrãngma ngako, ngun junma thin dedema Balam ma chenroh kaamchhih motah a ererãngrãng kaamchhih moeka. Ngale Kora dangtah rãngrãng thinmin Joban lelatnâng dangeka, ngale thinmin Kora rãngrãng chhihsiet eka.

¹²Thin a rêsê thhenkhoan hothangma nekhu aroamma hun achhâmin letma jokphhek chhah ekenpa ngeksiet ehèn. Thinma thindede rãnglolo ba thonghunrii lahma sekmah wakeka. Ngale thin a rangpat aho phoam pôngma rângmetphea rãngrãng. Ngale thin a penririi rangkuh komin penri lerite bãng rãngrãng, ngale bãngthongrin ma phuphe lahma choakjâ lahma ritte bãng rãngrãng.

¹³Ngale thin a josi wah cheili jowaak rângwaak arãngrãng, ngale thinma rêsêli moatlem chhih moeka pa thoakwoak rânghonga rãngrãng loathongeka. Ngale thin a phoangkhôamte merit rãngrãng, ngale thinrãng Joban ma rangnyek kenluthôan thepa thienkoh eka.

¹⁴Inok pa Adam chhuchha kowah roan engit ko dôngte pa dângwah, phumma atema ajahthem rangpâ mama thinjunma profisi hôanwah: “Teso ma ate ngintatte rangkhethung wah hahjat bijat sietlahma ekara

¹⁵ngale anga nga khohnâng achhih le asen a erepa eren kara, ngale kaamchhih moatte, ngale pap mihnyan hehma Joban lelatnâng chentô chhihjab tah a ereheh junko eritphea!”

¹⁶Are mihnyan heh roantang mejû joang alîn ngale mihhan heh phoang chhihthôte; ngale thinma thindede hung arinwah achhih heh junko moeka; ngale thinma thindede rângthôrii eka, erediko thinma chenni huneka erepa jienchohrãng thinma mihan hehnâng phoang johchhah eka.

¹⁷Ngalemruchha heh, rohkomin, amako nenâng nãng Teso Jisu Krista moattat chhoante hehma chenni thôkohthen a ereheh thonghuntan en.

¹⁸Thinma nenâng ngatwah, “Chenthu athôan sanpoat pa mehû theko, nenâng dûmmek jôjêmte mihnyan heh ehonga, ngale ere mihnyan hehma Joban lejet thangma thinhung sisiko edanga.”

¹⁹Are mihnyan hehma nemin ephoang phansiet hèn, ngale thin a thin hei angem hung arinma huneka junko edanga, ngale thinnâng Jumin aho edanga.

²⁰Rohkomin ngalemruchha heh nema ne putedâlem khohko ne roandôngpa rongtêngtêng hôan en. Ngale Asâthôanju chaan kepletma rangsoam en,

²¹ngale nãng Teso Jisu Krista ma ate mînchenchaan junko nãngnâng roantang roanjêng roandông kohrãng bemlaeki poatko, nededema Joban ngewah hun achet khenko dangletma tongen.

²²Henhenma lechhang putedâlem dangeka ereheh nâng mînchen re en;

²³ngale mihheh wenwah chaanma pêngletma pesiet en; ngale mînchen demko cheimin johkhesok en. Rohkomin thinpap ma ngeksiet wah khetngek hehnâng ba chinnya en.

²⁴Nekhu papnâng jâritwah tâpesiette, ngale ate tânâng sâpoangpoang tâsiet wênte, erediko ate aphiakthôan mathahko nekhu lethe thangma khuhah nâhah tâdângthukte Joban nâng-

²⁵ngale nãng Teso Jisu Krista junma wathelolo nãng Pângte Joban pejôba mîndong, erediko adongthôan, achaanthôan, ngale chaan ahang kepte, ama komin, athuheh min, ngale roantang roanjêngma dângmin! Amen.