Read Nocte Naga Loatkhesok 1 Bible Online

Loatkhesok 1 - Nocte Naga bible

Loatkhesok 1

¹Are titab ko Jisu Krista ma loatkhesok wah heh raangthien eka. Joban ma atenâng are loatkhesok ekapa atema ate haa hehnâng sitsiak chenni dângmin a ereheh khesokrãng loatkhesok wah. Krista ma areheh rangkhethung wah ate ngintatte wathe Jon tânâng chienkat lahma Jon nâng loatkhesok wah,

²ngale Jon ma chentô khetah heh phangtang thôkoh eka. Are heh Joban ma atenâng thôkohtah ngin heh ngale Jisu Krista ma atenâng toangtang loatkhesok tahheh thôeka.

³Are titab weihte hehma rangkepmin, ngale henhenma are profisi jabkhab pa tatlahma are titab kowah raangeka nginpa kepte hehma rangkepmin! Chenrãngma ngako areheh phangtang hôngdâng wângrãng sanpoat pa lânam hûtha.

⁴Asia diakwah Asâthem khuengit hehnâng Jon ngewah raangeka: Henpa athuhehmin Joban, khema komin Joban, ngale ahokmin sanpoat komin Joban, ngale ate Tôngthin mathah kowah waengit Jusen pumma mînchenchaan ngale mêmo chenkohhèn

⁵ngale Jisu Krista, putedâlemli thôan hâkhi hôante, ritwah khebeng thôan ngaksatte, ngale hahtokkhoh wah lowang heh khoko pênte. Atema nãngnâng hun ehi, ngale atema roandông kohlahma pap khenwah pepâng ehi

⁶ngale atema nãngkhu ate Wa Joban nâng soamtô rãng soam aroakte rãng hôanehi. Jisu Krista mîn pejôba roantang roangjêng rãng adong ngale chaanwin chendanga! Amen.

⁷Sûtan en, atea phoamkhoh nâng kaera! Anga ngama ate ekhe e, atenâng pahma suhtah hehmemin ekhea. Hahtokkhoh wah mihnyan nyuchha heh phangtang ate junma asep erewak a. Linlinjô eroh pa edanga!

⁸“Nga a khekhothôan pa ngale khedithôan,” ngama Teso Joban achaanthôan ma jabeka, Henpa athuhehmin, khema komin, ngale ahokmin sanpoat komin Joban.

⁹Nga a nepho Jon, ngale Jisu dijunte dângjunko ngale ate Hahsông rãng dângte hehnâng chêmchei hûeka heh nekhu demnâng aroamma hung arin môngsiet lekma tadôekang. Ngama Joban Jabkhab ngale Jisu ma loatkhesokthi toangtang nginpa phôangthôkoh junko jotungwah Patmos hahko thienwên wah.

¹⁰Teso Rangwo jâko Nga demnâng Ju dângwah, ngale Ngama chaanmõang raklahma tatwah, erepa poakpopo roatwah rãngrãng Nga tokdiko jablahma tatwah.

¹¹Ere pumma aroh ngatwah, “Nangma chenni khe eko erepa raangthien o, ngale titab pa hahdaang wanengit wah Asâthem khuengit hehnâng matchhoan o: Ifisus, Samma, Pergamum, Thitira, Sardis, Filadelfia, ngale Laodika.”

¹²Nga litphong lekma henma rânjab ehanga ngama ngiaksû tekpa, kemwah hôanwah wentit toakthin wanengit chohkhe wah,

¹³ngale ereheh mongko mihnyan nyuchha rãngrãng ate datok nâng lanleproh khetlo pohlahma dângwah, ngale ate thenkhuhko kemwah hôanlahma khetchhem pa chhem lahma dângwah.

¹⁴Ate khochoo pa khetrupo, ngale mienpo rãngrãng potutu dângwah, ngale ate mitpa wen rãngrãng phiak lahma dângwah;

¹⁵ngale ate dapa wennâng thhekchhoan janlin chhumhutwah rãngrãng dângwah, ngale ate roatpa longchhak wah jo jâjên katko rahwah rãngrãng dângwah.

¹⁶Ate dekchahko merit wanengit dângwah, ngale ate thunka wah ronghu rongka dãngnah loatkatwah. Ngale ate thhenphãng pa rangngih mongwah san chaanphiak rãngrãng dângwah.

¹⁷Chenthu Ngama ate kheko, Nga riichoan rãngrãng danglekma ate dathongko kôanjâwah. Phumma atema ate dekchah pumma Nganâng sahlo lahma ngatwah, “Nekchei! Nga a khekhothôan ngale khedithôan.

¹⁸Nga a ahînte pa! Nga a ritrewah, rohkomin Nga ade phumma roantang roangjêng rãng hinekang. Ngale Nganâng arit ngale hahtokkhoh wah arit amahthin heh khohnâng chaan tonghang.

¹⁹Erohwah nangma chenni kheko ereheh raangthien o, athâng hehwah nangma kheko hehmin raangthien o, ngale khedi wah dângwângthin hehmin raangthien o.

²⁰Nangma Nga dekchah kowah merit wanengit khekole kemwah hôanwah wentit toakthin wanengit khekopa areheh: Merit wanengit pa dangeka Asâthem khuengit hehrãng rangkhethung wah Joban ngintatte heh, ngale wentit toakthin wanengit pa dangeka Asâthem khuengit heh.