Read Nocte Naga Loatkhesok 10 Bible Online

Loatkhesok 10 - Nocte Naga bible

Loatkhesok 10

¹Eredikomin Ngama rangkhethung wah ahan ngintatte chaanmõang wanthe wienka lahma khewah. Atea phoamma doapbuk lahma dângwah ngale ate kho tumlitko chaangchoi dângwah; ate thhenphãng pa san rãngrãng dângwah, ngale ate da heh wentheli rãngrãng dângwah.

²Ate dekko nyapraangten arinchha semlahma dângwah. Ngale ate da dachahpa josikonek, ngale ate da dahitpa bamkonek lahma dângwah,

³ngale sahdong hinhoo hukwah rãngrãng chaanmõang rakroo lahma tatwah. Atema rakroo diko, rangmok wanengit pumma nyahrãng linlahma dânthâng wah.

⁴Thinma jab rienrien ko Ngama araangrãng chepwah. Rohkomin, Ngama rangkhethung wah jabkat lahma tatwah, “Rangmok wanengit pumma chenni jabtah a ereheh huhthien reo; ereheh nekraangthien!”

⁵Erediko Ngama ngintatte ate dapa joko kathe ngale bamko kathe neklahma chepte pumma ate dek dekchah ngepa rangkhethung nâng laangwênwah

⁶ngale atema roantang roangjêng rãng hînte, rang ahah hôante, josi hôante, ngale jokhenwah chentô hôante Joban mînko toamsêm lahma khewah. Ngintatte pumma ngatwah, “Ade phumma ajah lelek tongtumin!

⁷Phumma chenthu wanengit kowah ngintatte pumma ate poakpopo pa merahmet tahko, Joban ma ate hungnâng chenni themawa tahheh, atema ate haa mõng hehnâng thôkotah rãngrãng phangtang emoa.”

⁸Erediko Ngama rangkhethung wah Nganâng jabkat lahma tattek jabkhab pumma Nganâng aroh ngatwah, “Wãng lohma joko kathe ngale bamko kathe neklahma chepte ngintatte dekkowah jânchoan nyapraangten pa thawãngo.”

⁹Phumma Ngama wãnglekma ngintatte ngekowah nyapraangten arinchha pa thâwângwah. Phumma atema Nganâng ngatwah, “Thahang ngale nangma phhek o; arepa nangwok khennâng asi edanga, rohkomin nang thunko arepa nyahti rãngrãng etua.”

¹⁰Phumma Ngama nyapraangten arinchha pa ate dekkowah thalekma phhekwah, ngale erepa Nga thunko nyahtitu rãngrãng tuwah. Rohkomin Ngama jokkat diko erepa Nga wokkhen nâng asi rãng litdâng katwah.

¹¹Erediko Nganâng thôkoh wah, “Ademin rekthe nangma Joban jabkhab pa chentô diak akan, jat apat, jab ajâ, ngale Lowang hehnâng phoangthô chhoankohmin.”