Read Nocte Naga Loatkhesok 12 Bible Online

Loatkhesok 12 - Nocte Naga bible

Loatkhesok 12

¹Erediko rangnâng nyahrãng adong ngale nyahrãng patritli hôngwah. Dihiaknyu wathema ate khet akhurãng san pa kep rewah, ngale ate dakhen ko dâ pa namnek, erediko ate khoko merit echhi wannii pa phok relahma hôngwah.

²Dihiaknyu pa naa chhanemnem dângwah, ngale naachhat rãng wokchhâ eka junko ate seplahma dângwah.

³Eredikomin ahan patritli rangkho nâng wîenhông wah. Tewa wah Pûchhih cheksoaksoak wanthe atenâng kho phangengit ngale rong kaechhi ngale ate kho chentô nâng khaphok phok lahma hôngwah.

⁴Ate me pumma rangkho wah merit heh thiakremrãng jâsiet lahma hahtokkhoh nâng phekatwah. Ngale atea dihiaknyu pumma naa jâchhatkat rienrien lemlienma naapa loatphhekrãng ngama dihiaknyu mathahko chep eka.

⁵Erediko dihiaknyu pumma delachha chhatwah, ngale ere delachha pumma chentô diak akan heh janke semlahma epên a. Rohkomin naachha pa nyenchhoan lahma Joban ngale ate tôngthin nâng wênkohwah.

⁶Dihiaknyu pa Joban ma aterãng khoakhem kotah sehah nâng huhchhoan wãngeka, ngale eretheko dihiaknyu pa 1, 260 rangwo khoakhem lahma ethien a.

⁷Erediko rangkhethung nâng ranloatmîn wah. Mikel le ate ngintatte heh tewa wah Pûchhih demko loatmîn wah, ngale pûchhih pummemin ate ngintatte heh demnâng roamlahma ngakloatmîn wah;

⁸phumma pûchhih pa jienrit wah, ngale ate erediko ate ngintatte heh rangkhethung nâng letongthuk tûwah.

⁹Pûchhih dôngmõang pa petphekat rewah-rangbeng hahbeng wah pû, ate mînpa Juchhih ba joak ngama dângwah, atema hahtokkhoh phangtang diapphhek chhahwah. Ate demko ate ngintatte heh aroamma hahtokkhoh nâng petphekat wah.

¹⁰Erediko Ngama rangkhethung nâng chaanmõang rakjab lahma tatwah, “Athângheh Joban ngewah khope pa lâkatha! Athângheh Joban ma ate chaanpa Lowang danglahma khesok eka! Athângheh ate Misaia pumma ate chaanpa khesok eka! Chenrãngma ngako nãng Joban mathahko cheplahma rangwo rangnyek Joban nâng putedâlemte mihnyan hehnâng sekhamte pa rangkhethung wah petphetah.

¹¹Thinma pûchhih pa Saakchha hei ngale thinma phoangthôtah toangtang ngin; ngale thinma thin roandông kohlahma ritranmin lechei danglahma jienwah.

¹²Ngale erohwah rangkhethung erediko rangkhethung wah sôngtôngte chentô heh khuhah nâhah dangen! Rohkomin hahtokkhoh ngale josi hehrãngma chentô chhih dângmin a! Chenrãngma ngako juchhih pa jâkaera, ngale atea nyahrãng rinkhah punpun danglahma jâkaera, chenrãngma ngako, atema ajet ate mahrãng sanpoat pa ajah ahotu.”

¹³Chenthu pûchhih pumma nga rangkhethung wah lâpetphe thang ngama lepjet lahma, atema delachha chhatte dihiaknyu dijûn wah.

¹⁴Ate rãng khoakhem koheka sehahko pukwâng rãng dihiaknyu ko laadong rang kanii kohwah, ngale eretheko atea pârem khathe pûchhih kowah pesiet lahma sokare min.

¹⁵Ngale erediko pûchhih pumma ate thunkâ wah dihiaknyu diko dihiaknyu pa chenphophea ngama jo dôngmõang hôngphat wênwah.

¹⁶Rohkomin hah ma dihiaknyuko chohsok wah; hah pumma ate thunka lahma pûchhih thunwah phatphetah jodong pa rupjokwah.

¹⁷Ngale Pûchhih pa dihiaknyu demko nyahrãng rinkhah lahma ate chhuchha ahan Joban nginkepte mihnyan ngale Jisu ma loatkhesoktah hehnâng senthemthem putedâlemte mihnyan heh demnâng loatmîn chhoanwah.

¹⁸Ngale pûchhih pa jophako chep wah.