Read Nocte Naga Loatkhesok 14 Bible Online

Loatkhesok 14 - Nocte Naga bible

Loatkhesok 14

¹Erediko Ngama sutek pa, Zion hahhoko Saakchha cheplahma khewah; ate demko 144,000 mihnyan hehnâng atemîn ngale ate Wa mînpa thin khengko raang lahma khewah.

²Ngale Ngama rangkhethung wah jabkhab longchhak wah jo jâjen katko rahwah rãngrãng, ngale rangmok rãngrãng jablahma tatwah. Erepa pii anong jientêmte hehma têmwah rãngrãng harps rahtem lahma tatwah.

³Are 144,000 mihnyan heh Joban Tôngthin mathahko, ngale ahîn ngem wanbelii, erediko khhepho phannang heh mathahko chepwah; ngale thinma sênyan sêwakwah, ere sêpa thinma loloba tahe eka. Chentô mihnyan nyuchha wah thinlolo ba Joban ma pesietwah.

⁴Ere mihnyan heh thin dedema dihiaknyu heh demnâng kaamchhih lethatmo sâpoangpoang dângte heh dângwah; thin a dihiak dela ngenâng asâjû dângwah. Thinma Saakchha pa chennge nâng dangeka ere ngeko junchhoante dângwah. Thin a hahtokkhoh wah chentô mihnyan nyuchha jat hehwah khopesietwah, ngale thin jôba Joban ngale Saakchha nâng joapsoapte rãng khebeng thôan dângwah.

⁵Thinma chenthumin mothô khoanglep lethôwah; ngale thinnâng chenjô achhih aho.

⁶Erediko Ngama ahan ngintatte rangkho choangwah pongwut nâng, hahtokkhoh wah mihnyan hehnâng, chentô jat apat, jab ajâ, ngale diak akan hehnâng roantang roanjêng lethôan Nginkongsen phoangthô kohrãng phoangpu lahma khewah.

⁷Atema chaanmõang raklahma ngatwah, “Joban nâng toak asân en, ngale ate adongthôanpa rângthô en! Chenrãngma ngako atema chentô mihnyan nyuchha heh khope rên sanpoat pa lâhûtha. Rangkhethung le hahtokkhoh erediko josi le chentô jokhô jatkhô hôante nâng soamtô en!”

⁸Khebeng wah ngintatte ma jabdiko dithong wah ngintatte pumma wîenjabwah, “Dihiaknyu pa lâjâriitah! Adongthôan Babilon pa lârunjâtah! Dihiaknyu pumma chentô mihnyan hehnâng ate ngewah khem ma lâmok jokthuktah - ere khem ngaeka pa dihiaknyu ma ate demnâng kaamchhih mothuktah ko ngaeka!”

⁹Khema wah ngintatte wannii diwah wanrem kowah ngintatte pumma chaanmõang raklahma wîenngat wah, “Henhen ngemchhih ngale ate mõangnâng soam atôtea, erediko ngemchhih mînpa thin khengko ba thin dekko tungtea ereheh

¹⁰thindede ma Joban khem ejok a, ere khem ngaeka pa Joban rinkhah nâng ngaeka, ngale bâti nâng khem kienwah rãngrãng Joban ma ate rinkhah pa chaanhôan lahma chõngchõng kienlahma thinnâng ejokthuk a! Ngale ereheh phangtang Asâthôan ngintatte ngale Saakchha mathahko wen ngale salfar nâng ekhamriiwak a.

¹¹Thinnâng kham eka wen kowah wenkhuh pa roantang roanjêng ekhuh a. Henhenma ngemchhih ngale ate moangnâng soamtô eka erehehma rangwo rangnyek roantang chêm echoh a, ngale atemîn tûngte mihnyan hehmemin eroh chêm echohwak a.”

¹²Arepa Joban mihnyan ngale Joban hôkum kepte erediko Jisu nâng senthemthem putedâlemte mihnyan hehma tâdôrãng dangeka.

¹³Erediko Ngama rangkhethung wah jabkhab jabkat lahma tatwah, “Arepa raango: Henhen athâng hehma Teso moatlem molahma riieka ere mihnyan heh rangkepte dângmin!” “Arepa linlin!” ngama Juma dânthâng wah. “Thinma moatlem chaanmo lahma chêmtah kowah khuhah nâhah eboantong wak a, chenrãngma ngako, thinma moatlemsen motah heh thin demnâng rangkhethung nâng ejohwãnga.”

¹⁴Erediko Ngama sutek pa Ngama phoampo khewah, ngale phoam khohko mihnyan rãngrãng ate khoko kem khophok pa phok ngale ate dekko mitchha nahmõang semlahma tonglahma khewah.

¹⁵Erediko ngintatte ahan wathe rangsoamhum kowah loatka lahma phoam khohko tôngte ko chaanmõang rakkatwah, “Nang mitchha pa semlohma chhah munchoan heh khôankhen o, chenrãngma ngako, sanpoat pa lâhûtha; hahtokkhoh pa khôankhen rãng lâmuntah!”

¹⁶Erediko phoamkhoh wah tôngte pumma ate mitchha pa hahtokkhoh ko khenkatwah, ngale hahtokkhoh wah mun eka heh khôankhen wah.

¹⁷Eredikomin Ngama ahan ngintatte wathe rangkhethung wah rangsoamhum kowah loatka lahma khewah, ngale ate nângmin mitchha nahmõang dângwah.

¹⁸Erediko ahan ngintatte wathe, atea wen bemte pa Joban nâng joapsoap thin chaam kowah loatkatwah. Atema mitchha nahmõang sêmte ngintatte ko chaanmõang rakkatwah, “Nang mitchha pumma hahtokkhoh wah angurbãng kowah anguri heh khen o, chenrãngma ngako anguri heh lâchumtah!”

¹⁹Ephumma ngintatte pumma ate mitchha pa hahtokkhoh ko khenkat lahma angurbãng hehwah anguri heh khôankhen wah, ngale khemkoakthin koanko anguri heh rângdikat arãngrãng Joban nyahrãng rinkhah thunko phekat o ngama ngatwah.

²⁰Angurri heh hahdaang kowah panlien nâng khemkoakthin koanko khihlitwah, ngale khemkoakthin koan kowah hei hôngjênwah, ngale ere heipa jodongma lumwah rãngrãng chânii meejêng ngale phut bangâ alu danglahma jênwah.