Read Nocte Naga Loatkhesok 16 Bible Online

Loatkhesok 16 - Nocte Naga bible

Loatkhesok 16

¹Erediko Ngama rangsoamhum kowah ngintatte wanengit ko chaanmõang jabkat lahma tatwah: “Kaletma Joban rinkhah khôanthien eka tit phangengit pa hah hahtokkhoh ko dikat en!”

²Khebengthôan kowah ngintatte ma kalahma ate ngewah tit pa hahtokkhoh ko dîkatwah. Ephumma henhen ngenâng ngemchhih mînpa tungeka ngale henhenma ate mõang ko soamtô eka ereheh nâng nyahrãng cheili chhâwawa mâchhih hôngmâwah.

³Erediko khedi kowah ngintatte pumma ate ngewah tit pa josiko dîkatwah. Ephumma jopa mihnyan ritte hei rãngrãng dângwah, ngale josi kowah chentô ahînte heh ritwah.

⁴Erediko wanrem kowah ngintatte pumma ate ngewah tit pa chentô jokhô jatkhô hehnâng dîkatwah, ngale erehehmin heirãng litjâwah.

⁵Phumma Ngama jokhô jatkhô sok arête ngintatte pumma jablahma tatwah, “Nangma are moeko pa toangtang moeko, O Asâthôan, henpa athâng hehmin, ngale henpa khema komin Joban dângwah a erepa nang jôba!

⁶Thinma Joban mihnyan ngale Mõng heh hei hôngsietwah, erohwah nenâng ere mihnyan heh hei pa jokthuk eka. Thinma chenni motah a ere thãpa jôba chohwak eka!”

⁷Erediko Ngama Joban nâng joapsoap thin chaam kowah jabkhab hongjab lahma tatwah, “Teso Joban Adongthôan! Nang moatlem pa linlin toangtang ngale apun moeko!”

⁸Erediko wanbelii kowah ngintatte pumma ate ngewah tit pa sannâng dîkatwah, ephumma san pa nyahrãng cheili chaanhong lahma ere sanchaan pumma mihnyan heh ritsahwah.

⁹Thinnâng san pa nyahrãng chaanhong lahma nyahrãng chaansah phumma thinma are sanchaan hongeka pa tâjeksiette Joban nâng tem athoak rewah. Rohkomin thinma papwah hungngaklit lahma Joban dong ngale ate chaanpa rângthô wakmah.

¹⁰Erediko wanbangâ kowah ngintatte pumma ate ngewah rinkhah tit pa ngemchhih tôngthinko dîkatwah. Ephumma ngemchhih ma pên eka hahsông phangtang nâng rangnyek dângwah, ngale mihnyan hehma thinnâng chet junko thin theli ko kakrii rewah,

¹¹ngale thinma thinnâng nyahrãng chet ngale mâ achâ junko rangkhethung wah tôngte Joban nâng têm athoak wah. Rohkomin thin moatlem chhih hehwah hung ngaklit mah.

¹²Erediko wanerok kowah ngintatte pumma ate ngewah tit pa Iufaret jodongko dîkatwah. Ephumma sankat ngewah kaera Lowang rãng lemhôan kohrãng jopa rupjâ rewah.

¹³Erediko Ngama juchhih wanrem luk rãngrãng khewah. Ere wanrem pa pûchhih, ngemchhih, ngale mõngmõang heh thunka kowah loatkatwah.

¹⁴Ereheh a patritli moatlem moatte joak ajo heh ju. Are ju wanrem pa hahtokkhoh wah chentô Lowang heh tânâng chhoan lahma Joban Dongthôan Rangwo jâko aroamma danglahma loatmîn rãng khôansiet mînwah.

¹⁵“Tattan en! Nga a ahuhte hok rãngrãng ekarâng! Henhen lejuplek thangma met hinhin tonglahma ate khet akhu heh khoakhem lahma thieneka ereheh ba rangkepte dângmin, ngale thin a nok atang heh mathahko boangloangma lephoang khoammin ngale rêsê lechohmin!”

¹⁶Erediko ju hehma Lowang heh Hibru jabma Armagedon ngaeka theko khôansiet hokwah.

¹⁷Erediko wanengit kowah ngintatte pumma ate ngewah tit pa pongwut nâng dîkatwah. Ephumma rangkhethung wah rangsoamhum kowah tôngthin kowah aroh hongjab lahma tatwah, “Arepa lâta dangtah!”

¹⁸Ephumma rangmok rangphak, ngale rangdeng khiapda liap, ngale nyahrãng cheli hahtii dângwah. Arerãngrãng hahtii pa mihnyan nyuchha hôantah wahjô mathattii dângwah; chentô noma are hahtii pa achhihthôan pa dângwah!

¹⁹Hahdaang dongthôan pa kharemrâng khâjâwah, ngale chentô diak akan hehwah hahdaang heh chhihjâ rewah. Joban ma Babilon dongthôan ko ate rinkhah bâti kowah ate rinkhah khem jokthuk tahpa thonghun rewah - erepa Ate nyahrãng rinkhah khem.

²⁰Jotung wah hah chentô heh mahjâ rewah, ngale chentô hahkong hahla heh mahjâ rewah.

²¹Miendong pajâ rewah, mien wanthe pajô toak bangâ lih rangkho wah mihnyan heh khohnâng jâkatwah, ngale mihnyan hehma miendong jâkatdi Joban nâng tem athoak rewah, chenrãngma ngako ere mienjâ ekapa nyahrãng cheili dângwah.