Read Nocte Naga Loatkhesok 18 Bible Online

Loatkhesok 18 - Nocte Naga bible

Loatkhesok 18

¹Are dikomin Ngama ahan ngintatte wanthe rangkhethung wah kalahma khewah. Ate ngenâng chaan ahang dong dângwah, ngale atea nyahrãng phiak lahma hahtokkhoh phangtang phiakjaja phiaksiet wah.

²Atema chaanmõang rakwah: “Ate lâmah jâtah! Babilon dongthõanpa lâmah jâtah! Athângheh atea joak ajo ngale juchhih hehma sôngtông thin therãng hôaneka; ngale jatrup wongek ngale chinnyali wo heh atenâng songeka.

³Ngale chentô diak akan hehma ate ngewah khem kowah mokjok eka - ere khem pa ate dihiak dela tungwah kaamchhih moatpa. Hahtokkhoh wah Lowang hehma ate demnâng kaamchhih moeka, ngale hahtokkhoh wah phin athã lehte mihnyan hehmin ate demnâng dâng junko nyahrãng techhu dangeka.”

⁴Eredikomin Ngama ahan jabkhab rangkhethung wah jablahma tatwah, “Nga mihnyan heh loatkarên! Ate khenwah loatkarên! Nea ate ngewah pap demko nekjohroam en; Ngale atenâng hokmin chêmchei ko ne nekjohroam en!

⁵Chenrãngma ngako, ate pap heh rangnâng lanlep wãngroh lâchong motah, ngale atema kaamchhih moeka heh Joban ma thonghun eka.

⁶Atema nangnâng chenroh hôanjôantho ererãngrãng nangmemin atenâng hôanjôan o; atema chenni motah a erethã atenâng depnii rãng ajah ngakkoh o. Atema nangrãng khoakhem kohtho khem noma nangma aterãng dumnii khemchaan khoakhem koh.

⁷Atenâng ajahthem chêmchei ngale hungchhih ramjôang koh o chenrãngma ngako, atea nyahrãng chhu alu ngale chenni nângmin lesekmah dângwah. Chengrãngma ngako atema atedede nâng ngariieka: ‘Nga a ako Wangcha rãngrãng tongekang! Nga a janthoinyu dangmek, Ngama chenthumin hungchhih ramjôang lejetmin’

⁸Erohwah jâthelemma atenâng chêmchei ehûa- khoanchet, hungchhih ramjôang, ngale rêm achhong ehûa. Ngale atea wenma ejemkham a, chenrãngma ngako atenâng achhih ngama ngatte Teso Joban pa achaanthôan.”

⁹Ate demnâng kaamchhih moatte ngale atenâng phetwânte hahtokkhoh wah lowang hehma chenthu ate jemkham wendô kowah wenkhuh heh makhetah ko hahtokkhoh wah lowang heh sep erea.

¹⁰Thin a ate demnâng johchêm rancheima taangmõang nâng chepwak eka. Thinma ngaeka, “Chentô cheilia! Ngale chentô patritlia! Atôdông ngale chaan Babilon hahdaangdong pa! koanta theko nangma chêmsiet eko!”

¹¹Hahtokkhoh wah phin athã lehte mihnyan hehmin ate rãngma sepjoang eka, chenrãngma ngako thin ngewah chhahkhem heh henmemin ritumah;

¹²thin ngewah kem hehmin henmejô ritumah, erediko janlin hehmin, ngale long thãchaan jat hehmin ngale lit awen hehmin henmejô ritumah; thin ngewah khetpo khet hin, chaakri, ngale khetchek khetnyek hehmin henmejô ritumah; chentô thãchaanjat bãng, ngale poakpâ wah hôanwah chhahkhem hehmin, erediko thãchaan bãng heh, janlin heh, ngale chentô jit ajakli long hehmin henmejô ritumah;

¹³ngale thin ngewah Sinamon, Tientumli, wennâng tûmthhekli, mirh, ngale Frankinsen hehmin henmejô ritumah; Khem ngale tien, Ata, ngale chhah, Lee amân, saak heh, mok ngale mok garii, hu ahaa, ngale mihnyan nyuchha hehmin thin ngewah henmejô ritumah.

¹⁴Phin athã lehte hehma atenâng ngaeka, “Nangma chentô asenli chhahkhem kep chihuntoh heh thôanmah jâtah, ngale nangngun akem, ngale chentô jit ajakli hehmin ahotu, ngale ereheh nangma chenthumin tangak chohtumoh!”

¹⁵Ere hahdaang kowah phin athãleh kaam molahma techhu dângte mihnyan hehmin hahtaang nâng chepwah, chenrãngma ngako thinmin ate demnâng johchêm ranchei rewak eka. Thin sep ajoang erea,

¹⁶ngale thinma enga a, “Chentô cheilia! Ere hahdaangdong rãngma chentô cheili dângmin a! Atema khetsen khusen, khetchek khuchek ngale khet hin heh chîkepwah, erediko atema kem, thãchaan long, ngale lit awen heh keplahma chidângwah!

¹⁷Ngale koanta theko are chentô ate thiak aman heh phangtang ahotu!” Ngale chentô jogari wah sahhabdong heh, jogari kowah chhangte mihnyan heh, ngale jogari repte heh, ngale thin roandôngko jowah moatphhek chhahte mihnyan hehmin ataangnâng chepwah,

¹⁸ngale thinma ate jemkhâm wendô kowah wenkhuh heh khuhwâng khelahma asep re wah: “Are hahdaang rãngrãng hahdaang ahan mathat hong dângwah!”

¹⁹Thinma thin khoko bum heh phuhwên lahma sepwak lahma ngatwah, “Chentô cheilia! Are hahdaangdong rãngma chentô cheilia! Are hahdaangdong khohko chentô jogari cheite hehma thin jogari pa khoamthuk lahma thin a techhu dâng phumma thinmin ate ngewah bilahma techhu dângwak wah! Phumma atema koanta theko phangtang lâmah phetah!”

²⁰Rangkhethung wah heh ate mahjâ pa kheletma khuhah nâhah dangen! Joban mihnyan heh ngale moattat chhoante erediko mõngheh khuhah nâhah dangen! Chenrãngma ngako atema nenâng chêmsietdi Joban ma atenâng chêmsiettah!

²¹Erediko ngintatte chaanmõang wathema long dôngmõang toanpe lahma josiko phekatwah, atema ngatwah, “Arerãngrãng Babilon dongthôan hahdaang pa chaanma mahsietmin ngale chenthumin lethe chohkhe tumin.

²²Harp pupemet, mihnyan roat awa, Flut met ngale poakpopo rahmet heh nangnâng chenthumin lethe chohtat tumin! Phin athã lehte mihnyan kaam molahma nangnâng chenthumin lethe chohkhe tumin; ngale chhahthut koan rahlînmin nangnâng chenthumin lethe chohtat tumin!

²³Wentit phiakmin nangnâng chenthumin lethe chohkhe tumin; Nemnyan nyu awaa heh roat akahmin chenthujô lethe chohtat tumin. Nang demnâng phin athãleh kaammoatte mihnyan heh hahtokkhoh ko adongthôan dângwah, ngale nangma jâdu mõang moeko pumma hahtokkhoh wah mihnyan nyuchha heh phangtang mokwân eko!”

²⁴Mõng heh hei ngale Joban mihnyan heh hei pa Babilon nâng chohkhe phumma Babilon pa mahsiet eka; ngale hahtokkhoh wah ahan mihnyan ritphetah heh hei pemin Babilon nâng chohkhe eka.