Read Nocte Naga Loatkhesok 2 Bible Online

Loatkhesok 2 - Nocte Naga bible

Loatkhesok 2

¹“Ifisus wah Asâthem ngintatte hehnâng raangeka: “Are nginpa ate dekchah ngeko merit wanengit semte ngale kemwah hôanwah wentit toakthin wanengit heh mongko khôamte ngewah.

²Nema chenni motet a ereheh Ngama ajet; Nema chentô chaanmotet a ereheh Ngama ajet, ngale nehung arin chentô mônglo letma tongtet a erehehmin Ngama ajet. Ngama ajet nema mihnyan chhih heh hunmet, ngale Joban moattat chhoante ledangma nia Joban moattat chhoante ngalahma netânâng hokte hehmin nema thatsû letma thin a mothô khoanglep ngama jetlotet.

³Nea hung arin môngmông dangletma Ngarãng lâchêmtet, ngale nema ere chêmchei pa letadô thangma thînphemet.

⁴Rohkomin ererãngma Ngama nenâng senchohmah: Nema Nganâng khebeng thuko huntha rãngrãng athângheh eretô hunmahha.

⁵Thatthong hun tan en, nea chentô taangnâng mejârii chhoan en a! Nepap hehwah hungngaklit letma khemako chenroh motet a ererãngrãng mo en. Rohkomin nepap hehwah hung lengaklit thangma medang enko, Nga netânâng kalekma ne wentit toakthin heh erethe kowah ngaktôan chhoan ere ang.

⁶Rohkomin nema arepa senchohli moeken: Nema Nikolaitan hehma moeka hehnâng, Ngama chentô chhihchoh ekanga eretô chhihchoh eken.

⁷“Nenâng nâ metong hènko, Juma, Asâthem hehnâng chenni ngaeka ereheh jetat en! “Henhenma tajien eken a ereheh nâng Ngama Joban penri thong kowah roandông chohthin bãngko penri rieka kowah echhahthuk ang.”

⁸Samma wah Asâthem heh ngintatte hehnâng raang ekang: “Are nginpa henpa khekhothôan ngale khedithôan, erediko henpa riilahma ngakhîntea ere ngewah raangeka.”

⁹Ngama nekhu chêmpa ajet; Ngama ajet nekhua tangchhih - rohkomin linlinko nekhua techhu! Ngama ajet nia Jews mihnyan ngama ngatte mihnyan hehma ne lelatnâng nginchhih jabeka, rohkomin thin a Jews mihnyan dangmah; thin a Joak ajo demnâng aroam dângte mihnyan!

¹⁰Nema chenni chêmcheijô mechoh enkomin nekchei en. Tattan en! Juchhih ma nekhuwah wawathe pa phâtek nâng khhek lahma hung ethaktoan hèn, ngale phumma ne chêm pa jâechhi rãngba eta lekchêm en. Nea lânrii rohjô mechêm enkomin, Nganâng senthemthem putedâlemha, ngale erohkoba Ngama nenâng ajien thãpa roandông ekoh a.

¹¹“Erohwah, nenâng nâ metong hènko, Ju pumma Asâthem hehnâng chenni ngaeka erepa jetat en! “Henhenma tajien eka ereheh khohnâng jânthong arit pa lehumin.

¹²“Pergamum wah Asâthem ngintatte hehnâng raangeka: “Are nginpa ronghu rongka dãngnah sêmte ngewah raangeka.

¹³Ngama nekhu chenko songtong eken a ereheh ajet, phumma eretheko joak tôngthinmin tonga. Nekhua Nga demnâng toangtang dangeken, ngale Joak tongeka theko Nganâng senthemthem putedâlem lahma Ngangin phoangthôte Antipas ritphe komin nema Nganâng putedâlem pa jekmahtha.

¹⁴Rohkomin Ngama are roanche reknâng chhihchoh eka: Nekhu chhangnâng Balam ma hethôeka ngin kepte tongen, Balam ma Balak nâng Joban nâng joapsoap wah phhekchhah heh Isrial mihnyan hehnâng chhahthuk lahma chenroh papnâng dângthukmin a ereheh hethô wah, ngale dihiak dela tungko kaamchhih moatpa hethô wah. Phumma nekhu chhangnângmin erengin kepte etongen.

¹⁵Ererãngrãngjô, nekhu chhangnângmin Nikolaitan hehma hethôeka ngin keptemin etongen.

¹⁶Athângheh ne papwah hungngaklit en! Nehung lengaklit kenko, Nga netânâng sitsiak ekarâng, ngale Nga thunka wah hongkaera dengpa keplekma ere mihnyan heh demnâng eloatmîn karâng.

¹⁷“Erohwah, nenâng nâ metong hènko, Juma Asâthem hehnâng chenni ngaeka erepa jetat en! “Henhenma tajien eka ereheh nâng ahuhriam wah mana echhahthuk a. Ngale Ngama thin anga nganâng longpo ekoh ang, ere longpo ko henmejô lejetli mînnyan raanglahma tonga, ere mînpa henma choh eka erepumma loloba jetmin.

¹⁸“Thitira wah Asâthem heh ngintatte hehnâng raangeka: “Are nginpa Joban Chha ngewah raangeka, ate mitpa wendô rãngrãng, ngale ate dapa janlin chhumhut wah rãngrãng chhum phiakeka.

¹⁹Nema chenni moeken a ereheh Ngama ajet. Ngama newah hun pemin ajet, ne putedâlem pemin ajet, nekhuma khoakhêm, ngale nekhu hungmông rinmông dangeken hehmin ajet. Ngama ajet nekhuma khemawah motet nomemin athângheh ajah moeken.

²⁰Rohkomin arepa Ngama nekhu nâng senchohmah: Nekhuma dihiaknyu Jizibil ma ate dedema Joban nginmatte ngariieka ngin kep eken. Atema hethô lahma Ngahaa hehnâng dihiak dela tungko kaamchhih mothuk re eka ngale moangachaang nâng joapsoap wah phhekchhah heh chhahthuk re eka.

²¹Ngama atenâng ate pap wah hung ngaklitrãng sanpoat kohtek, rohkomin atema kaamchhih moatwah jekpa hunmah.

²²Ngale Ngama ate erediko ate demnâng dihiak dela kaamchhih moatte heh nyahrãng chêmchhih chohthin jupthinko ephekat ang. Thinma dihiaknyu demko kaamchhih moatpa lejek kako arepa Ngama athângheh emo ang.

²³Ngama ate dijunte hehmin eritphe ang, ngale eredikoba chentô Asâthem hehma Nga a anga nga hung arin khenwah thonghun eka heh lepjette ngama ejet hang. Ngama nekhu anga nganâng henma chenroh motet a erejunko thã engakkoh a.

²⁴“Rohkomin Thitira wah ahan hehma nenâng Jizibil ma are achhihli hethô ehèn heh kepmet; mihhan hehma ‘Joak hungkhen wah alinlin ngin’ ngama ngaeka pa nema jetmet. Ngama nenâng thôkoh eka, Ngama nekhu khohnâng lihân hênlih lêhènthuk tumah.

²⁵Rohkomin nga makaka erângko, nema chenni chohtattet a ereko rongtêngtêng loletma tongen.

²⁶Henhenma tajien eka, ngale Ngama hun ekang rãngrãng athôankotuk moeka, ere hehnâng Ngama Ewa ngewah chohtek rãngrãng mãnthe chaanpa ekoh ang: Ngama thinnâng chentô diak akan heh khohko pênrãng chaan ekoh ang, ngale jankangma hahtit soapwat lahma chhupjâwah rãngrãng soapwatrãng thinnâng epênthuk ang. Ngale Ngama thinnâng rangkhah meritmin ekoh ang.

²⁹“Nenâng nâ metong hènko, Juma, Asâthem hehnâng chenni ngaeka erepa jetat en!”