Read Nocte Naga Loatkhesok 22 Bible Online

Loatkhesok 22 - Nocte Naga bible

Loatkhesok 22

¹Ngintatte pumma Nganâng roandông jokhôpa sîsa khenwah rãngrãng khînriri Joban ngale Saakchha tôngthin kowah hongjenka lahma khesokwah

²ngale hahdaang mongtang kowah lempumma jênkatwah. Ngale ere jokhô akêruko roandông chohbãng dângwah, ngale ere bãngko rangpâ pâtheko echhi depnii ari riilahma dângwah, dâjeng theko ditthe riiwah; ngale ere bãngdek heh chentô diak akan wah mihnyan heh khoanchet heh mesietthin dângwah.

³Ere hahdaang khenko Joban ma tem athoak eka heh chenjô lechoh khemin. Joban ngale Saakchha tôngthin pa ere hahdaangko etonga, ngale ate haa hehma atenâng esoam etôa.

⁴Thinma ate thhenphãng pa echohkhe wak a, ngale ate mînpa thinkhengko eraanga.

⁵Ere hahdaangko rangnyekmin ahotu dângmin, ngale thinma wentit ba sanphiakmin lelemtumin, chenrãngma ngako, Teso Joban pa thin wenphiak edanga, ngale thinma lowang heh rãngrãng roantang roangjêng rãng epên a.

⁶Erediko ngintatte pumma Nganâng ngatwah, “Are jabkhab heh toangtang ngale dâlemli. Ngale Mõng hehnâng ate Ju kohte Teso Joban ma, ate ngintatte pa ate haa hehnâng sitsiak chenni dângwângmin a ereheh khesokrãng chienkatwah.”

⁷“Tattan en!” Jisu ma ngaeka, “Nga sitsiak lâkaerâng! Henhenma are titab kowah mõngheh ngin kepeka mihnyan heh rangkepte mihnyan dângmin!”

⁸Nga a Jon, Ngama areheh tattek ngale khetek. Ngale chenthu Ngama areheh râtat râkhe diko, Nganâng areheh khesokte ngintatte dathongko atenâng soam rãng khupjup wah.

⁹Rohkomin ngintatte pumma Nganâng ngatwah, “Aroh nekmo! Ngamin nang rãngrãng erediko nangpho anaa, ngale mõngheh, erediko are titab kowah jabkhab heh nginkepkep dângte heh rãngrãng haa jôba. Joban nângba soamtôo!”

¹⁰Ngale atema Nganâng ngatwah, “Are titab kowah mõngheh jabkhab pa nek huh thien, chenrãngma ngako, are chentôpa linlin dângwâng rãng sanpoat pa lânam hûtha.

¹¹Henhen pa achhih a erehehma kaamchhih moatjûjû emowak a, ngale henhen pa ngek atek a erehehmin ngek atekjû dângmin; ngale henhen pa asen a erehehma kaamsenjû moatmin, erediko henhen pa Asâthôan a erehehmin Asâthôanjû dângmin.”

¹²“Tattan en!” Jisu ma ngaeka. “Nga sitsiak lâkaerâng! atema chenni motah a erejunko kohrãng thã demnâng ekarâng.

¹³Nga a khekhothôan ngale khedithôan, abengthôan ngale athôanpa.”

¹⁴Henhenma thinkhet pa sâset eka erehehma rang ekep a, ngale thinma roandông chohthin bãngkowah penri eta chohchhah a, ngale pankâsek pumma hahdaangko eta nyupwãng wak a.

¹⁵Rohkomin hahdaang khenko ledangte heh kaamchhih moatte ngale jâdu hôante mihnyan heh, dihiak dela kaamchhih moatte, mihritphete, moangachaang nâng soam atôte, ngale jab ajâ erediko moatlem nâng mothô khoanglep dângte heh hahdaang kowah panlien nâng etonga.

¹⁶“Nga a Jisu, Ngama Nga ngintatte pa nang tânâng nangma Asâthem hehnâng erengin heh loatthôkoh rãng chienkat erâng. Nga a Devit humkâwah; Nga a rangkhahwah nyahrãng phiakte meritpa.”

¹⁷Ju ngale Nemnyan pumma ngaeka, “Karoo!” Henhenma arepa tateka ereheh memin “Karoo!” ngama chennga a. Huren, henhen jolân rittea; henhenma hun eken a erehehma roandông jopa hînhô rãngrãng kepen.

¹⁸Nga a Jon, henhenma are titab kowah mõngngin heh tat eken a ereheh nâng thôkoh eka: arekowah raangeka leko henma komin mele bâmraang ako, are titab kowah raangeka khoanchet chhih heh thinnâng kohlahma echêmthuk a.

¹⁹Ngale henma komin are titab kowah mõngngin kowah merephe ako, are titab kowah raangeka Asâthôan Hahdaang kowah thinma chohchhahthin roandông penri kowah lechohchhah thukma Joban ma erephewak a.

²⁰Anga nganâng are ngin thôkohte pumma ngaeka, “Linlin! Nga sitsiak lâkaerâng!” Amen. Karoo Teso Jisu!

²¹Teso Jisu mînchenchaan pa anga ngademnâng chendanghèn.