Read Nocte Naga Loatkhesok 3 Bible Online

Loatkhesok 3 - Nocte Naga bible

Loatkhesok 3

¹“Sardis wah Asâthem ngintatte hehnâng raangeka: “Arepa hennâng Joban Ju wanengit ngale merit wanengit tongeka ere ngewah raangeka. Nema chenni moeken a ereheh Ngama ajet; ngale nea riichoanjô medang enkomin mihnyan hehma nenâng ahîn ngaehèn!

²Erohwah sat en, ngale linlinjô phangtang mahrit mako nenâng chenni tonghèn a ereheh rõngsiet en. Chenrãngma ngako, nema chenni moeken a ereheh Joban rãng mapun moeken ngama khe eka.

³Erohwah, nenâng chenni hethôthen a, ngale chenni chohtattet a ereheh thonghun tan en; ngale erengin heh kepletma nepap wah hungngaklit en. Phumma ne lechhin kenko, Nga nekhoh nâng ahuhte hokwah rãngrãng ekarâng, ngale Nga chenpoatko katmin a ere sanpoat pa nema lejetmin.

⁴Rohkomin Sardis wah nekhu roanchechha hehma ne khet pa sâpoangpoang thien eken. Nea Nga demnâng khetpo kepletma ejoh khoamha, chenrãngma ngako, nea Nga demnâng eroh tâjoh khôamrãng kaamsen moeken.

⁵Hen-henma tajien eka ereheh aroh khetpo chohkep min, ngale Ngama thinmînpa ahîn titab kowah lere phemin. Ngale Ngama Ewa ngale rangkhethung wah ate ngintatte heh mathahko nea Nga dijunte ngama enga ang.

⁶“Erohwah, nenâng nâ metong hènko, Ju pumma Asâthem hehnâng chenni ngaeka erepa jetat en!

⁷“Filadelfia wah Asâthem heh ngintatte hehnâng raangeka: “Arepa henpa Asâthôan ngale tongtanga ere ngewah raangeka. Atenâng Devit sâbipa tonga, ngale chenthu atema kâsek melaangtah ko henmemin leta sektumin, ngale chenthu atema kâsek pa mesektah ko henmemin leta laangtumin.

⁸Nema chenni moeken a ereheh Ngama ajet; Ngama ajet nenâng chaan ajahho; rohkomin nema Nga nginkep eha ngale Nganâng senthemthem putedâlem eha. Ngama ne mathahko kâsek dôngmõang laangkoh eka, ere kâsekpa henmemin leta sekmin.

⁹Tattan en! Ere joak demnâng dângte mihnyan heh, thin a Jews ledang thangma nia Jews ngama ngatte mothô khoanglep heh, Ngama netânâng huthuk lekma ne dathongko ekunjup thuk ang. Ngama nenâng hun pa thin chentôma ejet a.

¹⁰Chenrãngma ngako nema Nga hôkum kepletma hungmôngmông dangletma tadô eken, ngale chentô mihnyan nyuchha heh thatsokrãng hahtokkhoh ko chêmchei hok sanpoat komin Ngama nekhu pesiet lahma ethien a.

¹¹Nga a sitsiak lâkaerâng. Nenâng chenni tonghèn a ereheh senthemthem thien en, erohkoba nema tâjienthã choh ekenpa henmemin ne ngewah leta nyenmin.

¹²Ere tâjiente heh Ngama Nga Joban rangsoamhum thõngrãng ehôan ang, ngale thinma erethepa chenthumin lephethien min. Ngama thin khohnâng Nga Joban mînpa eraang ang, ngale Nga Joban sôngthin hahdaang Jeroselem nyan mînpa eraang ang, erehahpa Nga Joban tâwah rangkhethung wah ekara. Ngale Ngama thin khohnâng Ngamîn nyan pemin eraang ang.

¹³“Erohwah, Nenâng nâ metong hènko, Juma Asâthem hehnâng chenni ngaeka erepa jetat en!

¹⁴“Laodika wah Asâthem heh ngintatte hehnâng raangeka: “Arepa Amen ngewah raangeka, toangtang thôan hâkhi, erediko atea Joban ma chentô hôantah heh thongpa

¹⁵Nema chenni moeken a ereheh Ngama ajet; Ngama ajet nea akihmin dangmet ngale akhammin dangmet. Ngama nea are wannii kowah chenpa komin wanthe danglet mele ngama huneka!

¹⁶Rohkomin nea lemtubu, akhammin dangmet, ngale akihmin dangmet, erohwah nea Ngama Ngathunkâ wah athoakphe erea!

¹⁷Nema ngaeken, ‘Nga a techhu ngale chennijô thoammek; ngama chenni hunekanga ereheh phangtang tonghang ngaeken.’ Rohkomin nea chentô tangchhih a ngale chentô mînchenlia erepa jetriimet! Nea tangchhih, bôangloang, ngale mitdoak.

¹⁸Erohwah, Ngama nenâng rîn eka, nea techhu dângrãng Ngawah kem, alinlin kem pa riha. Ngale ne bôangloang tongletma rêsê choh eken kowah jekrãng Ngawah khetpo ripohha. Ngale nemitko hutrãng Ngawah phem riha, eroh koba nemitma ejienkhe en.

¹⁹Ngama hun achhâ wakkang chentô nâng ritngatmin re ekang ngale phheksiet nâsietmin hôan ekang. Erohwah, hungkoh letma, nepap wah hungngaklit en.

²⁰Tattan en! Nga kâsekthong ko cheplekma kâsekko rahkong ekang; henma komin Ngaroat tatlahma kâsekpa melaang ako, Nga thinhum khennâng wãnglekma thin demnâng ejoh phhekchhah wãngang, ngale thinmin Nga demnâng ejoh phhekchhah hang.

²¹Chenroh Ngama phangtang tajien lekma Ewa tôngthin tâko ate kêko tongwãng ekang rãngrãng, henhenma phangtang tajien eka erehehmin Ngama Nga tôngthinko Nga tâko etongthuk ang.

²²“Erohwah, nenâng nâ metong hènko Juma Asâthem hehnâng chenni ngaeka erepa jetat en!”