Read Nocte Naga Loatkhesok 5 Bible Online

Loatkhesok 5 - Nocte Naga bible

Loatkhesok 5

¹Ngama tôngthin kowah tôngte dekchahko nyapraangten semlahma khewah; erepa ronghu rongka nâng raanglahma dângwah ngale erepa dumengit nâng pangmiem lahma dângwah.

²Ngale Ngama rangkhethung wah Joban ngintatte wathema nyahrãng chaanmõang rakthô lahma tatwah, “Henma are pangmiem ekapa janphe lahma are nyapraangten pa tâjân min a?”

³Rohkomin rangkhethung nângmin, ngale hahtokkhoh nângmin, erediko hahkhen nângmin are nyapraangten pa jânlahma akhen kowah tâsokte pa henjô aho.

⁴Ngama are nyapraangten pa jânlahma akhen kowah pa tâsokte henjô lekhe dâng phumma Nga nyahrãng sepwah.

⁵Erediko khhepho phannang kowah wathema Nganâng ngatwah, “Neksep, sûtan! Juda jatwah sahdong hinhoo pa, Devit Chha adongthôan pumma lâjientah, ngale atema dumengit pangmiem ekapa jânlahma nyapraangten pa etajân a.”

⁶Erediko Saakchha pa tongthin heh mongtangko cheplahma khewah, ngale ngem wanbelii erediko khhepho phannang heh ate tumlitko dangwah. Saakchha pa ritphe chhoan rãngrãng dângwah. Ate ngenâng rong kaengit ngale mit wanengit dângwah, ereheh a Joban Ju wanengit hahtokkhoh phangtang nâng phoang chienchhoan eka heh dangwah.

⁷Saakchha pa wãng lahma tôngthin kowah tôngte dekchah ngekowah nyapraangten pa thâwângwah.

⁸Atema thâwâng poatko, ahîn ngem wanbelii ngale roaknii wabelii khhepho phannang heh Saakchha mathahko khupjup wah. Thin chentô nâng pupe wanru ngale kemwah hôanwah tit wanru dângwah, ere kemwah hôanwah titko tum amêngli heh mênchong dângwah, ereheh dangeka Joban mihnyan heh rangsoam pa dângwah.

⁹Thinma sê nyan sêwakwah: “Nangma jôba nyapraangten pa tâtôanmin ngale nangma jôba ate pangmiem ekapa jânlohma talaango. Chenrãngma ngako nanga ritphe rewah, ngale nangma roandông kohlohma riilohma Joban rãngma chentô jat apat, jab ajâ, diak akan, ngale chentô mihnyan nyuchha heh riakkoh wah.

¹⁰Nangma thin a nang Joban nâng soamtô rãngma soam aroakte Hahsông rãng hôan eko, ngale thinma hahtokkhoh pa epên a.”

¹¹Eredikomin Ngama thesûtek pa, Ngama rangkhethung wah Joban ngintatte heh hahjat bijat roat akah tatwah! Thin a tôngthin ngale ahîn ngem wanbelii, erediko khhepho phannang heh tûmlitko chepwah,

¹²ngale sê nyahrãng raksê wakwah: “Aritphe retah Saakchha ma jôba chaan ahang, ngun akem, buthi mongthem, chaan amân, toak asân, mîndông, ngale rô choh eka!”

¹³Ngale Ngama rangkhethung wah chentô Joban ma tem atiak tahheh, hahtokkhoh wah heh, hahkhen wah heh, ngale josi khenwah heh - ngale chentô rangkhen wah ahînte hehma - sêsewak lahma tatwah: “Tôngthin kowah tôngte ngale Saakchha, nâng lolo jôba, rô, soamtô, mîndông ngale chaan ahangpa, roantang roanjêng rãng tongeka!”

¹⁴Ahin ngem wanbelii pumma “Amen!” ngama dânthâng wah, Ngale khhepho phannang heh ate mathahko khupjup lahma atenâng soamtô wah.