Read Nocte Naga Loatkhesok 6 Bible Online

Loatkhesok 6 - Nocte Naga bible

Loatkhesok 6

¹Erediko Ngama Saakchha ma dumengit pangmiemtah kowah khebeng thôan dum pa jânlahma khewah, ngale Ngama ahîn ngem wanbelii kowah wanthema rangmok rangphakwah rãngrãng chaanmõangma “Karoo!” ngama roolahma tatwah.

²Ngama ngiaksûtek pa Mokpo khewah. Mokkhoh ko chhangte pumma doakhap semlahma dângwah, ngale atenâng khophok kohwah. Atema jienchoante rãngrãng Mok khohko chhangchhoan lahma ajienrãng chhoanwah.

³Erediko Saakchha ma khediwah nyapraangten pangmiem ekapa jânwah; ngale khedi wah ahîn ngem pumma ngalahma tatwah, “Karoo!”

⁴Ahan Mok wanthe wîenloat katwah, erepa Mokchek dângwah. Ere Mokchek ko chhangte ko hahtokkhoh ko ran angem hôngsietrãng chaan kohwah, epa mihnyan heh thindede ritphemîn rãngkohwah. Atenâng deng dôngmõang kohwah.

⁵Erediko Saakchha ma dângrem wah nyapraangten pangmiem ekapa jânwah; ngale ere ahîn ngem pumma ngalahma tatwah, “Karoo!” phumma Ngama ngiaksûtek pa Moknyek loatka lahma khewah. Ere Moknyek khohwah chhangte pumma ate dekko toak semlahma khewah.

⁶Ngama ahîn ngem wanbelii heh tâwah hôngloat jabkatwah rãngrãng aroh jablahma tatwah, “Jâthe dekbi thãpa ata toakthe, ngale barle toakrem pemin jâthe dekbi thã. Rohkomin, Oliv bãng ngale angurthong pa nekchhihsiet en!”

⁷Erediko Saakchha ma wanbelii kowah nyapraangten pangmiem ekapa jânwah; ngale wanbelii kowah ahîn ngem pumma, “Karoo!” ngama ngat tatwah.

⁸Phumma Ngama ngiaksûtek pa Mok cheksem khewah. Ere Mokkhoh ko chhangte mînpa rit ngale rit amah ngama dângwah erepa ate tokdiko namnam junkhoam lahma dângwah. Thinnâng hahtokkhoh wah thiakbelii kowah thiakthe pa ran angem, rêm achhong, khoanchet, ngale wunwah ngem angah heh junma mahritthuk rãng chaan kohwah.

⁹Erediko Saakchha ma wanbangâ kowah nyapraangten pangmiem tahpa jânlahma khewah. Phumma Ngama Joban nâng joapsoap thin chaam khenko Joban jabkhab phoangthôdi, ngale thinma khetah toangtang pa phoangthôdi ritphetah mihnyan heh ju heh khewah.

¹⁰Thinma chaanmõang rakwah, “Adongthôan Teso, Asâthôan ngale toangtang thôan! Nangma hahtokkhoh wah ni ritphete mihnyan hehnâng achhih ngalohma thin chêmsietrãng chentô rangwo tongtua?”

¹¹Thin anga nganâng khetpolo kohwah, ngale thinnâng ademin roanche sanpoat bemrãng ngatwah, chenrãngma ngako thin ritphetah rãngrãng ademin Teso haa ngale putedâlemte heh malaang ritphe tonga, ngama thôkoh wah.

¹²Ngale Ngama Saakchha ma wanerok kowah nyapraangten pangmiem tahpa jânlahma khewah. Ereko hah pa nyaharang tiidong tiilahma dângwah, ngale san pemin khetnyek rãngrãng nyekjâ lahma dângwah, ngale dâ pemin hei rãngrãng phangtang chekjâ lahma dângwah.

¹³Ngale chenthu pôngdong pôngma bãngpa heklahma Fugri ahinthu heh rângjâhek a rãngrãng Merit hehmin hahtokkhoh ko jâriika rewah.

¹⁴Rang pemin nyapraang nuhjâ rãngrãng mahjâ eka, ngale chentô hahkong hahla ngale jotung jokep wah hah hehmin thinthe kowah mahjâ eka.

¹⁵Erediko hahtokkhoh wah lowang heh, ngale pênte heh, ngale sipâhi adong heh, techhu lowang, ngale hang achaan mihnyan heh, ngale ahan chentô mihnyan heh, haa, ngale haa ledangte hehmin, hahken ngale hahkong khowah longkapkhen hehnâng huhtong eka.

¹⁶Thinma hahkong hahla ngale longjan hehnâng ngatwah, “Ni khohko jâkahi, tôngthin kowah tôngte mitkhe kowah ngale Saakchha rinkhahthun kowah mumpetkat hi!

¹⁷Thin nyahrãng cheili rinkhah rangwopa lâhûtha, ngale ere demko hen tâtoatmîn min a?”