Read Nocte Naga Loatkhesok 8 Bible Online

Loatkhesok 8 - Nocte Naga bible

Loatkhesok 8

¹Chenthu Saakchha ma dumengit kowah pangmiem ekapa jân phumma rangkhethung nâng koantakha rãng kihchepchep dângwah.

²Erediko Ngama Joban mathahko cheplahma rangkhethung wah Joban ngintatte waengit khewah, ngale thinnâng poakpopo wanengit kohlahma khewah.

³Ngintatte ahan wathema, kemwah hôanwah wenkhuh tûmthhek thin semlahma, kalahma joapsoap thin chaam tâko chepkatwah. Atenâng chentô Joban mihnyan heh rangsoam demko Joban tôngthin mathah kowah kemwah hôan eka joapsoap thin chaamko johtûm thhekkohrãng tûmthhekli heh jahmõang kohwah.

⁴Joban mathah kowah chepte rangkhethung wah Joban ngintatte dekwah tûmthhekre eka wenkhuh heh Joban mihnyan heh rangsoam demko rangkho nâng johwâng wah.

⁵Erediko rangkhethung wah Joban ngintatte ma kemwah hôanwah wenkhuh tûmthhek thinko Joban nâng joapsoap thin chaam kowah wen toanlahma seklahma hahtokkhoh ko phekatwah. Ephumma hahtokkhoh ko rangmok rangphak, rangdãng khiapda liep, ngale hahtii dângwah.

⁶Erediko rangkhethung wah Joban ngintatte wanengit pa poakpopo wanengit semlahma rahmetrãng chepwah.

⁷Khebeng wah ngintatte pumma ate poakpopo pa rahmetwah. Phumma mien ngale wen hei demnâng saakmîn lahma rangkhethung wah hahtokkhoh ko jâkatwah. Phumma hahtokkhoh wah thiakrem rãngpa wenma khâmwah, ngale bãngachhong hehwahmin thiakrem rãngpa khâmwah, erediko wunchhong hehmin jemkhâm wah.

⁸Erediko khedi kowah ngintatte pumma ate poakpopo pa rahmetwah. Phumma josiko hahkongdong lele wenma nyahrãng kham lahma lumjâ katwah. Ngale ereko josiko wah thiakrem rãngpa heirãng litjâwah,

⁹phumma jokhenwah tôngte heh thiakrem rãngpa ritwah, ngale jogari hehmin thiakrem rãngpa chhihjâwah.

¹⁰Erediko wanrem kowah ngintatte pumma ate poakpopo pa rahmetwah. Phumma merit dôngmõang wennan rãngrãng dôlahma rangkhethung wah phekat lahma thiakremrãng jodongla ngale joanchha hehnâng chatjâwah.

¹¹(Ere merit mînpa “Akhahthôan” ngama dângwah.) Phumma jo hehwah thiakrem rãngpa khahjâ rewah, ngale ajahthem mihnyan heh ere jokowah joklahma ritwah, chenrãngma ngako ere jopa akhahrãng litjâwah.

¹²Wanbelii kowah ngintatte pumma ate poakpopo pa rahmetwah. Phumma san, dâ, ngale merit heh thiakrem rãngpa sahtungmîn wah, ephumma thin wenphiak kowah thiakrem rãngpa amahjâ rewah; ngale rangwo kowahmin ngale rangnyek kowahmin thiakrem rãngpa lephiaktu dângwah..

¹³Erediko Ngama sûtekpa laa rangkho choangnâng pongwutnâng pulahma chaanmõang jab lahma tatwah, “Cheili! cheili! ngale hahtokkhoh wah sôngte mihnyan hehrãngma chenthu ahan ngintatte warem pumma thin poakpopo pa merahmet tahko chentô cheili dângmin a!”