Read Nogai Лука 14 Bible Online

Лука 14 - Nogai bible

Лука 14

¹Шабат куьнлерининъ биринде Иса ас ишпеге парисей басшыларынынъ бирининъ уьйине келди. Парисейлер Онынъ Оьзин калай тутаягына карадылар.

²Исадынъ алдында сарысув маразыннан кыйналатаган аьдем олтыра эди.

³Иса парисейлерден эм Таурат аьлимлериннен: «Шабат куьн эмлемеге болаякпа экен?» — деп сорастырды.

⁴Олар уьндемедилер. Сонда Иса аьдемди оьзине шакырды да маразыннан сав этип йиберди.

⁵Оннан сонъ: «Сиз улынъыз, яде оьгизинъиз шабат куьн куйыга атылса, сол саьатлей оны шыгармаяксызба экен?» — деди.

⁶Олар явапка бир зат та айталмадылар.

⁷Иса, конаклар сыпырадынъ тоьр бетине шыгып олтырмага шалысатаганын эслеп, оларга сосы таварыхты айтты:

⁸«Сени бирев неке кыйылатаган тойга шакырган заманда, тоьрге шыгып олтырма. Сеннен сыйлырак бирев конаклар ишиннен шыкпага болаяк.

⁹Сонъында экевинъизди де шакырган конакбай, касынъызга келип: „Орнынъды бу аьдемге берсенъ экен“, — демеге болар. Ол заманда сен уялып, шеттеги орынга олтырмага керек боларсынъ.

¹⁰Шакырылсанъ, барып кыйырдагы орынга олтыр. Уьй иеси келип: „Досым, тоьрге шыгып олтырсанъ“, — дер. Сол заманда сени мен бирге олтырганлардынъ алдында сен оьрметленерсинъ.

¹¹Оьзин-оьзи коьтеруьвши аьр ким тоьменленеек, а оьзин-оьзи тоьменлетуьвши коьтерилеек».

¹²Сонъында Иса конакбайына да булай айтты: «Эгер сен уьйле яде кешки ас этсенъ, оьзинънинъ досларынъды, кардаш-кавымынъды яде колайлы конъысыларынъды шакырма. Олардынъ сага, сени бир заманда шакырып, эткенинъди кайтармага амаллары бар.

¹³Сога коьре ас эткенде ярлыларды, сакатларды, аксакларды, сокырларды шакыр.

¹⁴Сен сонда наьсипли боларсынъ, неге десенъ олар ийгиликти кайтаралмаяклар. Туврашыл аьдемлер тирилгенде савга аларсынъ».

¹⁵Муны эситип, Иса ман олтырганлардынъ биреви Ога: «Алладынъ Патшалыгындагы зияпетте оьтпек ашаяк аьдем наьсипли!» — деди.

¹⁶Иса ога: «Бир аьдем уллы зияпет этип, коьплерди шакырган эди.

¹⁷Астынъ заманы еткенде, ол оьзининъ кулын, шакырылганларга: „Не зат та аьзир, келинъиз“, — деп, айттырып, йибереди.

¹⁸Ама олардынъ баьриси де, бир тилден болгандай, кешируьвди тилеп баслаптылар. Бириси: „Мен соьле-аьле ер сатып алганман, соны барып коьрмеге керекпен, кешир мени, тилеймен“, — дейди.

¹⁹Баскасы: „Мен бес косак оьгиз сатып алдым эм оларды сынамага бараятырман, кешир мени, тилеймен“, — дегенди айтады.

²⁰Уьшиншиси: „Мен уьйленгенмен, сонынъ уьшин баралмайман“, — дейди.

²¹Кулы кайтып, бийине баьрин де еткереди. Сонда уьй иеси ашувланады да кулына: „Тез болып шыгып, шахардынъ орамлары эм сокпаклары ман бар да, мунда ярлыларды, сакатларды, аксакларды эм сокырларды алып кел“, — деп буйырады.

²²Кулы: „Бийим! Сенинъ буйырыкларынъ толтырылды, ама тагы да орын бар“, — дегенди айтады.

²³Бий кулына: „Йоллар эм кора бойлары ман барып, меним уьйим толгандай, тапканларынъды келмеге разы эт“, — деди.

²⁴Сол себептен, сизге айтаман, Мен алдыда шакырганлардынъ биреви де Меним асымнан авызына салмаяк[21]», — деди.

²⁵Иса ман бирге коьп халк бара эди, эм Ол оларга бурылып:

²⁶«Эгер Мага иерип, ама оьзининъ атасын, анасын, пишесин, балаларын, ага-инилерин, аьпте-карындасларын эм ога да косып яшавын Меннен бек баалырак коьрсе, ол Меним соктам болалмайды.

²⁷Ким оьзи оьлеек кашын алып ызымнан келмесе, сол Меним соктам болалмайды.

²⁸Неге десе, айтпага, сизден ким эсе де бирев кала салмага суьйсе, онынъ курылысын битирмеге не шаклы акша керек болаягын алды ман олтырып санамаспа?

²⁹Эгер ол туьбин калап, курылысын кутылмага аьли болмаса,

³⁰сонда оны коьргенлердинъ баьриси де: „Сол аьдем салып баслады, ама битиралмады“, — деп куьлееклер.

³¹Яде бир патша, баска патша ман согыска бара турып, мага йырма мынъ аскерши мен келеятырганга он мынъ аскершим мен карсы турмага карувым бар ма экен деп, алды ман олтырып, ойламаспа?

³²Эгер карувым йок деп санаса, душпаны энди де эректе турганлай, ярасувлыктынъ шартларын тилеп, элшилер йиберер.

³³Сизге де солай, аьр кайсынъыз оьзинъиздинъ буьтин болган затынъыздан бас кешпеген Меним соктам болалмайды.

³⁴Туз — яхшы зат, ама ол оьзининъ даьмин йойтса, оны не мен тузлы этпеге болаяк?

³⁵Ол ерге коклыкка да яраяк тувыл, оны таслап коядылар. Тынъламага кулагы болган эситсин!» — деди.