Read Nogai Лука 17 Bible Online

Лука 17 - Nogai bible

Лука 17

¹Иса Оьзининъ сокталарына булай айтты: «Аьдемлерди йолдан тайдыратаган затлар келмей калмаяк, ама бу затларды болдырганга кайгы!

²Бирев бу кишкейлердинъ бирин йолдан тайдырганнан эсе, мойнына туьйирмен тасы тагылып, денъизге тасланса, ога яхшырак болар эди.

³Сонынъ уьшин сак болынъыз! Эгер (иман) кардашынъыз куьнага туьсетаган болса, ога айыбын айтынъыз, а эгер тевбеге келип оькинсе, оны кеширинъиз.

⁴Эгер дейим ол куьнине ети кере сага карсы болып куьнага кирсе, ети кере: „Куьналыман — оькинемен“, — деп келсе, оны кешир».

⁵Элшилери Раббийден: «Бизим ынанувымызды коьбирек эттага!» — деп тиледилер.

⁶«Эгер сизинъ шуьшитки буьртиги кадер иманынъыз болса, сиз бу ынжыр терегине: „Муннан тамырынъ ман сувырылып алынып, оьзинъди денъизге олтырт“, — десенъиз, ол сизге бойсынар», — деди Раббий.

⁷«Айтпага, сизде сабаншы яде койшы кулынъыз бар. Ол кырдан кайткан заманда: „Тез болып кир, сыпыра янына олтыр“ — деп, айтарма экенсиз?

⁸Йок, сиз керисинше ога: „Мага кешки ас аьзирлеп куй да, белинъди бувып, мен ашап-ишкен вакытта мага аякшылык эт; оннан сонъ оьзинъ де ашап-ишерсинъ“, — деп айтарсыз.

⁹Сиз буйырыкларынъызды толтырган кулынъызга разылыгынъызды сонъында айтарма экенсиз?

¹⁰Сиз де солай, оьзинъизге буьтин буйырылганларды эткеннен сонъ: „Биз маьнесиз куллармыз, неге десе биз тек борышымызды толтырдык“, — деп айтарсыз».

¹¹Ерусалимге йолланганда Иса Галилея ман Самария арасындагы мажа бойы ман оьтип бараятыр эди.

¹²Бир авылда Оны он авыр тери маразлы йолыкты. Олар эректе токталдылар да

¹³коьтеринки тавыс пан: «Насихатшы Иса, бизди языксын!» — деп, кышкырдылар.

¹⁴Иса оларды коьргенде: «Барынъыз да дин куллыкшыларга коьрининъиз!» — деди. Олар бараятырып, йолда тазаландылар.

¹⁵Олардынъ бириси, оьзининъ савартылганын коьргенлей, кери кайтты эм куьшли давысы ман Аллады данъклап баслады.

¹⁶Ол Исадынъ аягына йыгылды, Ога сав бол деди. Бу аьдем — самарияшы эди.

¹⁷Сонда Иса: «Аьше, тазаланганлар онав тувылма эди? Тогызы ша кайдады?

¹⁸Тек бу тыс кыралшыдан баска Аллады данъкламага кайткан болмадыма экен?» — деп сорады.

¹⁹Ога да: «Тур да бар, сенинъ иманынъ сени сав этти», — дегенди айтты.

²⁰Бир йол парисейлер Исадан: «Алла Патшалыгы кашан келеек?» — деп сорадылар. Иса оларга явап берип: «Алла Патшалыгы сиз ойлаган заманда келмеек.

²¹Эш бирев де: „Ол булайда“, яде „Ол анда“, — деп айталмас, неге десе Алла Патшалыгы сизинъ аранъызда», — деди.

²²Сонъ Ол сокталарына айтты: «Аьдем Улынынъ куьнлерининъ тек бирин болса да коьргинъиз келеек вакыт етер, ама коьрмеексиз.

²³Аьдемлер сизге: „(Масих) мине мунда!“, яде „Мине онда“, — деп айтаяклар. Барманъыз, ызыннан иерменъиз!

²⁴Неге десе айындырыктынъ йылтыраганы коькти бир кыйырыннан экинши кыйырына дейим ярыклаткандай болып, Аьдем Улы да Оьзи келген куьнинде солай ок болаяк.

²⁵Ама алды ман Ол коьп азаплардан оьтпеге керек эм бу тукым Оны шет какпага тийисли болаяк.

²⁶Нухтынъ куьнлеринде калай болган болса, Аьдем Улы куьнлеринде де солай ок болаяк.

²⁷Нух кемеге минген куьнге дейим аьдемлер ашадылар, иштилер, хатын алып, киевге бардылар. Сонъ сав дуныяды сув алып, баьрисин де аьлек этти.

²⁸Солай ок Луттынъ куьнлеринде де болды. Аьдемлер ашадылар, иштилер, сатув-алув эттилер, урлык шаштылар эм уьй туьзеттилер.

²⁹Ама Лут, Содом шахарын калдырып шыккан куьн, коьктен ямгыр болып, от пан коькирт явды эм баьрисин аьлек этти.

³⁰Аьдем Улы келген куьнинде де тамам солай болаяк.

³¹Сол куьн ким уьйининъ тоьбесинде болса, уьйиндеги затларын алар уьшин тоьменге туьспесин эм далада болган да кери кайтпасын.

³²Луттынъ пишесине болган затты эсинъизге туьсиринъиз!

³³Ким оьзининъ яшавын куткарувга шалысса, сол оны йойтар; а ким яшавын йойтса, сол оны саклар.

³⁴Сизге айтаман: сол туьнде экев бир орындыкта болаяк: бириси алынаяк, экиншиси калдырылаяк.

³⁵Эки хатын бирге туьйирмен тартып тураяк; бири алынаяк, экиншиси калдырылаяк.

³⁶Эки аьдем далада болаяк: бири алынаяк, экиншиси калдырылаяк[25]».

³⁷«Раббий, бу кайда болаяк?» — деп сорадылар.