Read Nogai Лука 21 Bible Online

Лука 21 - Nogai bible

Лука 21

¹Иса, коьзлерин коьтерип, Алла уьйине садака йыйылатаган ерге савгаларын салувшы байларды коьрди.

²Солай ок онда каьрип тул хатыннынъ эки увак бакыр акшады[29] салганын да коьрди.

³«Сизге дурысын айтаман: бу ярлы тул хатын баьрисиннен де коьбирек салды.

⁴Неге десе баьриси де оьзлерининъ артыклыгыннан Аллага боьлек эттилер, а бу хатын, колайсыз болса да, яшав уьшин керек болган аьр затын салды», — деди.

⁵Кайбиревлер, Алла уьйи баалы таслар ман, савгалар ман ярасыкланган деп, соьйлегенде, Иса айтты:

⁶«Сиз мунда коьрген баьри затлардан тас уьстинде тас та калмаяк куьнлер келееклер; баьриси де шашылаяк».

⁷Оннан сорадылар: «Устаз, бу затлар кашан болаяк эм булардынъ болаяклары кайдай нышан ман белгиленеек?»

⁸Иса: «Сак болынъыз, адаспанъыз. Неге десе коьплер Меним атым ман: „Масих менмен“, яде „Ол вакыт энди ювык“, — деп келееклер. Ондайларга иерменъиз.

⁹Согыслар эм козгалыслар акында эситсенъиз, коркпанъыз, неге десе бу затлар алдыда болмага керек, тек заманнынъ ахыры сонда ок болмаяк».

¹⁰Тагы да оларга айтты: «Миллет — миллетке, патшалык — патшалыкка карсы коьтерилеек,

¹¹Туьрли ерлерде куьшли ер сенъкилдевлер, ашлыклар эм оьлетлер, коьктен коркынышлы коьринуьвлер эм уллы нышанлар болаяклар.

¹²Бу затлардынъ баьрисиннен алдын Меним атым уьшин сизди ыслаяклар, артынъыздан калмай кыйнаяклар, синагоглар ман тутнакларга тапшырып, патшалар ман тоьрелердинъ алдына аькетееклер.

¹³Ол шаатлык этер заманынъыз болаяк.

¹⁴Соны ман коьнъилинъизге салып койынъыз: оьзимизди кайтип коршалармыз деп эртерек ойланманъыз.

¹⁵Неге десе Мен сизге соьз усталыгын да, акыллылыгын да берермен, сизинъ душпанларынъыздынъ бири де ога не карсы туралмас, не де карсы соьз айтаялмас.

¹⁶Сизди ата-аналарынъыз да, ага-инлеринъиз де, кардашларынъыз-досларынъыз да сатарлар, эм кайбиревлеринъизди оьлтирерлер.

¹⁷Меним атым уьшин сизди баьриси де коьрип болмаяклар.

¹⁸Тек сизинъ басынъыздан бир шаш туьги де туьспеек.

¹⁹Шыдамлыгынъыз бан янынъызды куткарарсыз.

²⁰Ерусалимди аскерлер курсап алганын коьргенинъизде, онынъ шашылув заманы еткенин билинъиз.

²¹Ол шакта Юдеядагылар тавларга кашсынлар, шахардагылар оннан шыксынлар, тоьгерегинде болганлар онда кирмесинлер.

²²Неге десе булар Алла халкын язалаяк, язылганлардынъ баьриси де толтырылаяк куьнлер болаяк.

²³Сол куьнлерде бала эмгисткен аналарга эм авыраяклы хатынларга бек кыйын болаяк. Бу кырал уьйкен кыйынлык шегеек эм Алладынъ ашувы бу халкка туьсеек.

²⁴Кылыштынъ оьткирлигиннен йыгылаяклар эм есирге аькетилип буьтин миллетлерге таралтылаяклар. Ерусалим баска миллетлер мен тапталаяк эм сондай болып, олардынъ заманы озганша, тураяк.

²⁵Куьнде, айда, юлдызларда коркынышлы нышанлар болаяк, а ер уьстиндеги халклар кыйналып, толкынласып гуьрилдеген денъизден корккандай болаяклар.

²⁶Дуныяга келеек аьлеклерди саклавдан эм коркувдан аьдемлердинъ янлары шыгаяк, неге десе коьктинъ затлары[30] силкинеек.

²⁷Сонда булыт ишинде уллы куьдирети, данъкы ман келеятырган Аьдем Улын коьрееклер.

²⁸Сол затлар болып басланган заманда, турынъыз да, басларынъызды коьтеринъиз, неге десе куткарылувынъыз ювыклап келеятыр».

²⁹Эм Иса оларга сосындай таварыхты айтты: «Ынжырга эм баьри тереклерге каранъыз.

³⁰Олар япырак ярып баслаганда, сиз оны коьрип, энди яз ювыклаганын билесиз.

³¹Соьйтип, сиз де сол затлардынъ болатаганын коьргенде, Алла Патшалыгы ювыкта экенин билинъиз.

³²Сизге дурысын айтаман: бу несил йогалып кетпей, бу затлардынъ баьриси болаяк.

³³Коьк пен ер йогалып кетерлер, тек Меним соьзлерим йогалмаслар.

³⁴Оьзинъизге сак болынъыз, юреклеринъиз коьп ашап, ишип-эсиргеннен эм яшав каьриннен авырмасынлар эм де ол куьн сизге куьтпегенлей келип калмасын.

³⁵Неге десе ол куьн ер уьстинде яшавшылардынъ баьрисин де тузактай келип тутаяк.

³⁶Сонынъ уьшин аьр заман сак болынъыз. Болаяк буьтин бу кыйынлыклардан кутылмага эм Аьдем Улы алдында турмага тийисли болар уьшин дува этинъиз».

³⁷Куьндиз Иса Алла уьйинде уьйрететаган эди, а туьнлерин шахардан шыгып, Зейтун тавда озгаратаган эди.

³⁸Эртенъ сайын халк Оны тынъламага Алладынъ уьйине йыйылатаган эди.