Read Nogai Лука 24 Bible Online

Лука 24 - Nogai bible

Лука 24

¹Юмадынъ биринши ок куьнинде[37], танъ манъында, хатынлар аьзирлеген ийисли майларды алып, кабырга келдилер[38].

²Ама тастынъ кабырдан авдарылып тасланганын коьрдилер.

³Эм мезарга киргенде, Раббий Исадынъ суьегин таппадылар.

⁴Олар бу затка сейирсинип турган вакытта, олардынъ алдына йылтыраган кийимлери мен бирден эки эр киси шыктылар.

⁵Хатынлар коркып, юзлерин тоьмен ийгенде, эр кисилер: «Сиз неге тириди оьлилер арасыннан излейсиз?

⁶Ол мунда йок, Ол тирилген! Галилеяда болган заманда Онынъ сизге айткан соьзлерин эсинъизге туьсиринъизтагы:

⁷„Аьдем Улы куьналылар колына тапшырылмага, кашка керилмеге эм уьшинши куьнде тирилмеге керек“, — деген эди Ол сизге», — дедилер.

⁸Хатынлар Исадынъ соьзлерин эслерине туьсирдилер.

⁹Кабырдан кайтып, бу затлардынъ баьрисин де Исадынъ он бир соктасына эм баьри калганларга билдирдилер.

¹⁰Бу затлардынъ акында элшилерге айтканлардынъ ишинде магдалашы Марьем, Йоханна эм Якуптынъ анасы Марьем эм солай ок олар ман бирге баскалар да бар эдилер.

¹¹Ама олардынъ айтканлары элшилерге бос соьзлер болып коьриндилер эм кыскаяклыларга ынанмадылар.

¹²Петер болса турып, кабырга шабып барды. Ол ийилип карады да онда тек кебинди коьрди эм, болган затка сейирсинип, артына кайтты.

¹³Сол ок куьн олардынъ экиси Ерусалимнен алпыс стадия[39] эректеги Аммаус деп аталган элге йолландылар.

¹⁴Эм бу болган затлардынъ акында оьз ара хабарласып бардылар.

¹⁵Олар соьйтип бири-бири мен соьйлесип эм ойласып барганда, Иса Оьзи оларга янасып келип косылды.

¹⁶Ама олардынъ коьзлери тыйылган эдилер, сол себептен олар Оны танымадылар.

¹⁷Иса болса оларга: «Сиз йолда бараятырып не зат акында хабарласасыз?» — деди. Олар да кайгылы болып онда токтадылар.

¹⁸Олардан бирев, Клеопа дегени, явапка: «Сен Ерусалимге янъы келгенлерден боларсынъ, сосы куьнлерде онда болганды калай билмейсинъ?» — деди.

¹⁹Иса оларга: «Не болганды?» — деди. Олар Ога: «Назаретши Исага не болганы акында», — дедилер. «Ол Алладынъ эм баьри халктынъ алдында иси мен де, соьзи мен де куьдиретли пайхамбар эди.

²⁰Бас дин куллыкшыларымыз бан басшыларымыз Оны оьлимге язалав уьшин бердилер эм кашка кердилер.

²¹А биз, Ол Исраилди куткараяк деп, уьмитленетаган эдик. Оннан сонъ да сол затлардынъ баьриси болганына буьгуьн уьшинши куьн бараятыр.

²²Эм тагы да хатынларымыздынъ бир кавымлары бизди сейирсиндирдилер. Олар кабырга эртенъ мен барып, Онынъ суьегин таппаганлар эм кайтканда, оларга маьлеклер коьринип, Иса тирилген деп, билдиргенлерин айттылар.

²³

²⁴Бизи мен бирге болганлардан бир кавымлар мезарга барып, онда хатынлар айтканша болганын коьргенлер. Тек Исадынъ Оьзин коьрмегенлер».

²⁵Иса оларга: «Эй, калай акылсыз экенсиз эм юреклеринъиз бен пайхамбарлардынъ айткан соьзлерине кеш ынанувшыларсыз!

²⁶Аьше, Масихке соьйтип азап шегип, Оьз данъкына етпеге керек тувылма эди?» — деди.

²⁷Эм Ол Мусадан баслап, баьри Кие Язувларда Оьзининъ уьстиннен баьри пайхамбарлардынъ айтканларын оларга анълатты.

²⁸Олар бараяк болып шыккан элге ювыклап келгенлеринде, Иса йолын бардыргандай этти.

²⁹Ама сокталары: «Аксам ювыклайды, куьн энди кавысып бараятыр, бизи мен кал», — деп, Оны токтаттылар. Иса элге кирип, олар ман калды.

³⁰Олар ман бирге сыпыра янына олтырганда, Ол оьтпекти алып шуькир этти де, сындырып, оларга узатты.

³¹Сонда олардынъ коьзлери ашылды, олар Исады таныдылар, тек Ол оларга коьринмей калды.

³²Эм олар бир бирине: «Ол йолда бизи мен соьйлесип бизге Кие Язувларды анълаткан заманда, юрегимиз ишимизде суьйиништен янмадыма?» — деп сорадылар.

³³Сол саьатлей ок турып, Ерусалимге кери кайттылар эм он бир элшиди, олар ман бирге болган баскаларды да йыйылып турганларын таптылар.

³⁴Олар: «Раббий уьшини мен де тирилген эм Шимонга коьринген!» — деп, соьйлесип туры эдилер.

³⁵Эки аьдем де оларга йолда не болганын, Иса оьтпек сындырган заманда, Оны калай таныганларын айттылар.

³⁶Олар сол затлардынъ акында соьйлесетаган заманда, Иса Оьзи олардынъ арасына кирип: «Тынышлык сизге!» — деди.

³⁷Олар тартынып эм сескенип, (Исадынъ) янын коьремиз деп ойладылар.

³⁸Ама Иса оларга: «Неге адалап калдынъыз? Юреклеринъизге сондай ойлар не уьшин киреди экен?» — деди.

³⁹«Меним колларыма эм Меним аякларыма каранъызтага. Бу — Мен Оьзим! Колларынъызды Мага тийдирип каранъызтага, неге десе яннынъ, Менде коьретаганынъыздай, эти де, суьеги де болмайды», — дегенди айтты.

⁴⁰Соны айтып, Иса кол-аякларын оларга коьрсетти.

⁴¹Олар суьйингеннен, аьле де ынанмай, сейирсинип турганларында, Иса олардан: «Бу ерде сизде кайдай болса да бир азык барма?» — деп сорады.

⁴²Олар Ога бир кесек писирилген балык[40] узаттылар.

⁴³Иса оны алып, олардынъ коьзлери алдында ашады.

⁴⁴Сонъында оларга: «Мен сиз бен аьле болган заманда, Меним акымда Мусага буйырылган Тауратта, пайхамбарлар ман Забур китапларында язылганлардынъ баьриси толтырылмага тийисли деп, мине мунынъ акында айткан эдим».

⁴⁵Сонда Кие Язувларды анъласынлар деп, Иса олардынъ акылын ашты.

⁴⁶«Мине сосы Язувларга коьре, Масих азап шекпеге де, уьшинши куьнинде оьлилерден тирилмеге де керек эди.

⁴⁷Солай ок Ерусалимнен баслап, баьри халкларга тевбеге туьсуьв эм куьналарынынъ кеширилуьв хабары Онынъ аты ман билдирилмеге керек болган.

⁴⁸Сиз, болсанъыз, бу ислердинъ шаатларысыз.

⁴⁹Мен де Атамнынъ бермеге айтканын сизге йиберермен. Ама сиз йогардан куьдиретти алганга дейим Ерусалим шахарында калынъыз», — деди.

⁵⁰Соны айтып, Иса оларды шахардынъ тысына Бейтхинийге дери шыгарды да, колларын коьтерип, оларга разылыгын берди.

⁵¹Оларга разылыгын беретатаган шагында, олардан узакланып, коькке коьтерилип баслады.

⁵²Олар Ога бас ийдилер эм уьйкен суьйиниш пен Ерусалимге кайттылар.

⁵³Алла уьйининъ каралдысында дайым болып, Аллага шуькир айтып турадылар.