Read Nogai Яхья 3 Bible Online

Яхья 3 - Nogai bible

Яхья 3

¹Парисейлердинъ ишинде Никодим деген бир аьдем бар эди. Никодим ювыт басшыларынынъ бири эди.

²Бир вакыт кеште ол Исага келди де айтты: «Биз Сенинъ Алла Оьзи йиберген Устаз экенинъди билемиз. Алла оны ман бирге болмаса, Сен этетаган аьлемет нышанларды эш бирев де эталмаяк, сайсы!»

³Иса явапка: «Сага дурысын айтаман: эш бирев де Алла Патшалыгын коьралмаяк, эгер янъыдан тувмаса», — деди.

⁴«Аьдем тагы да бир кере тувмага калай болаяк, эгер ол энди карт болган болса? — деп сорады Никодим. — Ол, тагы да анасынынъ карнына кирип, янъыдан калай тувмага болаякты?»

⁵Иса: «Сага дурысын айтаман: эш бирев де Алла Патшалыгына киралмаяк, эгер сув эм Алла Рухы ман тувмаса», — деп яваплады. —

⁶«Деннен ден, Рухтан рух тувады.

⁷Сиз янъыдан тувмага тийислисиз деп, Меним айтканыма сейирсинменъиз.

⁸Ел суьйген еринде эседи, сесин эситесинъ, ама ол кайдан келетаганын эм кайда кететаганын билмейсинъ. Тамам сондай, Рухтан тувганнынъ аьр бириси мен де».

⁹«Ол калай болады, аьше?» — деп сорады Никодим.

¹⁰Иса яваплады: «Сен Исраилдинъ устазы эм оны калай анъламайсынъ?

¹¹Сага дурысын айтаман: Биз сол Оьзимиз билген затымызды айтамыз, коьргенимиз акында шаатлаймыз, тек сиз кенем де Бизим шаатлыгымызды кабыл этпейсиз.

¹²Мен сизге ердинъ затлары акында айтаман, а сиз ынанмайсыз, эгер Мен сизге коьктинъ затлары акында айтсам, калай ынанаяксыз?

¹³Эш бирев де коькке коьтерилмеген, тек сол баягы коьктен келген[7] Аьдем Улы болмаса.

¹⁴Муса шоьлде йыланды йогарга калай коьтерген болса, солай Аьдем Улы да: Ога ынанганнынъ аьр бири йойылмай оьмирлик яшавды алар уьшин йогарга коьтерилеек.

¹⁶Алла бу дуныяды солай бир бек суьйген себепли, ялгыз Улын, Ога ынанганлардынъ аьр бири йойылмай, оьмирлик яшавлы болсын деп, берген.

¹⁷Алла оьз Улын дуныяга, оны шуьшлесин деп тувыл, а дуныя Ол аркалы кутылсын деп, йиберген.

¹⁸Ога ынанган шуьшленмеек; ким ынанмайды, сол энди шуьшленген, неге десе ол Алладынъ ялгыз Улына ынанып сенмеди.

¹⁹Шуьшине еткеруьв мине сонынъ уьшин болады: дуныяга ярык келген; тек аьдемлер каранъалыкты ярыктан коьбирек суьедилер, неге десе олардынъ ислери кара.

²⁰Ким яманлык этеди, сол ярыкты суьймейди, онынъ яман ислери баьрининъ алдында ашылар деп, коркканыннан ярыкка келмейди.

²¹Ама ким акыйкатлык пан яшайды, сол эткен ислерин Алладынъ ярдамы ман эткенин коьрсетер уьшин ярыкка барады».

²²Муннан сонъ Иса сокталары ман Юдея ерине кетти. Сонда Иса олар ман бир кесек заманды турды, аьдемлерди сувда шомылдырып тазалай эди.

²³Яхъя да Шалемге ювык Эйнонда аьдемлерди сувда шомылдыратаган эди, неге десе онда сув коьп эди. Аьдемлер сувда шомылдырылып тазаланар уьшин ога аьр дайым келетаган эдилер.

²⁴Сосы затлар Яхъядынъ тутнакка туьсирилеектен алдында болатаган ислер эдилер.

²⁵Яхъядынъ сокталарынынъ бир кесеклери мен айырым бир ювытлардынъ арасында тазаланув аьдети уьшин эрисуьв шыкты.

²⁶Олар Яхъяга келдилер: «Устаз, сол Йорданнынъ аргы ягында сени мен болган эм сен Ога шаатлык эткен, соьле Оьзи аьдемлерди сувда шомылдырады. Баьриси де Ога барады», — дедилер.

²⁷Яхъя: «Аьдем, ога коьктен берилмесе, бир зат та алмага болмайды, — деп яваплады. —

²⁸Сиз оьзинъиз де: „Мен Масих тувылман, тек Онынъ алдында бармага йиберилгенмен“, — деп, айтканымнынъ шаатысыз.

²⁹Келин кимдики болса, сол — киев. Киевдинъ касында турып, оны тынълайтаган тенъи, киевдинъ давысын эситип бек куванады. Мине меним де куванышым солай толды.

³⁰Ога оьспеге, а мага кишкей болмага тийисли.

³¹Ол — йогарыдан келген баьриннен де бийик. Ерден болган — ердеги, ердегиндей соьйлейди. Коьктен келген — баьрисиннен бийик.

³²Ол Оьзи коьрген эм эситкен затларды шаатлайды, ама эш бирев де Онынъ шаатлыгын кабыл этпейди.

³³Ким Онынъ шаатлыгын кабыл этеди, сол Алладынъ акыйкат экенин бегитеди.

³⁴Алла йиберген Алла соьзин айтады, неге десе Алла оьз Рухын оьлшеп бермейди.

³⁵Атасы Улын суьеди, Онынъ колына баьрисин берген.

³⁶Улына ынанган оьмирлик яшавды алады. Ким Улына бойсынмаса, сол яшавды коьрмеек; керисинше, Алла ога токтавсыз каарланаяк».