Read Nogai Яхья 4 Bible Online

Яхья 4 - Nogai bible

Яхья 4

¹Парисейлер Исадынъ Яхъядан эсе коьп сокталарды табатаганын эм сувда шомылдырып тазалайтаганын эситтилер.

²Уьшини мен Иса Оьзи тувыл, Онынъ сокталары оларды сувда шомылдырып тазалайтаган эдилер.

³Раббий оны билгенде, Юдеяды калдырды эм тагы да Галилеяга кайтты.

⁴Онынъ йолы Самариядынъ ишиннен озатаган эди.

⁵Ол Якуп оьзининъ улы Юсупка берген кесек ерден узак болмай орынласкан Самариядынъ Сухар шахарына келди.

⁶Онда Якуптынъ куйысы бар эди. Йолдан сонъ арыган Иса куйыдынъ касына олтырды. Бу бир алтыншы саьатлерде[8] эди.

⁷Бир самарияшы хатын куйыга сув алмага келди. Иса: «Мага сув ишир», — деп тиледи.

⁸Сол вакытта сокталары шахарга азык сатып алмага кеткен эдилер.

⁹Самарияшы хатын: «Сен ювытсынъ, а мен самарияшы хатынман, Сен меннен сув ишпеге калай тилейсинъ? Ювытлар самарияшылар ман айкаспайды да», — деди.

¹⁰Иса деп яваплады: «Эгер сен Алладынъ савгасын эм ким сеннен сув ишпеге тилегенин билсенъ, сен оьзинъ де Оннан тилер эдинъ. Сол заманда Ол сага янлы сувды берер эди».

¹¹Хатын: «Бийим, Сенде аьле сув алмага бир затынъ да йок, куйы да терен, янлы сув кайдан экен Сенде?

¹²Сен бизге сосы куйыды калдырган, оьзи де оннан ишкен, уллары да, суьруьвлери де ишетаган болган атамыз Якуптан уллысынъма экен?» — деди.

¹³Иса: «Ким сосы сувды ишеди, сол тагы да оны ишпеге суьеек.

¹⁴Мен ога береек сувды ишетаган, сол эш бир заманда да тагы да сувсав ман кыйналмаяк. Мен береек сув онынъ ишинде оьмирлик яшавга агатаган булак болаяк».

¹⁵Хатын: «Бийим, мага, мен арбатында сувсамагандай эм мунда сув аькетпеге келмегендей этип, сув бертагы!» — деди.

¹⁶«Барып, эринъди шакыр эм мунда кайт», — деди Иса.

¹⁷Кыскаяклы: «Эрим йок», — деп яваплады. Иса: «Сен, эрим йок деп, дурысын айттынъ.

¹⁸Сенде бес эр болган, а ким мен соьле яшайсынъ, сол сага эр тувыл. Солай дегенде дурысын айттынъ», — деди.

¹⁹«Бийим, — деди сонда хатын, — Сенинъ пайхамбар болганынъды мен коьрип турыман.

²⁰Бизим аталарымыз бу тавда сежде бергенлер, а сиз, (ювытлар,) биз Аллага табынмага керек болган ер — Ерусалимде, дейсиз».

²¹Иса яваплады: «Мага ынан, хатын, сондай заман етеек, сиз Атага не бу тавда, не Ерусалимде табынаяк тувылсыз.

²²Сиз, (самарияшылар,) оьзинъиз де билмейсиз неге табынасыз. Биз болсак, неге сежде бергенимизди билемиз. Инсандынъ куткарылувы ювытлардан келеди, сайсы.

²³Ама сондай заман келер — энди келгенди де — кашан акыйкат табынувшылар Атага Рух пан эм акыйкатлык пан сежде берееклер. Эне сондай табынувшыларды Ата излейди.

²⁴Алла — Рух, Ога табынувшылар Рух пан эм акыйкатлык пан сежде бермеге тийислилер».

²⁵Хатын айтты: «Мен, Христос деген Масих[9] келеегин билемен. Мине кашан келсе, Ол бизге баьрисин де сол заманда анълатар».

²⁶«Ол Менмен, сени мен соьйлейтаган», — деди Иса.

²⁷Сол вакытта сокталары артына кайтып келдилер. Исадынъ хатын ман соьйлеп турганын коьрип, аьжейипсиндилер. Ама эш бирев де: «Неди излейсинъ?», «Неге ол хатын ман соьйлейсинъ?» — деп, сорамады.

²⁸Хатын сол саьатлей шоьлмегин калдырды, шахарга кайтты эм аьдемлерге:

²⁹«Барынъыз, мен эткенлердинъ баьрисин де айткан аьдемди коьрерсиз».

³⁰Олар шахардан шыгып Исага бардылар.

³¹Сол шакта Онынъ сокталары: «Устаз, бир зат ашатага!» — деп тилей эдилер.

³²Ама Ол: «Йок, Менде сиз билмеген азык бар», — деди оларга.

³³Солай болганда сокталары бири бири мен соьйлесип: «Белким, ким ди бирев Ога ашатпага аькелген болса ша?» — дедилер.

³⁴«Меним азыгым, — деди Иса, — Мени Йибергеннинъ ыхтыярын толтырувда эм Онынъ исин тамамлавда.

³⁵Аьше, сиз: „Энди доьрт айдан орув болаяк“, — деп айтпайсызба? Сизге айтаман: коьзинъизди ашынъыз, данъылларга каранъыз! Олар агарган эм орувга еткен.

³⁶Орувшы оьзининъ савгасын алады. Ол, онъысты — оьмирлик яшавды табаякларды — йыяды; солай болганда, шашувшы эм орувшы бирге куванаяклар.

³⁷Соьйтип, „бирев шашады, а баскасы орады“ деген соьз туьз шыгаяк.

³⁸Мен сизди, сиз не заттынъ уьстиннен каьрлемеген болсанъыз, соны ормага йиберемен. Баскалар ислегенлер, сиз ше олардынъ ислерининъ онъысын йыярсыз».

³⁹Сол шахарда яшайтаган самарияшылардынъ коьплери, хатын: «Ол мага эткенлеримнинъ баьрисин де айтты», — деп, шаатлык эткени уьшин Исага ынандылар.

⁴⁰Самарияшылар Исага келгенде олар ман калмага тилеп басладылар. Иса онда эки куьнди озгарды.

⁴¹Оннан да коьплер, Исадынъ соьзин эситип, Ога ынандылар.

⁴²Хатынга: «Энди биз тек сенинъ соьзлеринъ мен ынанмаймыз, соьле оьзимиз де эситтик, бу Аьдем уьшини мен де дуныядынъ Куткарувшысы Масих экенин анъладык», — дедилер.

⁴³Эки куьннен сонъ Иса оннан шыгып Галилеяга кетти.

⁴⁴Иса Оьзи, пайхамбар оьз ата юртында оьрмет таппайды деп, шаатлык этетаган эди.

⁴⁵Иса Галилеяга келгенде, галилеяшылар Оны хош коьрип йолыктылар. Олар Ерусалимде байрамда болган эдилер эм онда Исадынъ эткен затларынынъ баьрисин коьрген эдилер.

⁴⁶Иса тагы да бир кере Галилеядынъ Кана авылына келди. Ол онда сувды шагыр эткен эди. Сонда патшадынъ аькимлерининъ бири бар эди. Онынъ Капарнаумда оьлим аьлде маразлы улы ятатаган эди.

⁴⁷Сол аьдем, Иса Юдеядан Галилеяга келген деп, эситкенде, Ога барды да улын эмлемеге тиледи.

⁴⁸«Сиз аьлемет нышанлар эм аьжейиплер коьрмесенъиз, бир заманда да ынанмассыз», — деди ога Иса.

⁴⁹Ол явапка: «Бийим! Улым оьлмей турып бараяктага», — деди.

⁵⁰«Бар, — деди Иса, — улынъ яшаяк». Аьдем, Исадынъ айткан соьзлерине ынанып, кетти.

⁵¹Ыргатлары оны йолыгып, баласынынъ сав болганын билдиргенде, ол энди де йолда эди.

⁵²Ол: «Кайсы саьатте сав болды?» — деп сораганда, олар: «Туьнегуьн бир етинши саьатлерде[10] онынъ безгеги токталды», — деп явапладылар.

⁵³Атасы Исадынъ ога улынъ яшаяк деп, айткан заманында болганын анълады, оьзи эм онынъ буьтин аьели Исага ынандылар.

⁵⁴Юдеядан Галилеяга кайтканнан сонъ Исадынъ эткен экинши аьлемет нышаны сосы болды.