Read Nogai Яхья 8 Bible Online

Яхья 8 - Nogai bible

Яхья 8

²Эртенъ мен Ол тагы да Алла уьйининъ каралдысында эди. Онынъ тоьгерегине буьтин халк йыйылды. Иса олтырды эм оларды окытып баслады.

³Дин аьлимлери эм парисейлер эрине алаллыгын йоятырган вакытта ысланган пишеди аькелдилер. Оны халктынъ алдына салып,

⁴Исага: «Устаз, бу хатын байына алаллыгын йоятырган вакытта ысланды!

⁵Муса Тауратта сосындайларды тас атып оьлтирмеге буйырды. А Сен не зат айтарсынъ?» — деп сорадылар.

⁶Муны Исады сынап, шуьшлемеге бир сылтав излеп сорадылар. Тек Иса энъкейди де бармагы ман ерде бир затты язып баслады.

⁷Олар, ябысып, Оннан сорай эдилер. Сонда Иса туьзелди эм айтты: «Ким сизинъ ишинъизде куьнасыз, сол биринши болып ога тасты атсын».

⁸Тагы да энъкейди, ерде язувын бардырды.

⁹Сонда олар, уятлы болып, энъ уьйкенлериннен баслап арттагыларга дейим, бирерлеп, кетип басладылар. Сонъында ялгыз Иса эм арада турган хатын калды.

¹⁰Иса басын коьтерди де, пишеден баска бир аьдем коьрмей, сорады: «Хатын, сени шуьшлевшилер кайдады? Сени эш бирев де шуьшлемедиме?»

¹¹«Эш бирев де, Бийим», — деди ол. «Мен де сени шуьшлемеймен, — деди Иса, — кет эм арбатында куьналы болма».]

¹²Иса халкка: «Мен дуныядынъ ярыгыман. Ким Меним артымнан иереди, сол бир заманда да каранъада юрмеек, сонда яшав ярыгы болаяк», — деди.

¹³Сол заманда парисейлер: «Оьз Оьзинъе шаатлык этесинъ, сонынъ уьшин шаатлыгынъ куьшсиз», — деп айттылар.

¹⁴Иса явапка: «Эгер дейим Оьз Оьзиме шаатлык этетаган болсам да шаатлыгым дурыс, неге десе Мен кайдан келгенимди, кайда бараягымды билемен. Сиз болсанъыз кайдан келгенимди де, кайда бараягымды да билмейсиз.

¹⁵Сиз инсан оьлшеми мен шуьшлейсиз, Мен биревди де шуьшлемеймен.

¹⁶Эгер шуьшлесем де, шуьшлевим акыйкат, неге десе ялгыз тувылман, Мени мен Сол, Мени йиберген Атам.

¹⁷Тауратынъызда, кашан эки аьдем шаатлайды, сонда олардынъ шаатлыгынынъ куьши бар деп, язылганды да.

¹⁸Мен Оьзиме шаатлык этемен, Мени йиберген Атам да Мага шаатлык этеди», — деди.

¹⁹Олар сонда сорадылар: «Атанъ кайда?» «Не Мени, не Атамды танымайсыз. Эгер дейим Мени танысанъыз, Атамды да таныр эдинъиз», — деп яваплады Иса.

²⁰Ол муны Алла уьйининъ каралдысында окытканда садака йыйылатаган ерде айтты. Ама Оны бирев де ысламады, неге десе вакыты энди де етпеген эди.

²¹Иса тагы да бир кере: «Мен кетемен, мени излеексиз эм оьз куьналарынъызда оьлеексиз. Мен бараяк ерге сиз келалмаяксыз», — деди.

²²Ювыт басшылары сонда айттылар: «„Мен бараяк ерге сиз келалмаяксыз“, — деп айтады. Аьше, Оьзи Оьзин оьлтиреек болама?»

²³Иса: «Сиз тоьменненсиз, Мен йогарданман. Сиз бу дуныядыкысыз, Мен бу дуныядыкы тувылман.

²⁴Сол себепли Меним сизге, оьз куьналарынъызда оьлеексиз деп, айтатаганым. Эгер Мен сол оьзимди ким деп санайтаганыма ынанмасанъыз, оьз куьналарынъызда оьлеексиз», — деди.

²⁵«Кимсинъ ди Сен сондай?» — деп сорадылар. «Сизге бастан алып Мен ким экенимди айтканман, — деп яваплады Иса. —

²⁶Меним сизинъ акынъызда коьп айтаяк эм шуьшлеек затларым бар. Ама Сол Мени йиберген акыйкатлыкты айтады, Оннан эситкенимди Мен де дуныяга айтаман».

²⁷Олар Иса Атасы уьстиннен айтатаганын анъламадылар.

²⁸Иса тагы да: «Сиз Аьдем Улын йогарга коьтерсенъиз, сонда Мен Ким болганымды, Оьз эрким мен бир зат та этпейтаганымды, а Атам неге уьйреткен болса, соны айтатаганымды билерсиз.

²⁹Мени йиберген Мени мен бирге, Ол Мени ялгыз калдырмайды, неге десе Мен аьр заман Ол разы болган затларды этемен», — деди.

³⁰Сосы соьзиннен сонъ коьплер Исага ынандылар.

³¹Иса Ога ынанган ювытларга айтты: «Эгер сиз окувыма сенимли болсанъыз, уьшини мен де Меним сокталарымсыз.

³²Сонда акыйкатлыкты билерсиз, акыйкатлык та сизди эркин этер».

³³«Биз Ибрагимнинъ тукымыннанмыз, эш бир заманда да биревге де кул болмаганмыз. Сен бизге кайтип: „Эркин боларсыз“, — деп айтасынъ?» — дедилер.

³⁴Иса явапка: «Сизге дурысын айтаман: куьна этетаган аьр аьдем куьнадынъ кулы.

³⁵Кул уьйде оьмирликке турмайды, а ул аьр заманда да аьелдинь санында.

³⁶Сол себепли, эгер Ул сизди эркинге йиберсе, уьшини мен эркин боларсыз.

³⁷Ибрагимнинъ тукымыннан экенинъизди билемен, ама Мени оьлтирмеге излейсиз, неге десе соьзимди ишинъизге сыйдыралмайсыз.

³⁸Мен Оьз Атамда коьргенимди айтаман, а сиз оьз атанъыздан эситкенинъизди этесиз», — деди.

³⁹«Бизим атамыз — Ибрагим», — деп явапладылар олар. «Эгер дейим Ибрагимнинъ балалары болсанъыз, — деди Иса, — Ибрагимнинъ ислерин этер эдинъиз.

⁴⁰Тек сиз Мени, Алладан эситкен акыйкатты сизге айтатаган Аьдемди, оьлтиреек боласыз. Ибрагим оны этпеген.

⁴¹Сиз сол атанъыз эткенди этесиз». «Биз некяхсыз тувганлардан тувылмыз, — дедилер, — бизим бир Атамыз бар — Алла».

⁴²Иса: «Эгер Атанъыз Алла болса, сонда Мени суьер эдинъиз, неге десе Мен Алладан шыгып келгенмен. Оьз эркимнен келмегенмен, Мени Алла йиберген.

⁴³Калай анъламайсыз не зат акында Мен сизге айтатаганымды? Меним соьзимди эситалмаган себепли анъламайсыз.

⁴⁴Сиз оьз атанъыздыкы — ибилистикисиз. Атанъыздынъ излегенин этеек боласыз. Ибилис бастан аьдем оьлтируьвши болган, бир заманда да акыйкатлыктынъ ягы болмаган, неге десе онда бир дурыслык та йок. Алдаган вакытта тувган тилинде соьйлейди, неге десе ол оьтирикши эм оьтирикшидинъ атасы.

⁴⁵Ама Мен сизге акыйкатлыкты айткан себепли Мага ынанмайсыз!

⁴⁶Ишинъизден ким Меним куьналы экенимди коьрсетер? Эгер акыйкатты айтатаган болсам, Мага неге ынанмайсыз?

⁴⁷Ким Алладыкы, сол Алла соьзин эситеди. Сиз Алладыкы тувылсыз, сонынъ уьшин эситпейсиз».

⁴⁸Ювытлар Исага: «Аьше, Сен самарияшысынъ эм йинлисинъ деп айтканымыз дурыс тувылма?» — деп айттылар.

⁴⁹«Мен йинли тувылман, — деп яваплады Иса, — Мен Атамды оьрметлеймен, а сиз Мага оьрметсизлик этесиз.

⁵⁰Мен Оьзиме данък излемеймен; ама оны излеген эм шуьшлеген бар.

⁵¹Сизге дурысын айтаман: ким Мен айтканды толтырады, сол бир заманда да оьлмеек».

⁵²Сонда ювытлар кышкырыкладылар: «Соьле биз йинли экенинъди тувра билдик! Ибрагим оьлген, баьри пайхамбарлар да оьлгенлер, а Сен: „Ким соьзимди толтырады, сол бир заманда да оьлмеек“, — дейсинъ.

⁵³Ия, Сен атамыз Ибрагимнен де уьйкенсинъме? Ол оьлген, пайхамбарлар да оьлгенлер. Сен оьзинъди ким деп санайсынъ?»

⁵⁴Иса явапка: «Эгер Мен Оьз Оьзимди данъклайтаган болсам, Меним данъкым бир зат та тувыл. Мени сиз Оны Алламыз деп атаган Атам данъклайды.

⁵⁵Сиз Оны танымайсыз, а Мен таныйман. Эгер Оны танымайман десем, тап сиздей, оьтирикши боларман. Ама Мен Оны таныйман эм айтканын толтыраман.

⁵⁶Атанъыз Ибрагим Меним шагымды коьрмеге куванышлы эди. Ол коьрди эм куванды», — деди.

⁵⁷«Сага энди де элли йыл болмаган, Ибрагимди калай коьргенсинъ?» — дедилер Ога ювытлар.

⁵⁸Иса яваплап: «Сизге дурысын айтаман: Ибрагим туваяктан алдын Бар Болган Менмен!» — деди.

⁵⁹Сонда Исады оьлтиреек болып, тасларга узалдылар, ама Ол ясырынып калды эм араларыннан озып, Алла уьйининъ каралдысыннан шыкты да йолы ман кетти.