Read Nogai Яхья 9 Bible Online

Яхья 9 - Nogai bible

Яхья 9

¹Иса, оьтип бараятырып, сокыр болып тувган аьдемди коьрди.

²Сокталары Исадан: «Устаз, мунынъ сокыр болып тувганына ким куьналыды: ол оьзи ме яде ата-анасы ма?» — деп сорадылар.

³«Не оьзи, не ата-анасы куьналы болмаганлар, — деп яваплады Иса. — Онынъ яшавында Алладынъ ислери коьрсетилеек уьшин болган.

⁴Аьли де куьн озбай, Мени Йибергеннинъ ислерин этпеге тийислимиз. Туьн туьсеятыр, онда бирев де ислеялмаяк.

⁵Мен дуныяда болган заманда дуныядынъ ярыгыман».

⁶Иса соны айтканнан сонъ, ерге туькирди, туькиршигин ер топырак пан карыстырды, балшыкты сокырдынъ коьзине якты.

⁷«А соьле барып, Шилоах бассейнинде бетинъди юв», — деди сокырга. Шилоах соьздинъ маьнеси «йиберилген». Сокыр барып бетин ювды, коьзлери ашылып, кери кайтты.

⁸Конъысылары, онынъ алдын садакашы болганын коьргенлер: «Сосы олтырып садакады йыювшы тувылма экен?» — деп сорадылар.

⁹Бирерлери: «Аьше, сол», — деп айттылар. Баскалары: «Йок, ол ога тек усайды», — дедилер. Аьдем оьзи: «Ол менмен», — деди.

¹⁰«Сонда коьзлеринъ калай ашылды?» — деп сорай эдилер.

¹¹Ол яваплап: «Иса деген Аьдем балшыкты эгетип, коьзиме якты, сонъ мага Шилоах бассейнине барып бетимди ювмага буйырды. Мен, кетип, бетимди ювганда коьрип басладым», — деди.

¹²«Сол аьдем кайда экен?» — деп сорадылар. «Билмеймен», — деди.

¹³Алдын сокыр болган аьдемди парисейлерге аькелдилер.

¹⁴Исадынъ балшык эгетип сокырдынъ коьзлерин ашкан куьни шабат куьн эди.

¹⁵Парисейлер кисиден калай коьрип баслаганын сорадылар. «Ол коьзлериме балшык якты. Мен бетимди ювдым, энди коьремен», — деди киси.

¹⁶Парисейлердинъ бир кесеклери: «Бу аьдем Алладан тувыл, неге десе Ол шабат куьнди оьрметлемейди», — деп басладылар. Баскалары болса: «Куьналы аьдем сондай аьлемет нышанларды калай этпеге болады?» — деп сорадылар. Ойлары боьлиндилер.

¹⁷Алдын сокыр болганга тагы да: «Сен оьзинъ Онынъ акында не айтасынъ, коьзлеринъди Ол ашканды да?» — деп сорадылар. Аьдем: «Ол — пайхамбар», — деп яваплады.

¹⁸Ювыт басшылары аьдемнинъ сокыр болганына эм коьзлери ашылганына ынанмай эдилер. Сонъында коьзлери ашылганнынъ ата-анасын шакырып:

¹⁹«Бу улынъызба? — деп сорадылар, — сиз мунынъ акында, ол сокыр болып тувган деп, айтасызба? Ол кайтип соьле коьрмеге болады?»

²⁰«Биз мунынъ улымыз экенин билемиз, — деп яваплады ата-анасы, — биз онынъ сокыр болып тувганын да билемиз.

²¹А коьзлери энди кайтип коьрмеге баслаганын билмеймиз. Оьзиннен соранъыз. Ол энди акылбалык, оьзи уьшин явапламага болады».

²²Ювыт басшыларыннан коркып, соьйтип явапладылар; неге десе ювыт басшылары, ким Иса — Масих деп ашык айтса, сол синагогтан кувылаяк деген токтасты алган эдилер.

²³Сонынъ уьшин ата-анасынынъ: «Ол энди акылбалык, оьзиннен соранъыз», — дегенлери.

²⁴Парисейлер алдын сокыр болган кисиди экинши кере шакырдылар: «Алладынъ алдында дурысын айтаягынъа ант эт, — дедилер, — биз сосы Аьдемнинъ куьналы экенин билемиз».

²⁵Киси: «Ол куьналыма яде тувылма, мен билмеймен. Мен тек бир затты билемен: сокыр эдим, а соьле коьремен!» — деп яваплады.

²⁶Олар тагы да: «Ол сени мен не зат этти? Коьзинъди кайтип ашты?» — дедилер.

²⁷«Сизге энди айттым да, а тынъламайсыз. Неге тагы да сол затты эситпеге суьесиз? Сиз де Онынъ сокталары болмага суьесизбе?» — деп яваплады.

²⁸Ога урсысып: «Онынъ соктасы сенсинъ! Биз Мусадынъ сокталарымыз.

²⁹Биз Алла Муса ман соьйлегенин билемиз, а бу инсаннынъ кайдан экенин де билмеймиз», — дедилер.

³⁰Киси явапка: «Мине сол ды да сейирлик! Онынъ кайдан экенин де билмейсиз, а Ол коьзимди ашты. Алла куьналыларды тынъламаганын билемиз, а ким Алла йолында барады эм ыхтыярын толтырады, Алла соны тынълайды.

³¹

³²Эш бирев эш бир заманда, сокыр болып тувганнынъ коьзи ашылар деп, эситпеген.

³³Эгер бу Аьдем Алладан болмаса, бир затты да эталмас эди», — деди.

³⁴Парисейлер: «Сен савлай куьна ишинде тувган бизди окытпага не ишинъ бар?» — деп, оны кувып шыгардылар.

³⁵Иса, кисиди кувганларын эситип, оны тапты: «Сен Аьдем Улына[16] ынанасынъма?» — деп сорады.

³⁶«А Ол кимди, Бийим? — деп сорады киси, — Мага, мен Ога ынангандай этип, айттага».

³⁷Иса: «Сен соьле Оны коьрип турысынъ. Ол сени мен соьйлейди», — деди.

³⁸Киси: «Раббий, мен ынанаман!» — деп, Исага сежде берди.

³⁹Иса: «Мен коьрмегенлер коьргендей, коьруьвшилер де сокыр болгандай, оьким берер уьшин бу дуныяга келгенмен», — деди.

⁴⁰Онынъ касында болган парисейлердинъ кайбирлери, муны эситип, сорадылар: «Соны ман биз де сокырмызба?»

⁴¹Иса айтты: «Эгер сокыр болсанъыз, сизде куьна болмас эди, ама коьремиз дегенинъиз уьшин куьнанъыздынъ шуьши калады.