Read Nogai Урымшылар 10 Bible Online

Урымшылар 10 - Nogai bible

Урымшылар 10

¹«Мине Мен Сионда тас саламан — Ога абынаяклар; кая саламан — Ога суьринип йыгылаяклар. Ама Ога ким сенсе, сонынъ уьмити уьзилмес». Кардашлар, меним юректен аьсирет болган эм Алладан тилеген затым — Исраил халкынынъ куткарылувы.

²Олар Алладынъ эмирин толтырмага талпынадылар. Соны мен шаатлайман. Ама талпынувлары акыйкат билимге таянмайды.

³Неге десе исраилшилер, Алладынъ аьдемлерди калай аклаганын аньламаганлай, оьзлери-оьзлерин аклатпага куьреседилер. Соьйтип, Алладынъ аклав йолына бойсынмадылар.

⁴Неге десе, Алла иман эткен аьр кимди акласын деп, Масих Таурат йорыгын тамамлады.

⁵Муса, Тауратка таянып акланув акында: «Таураттынъ талапларын толтырган солай этип яшаяк», — деп язады.

⁶Ама иманга таянып акланув акында Кие Язув булай айтады: «Ким коькке коьтерилеек?» — деп, оьзинънен сорама (солай айтылганы: Масихти ерге туьсирер уьшин).

⁷Эм сорама оьзинънен: «Ким туьпсиз опкынга туьсеек?» — деп (солай айтылганы: Масихти оьлилерден коьтерер уьшин).

⁸Ама Кие Язув не айтады? «Сага ювык Алладынъ Соьзи — авызынъда эм юрегинъде». Баскаша айтканда, бу соьз — биз яйып юрген, иман акындагы хабар.

⁹Неге десе авызынъ ман Исадынъ Раббий болганын ашык айтсанъ эм Алла Оны оьлилерден тирилткенине юрегинъ мен ынансанъ, куткарылаяксынъ.

¹⁰Ким юреги мен иман этсе, сол акланаяк. Ким авызы ман иман эткенин айтса, сол куткарылаяк.

¹¹Кие Язувда айтылгандай: «Ога ким сенсе, сонынъ уьмити уьзилмес».

¹²Бу соьз, ювытларды баска миллетлилерден айырмай, аьр аьдемге айтылган. Раббий бир, Ол баьрисининъ де Иеси. Ога ялбарып тилегенлердинъ баьрисине де Ол юмарт.

¹³Неге десе: «Раббийге ялбарып тилегенлердинъ аьр бири куткарылаяк».

¹⁴Тек Ога иман этпегенлер, калай Ога ялбарып тилерлер? Эситпегенлерине калай иман этерлер? Алладынъ соьзин яятаган болмаса, калай эситерлер?

¹⁵Эгер дейим Алла соьзин анълатпага йиберилмеген болса, соьзи калай яйылаяк? Кие Язув айткандай: «Ийги Хабарды алып келгенлердинъ аякларын коьруьв калай аьруьв!»

¹⁶Ама Ийги Хабарды баьриси де кабыл этпедилер. Ешая пайхамбар айткандай: «Я Раббий, меннен эситкенине ким ынанды экен?»

¹⁷Соьйтип, инсан тек Масих акындагы хабарды эситсе, иман этер, сол хабар да анълатылмаса эситилмес.

¹⁸Ама сорайман: «Аьше, ювытлар эситпегенлерме?» Элбетте, эситкенлер. Кие Язувда язылганды да: «Буьтин ер юзинде олардынъ давыслары яйылды, дуныядынъ доьрт муьйисине дейим олардынъ соьзлери етти».

¹⁹Мен яне сорайман: «Исраил анъламадыма?» Биринши болып (Алладынъ соьзлери мен) Муса пайхамбар явап береди: «Миллет деп атап болмаяк миллет аркалы Мен сизде куьншилик уяндырарман. Анъсыз миллет аркалы сизди ашувландырарман».

²⁰Ешая да йигерлик пен (Алладынъ соьзин) айтады: «Мени излемегенлер Мени таптылар. Мени сорамаганларга Оьзимди коьрсеттим».

²¹Ама Исраил акында булай айтады: