Read Nogai Урымшылар 11 Bible Online

Урымшылар 11 - Nogai bible

Урымшылар 11

¹«Мен колымды тынълавсыз эм карсыласувшы халкка куьн узагы созып турдым». Мен сорайман: «Алла Оьзининъ халкын шет кактыма?» Йок, эш болмас! Мен оьзим исраилшимен, Ибрагим тукымыннан, Бенямин ырувыннан.

²Алла энъ басыннан Оьзи айырып алган халкын шет какпады. Аьше, Ильяс акында Кие Язувда не айтылганын билмейсизбе? Ильяс Исраил халкына карсы Аллага шагынады:

³«Раббий, олар Сенинъ пайхамбарларынъды оьлтирдилер, курман этилуьвши ерлеринъди буздылар, мен ялгыз калдым. Мени де оьлтирмеге шалысадылар».

⁴Аьше, Алла ога кайдай явап берди? «Мен Оьзиме ети мынъ аьдем сайладым. Олар Баалдынъ[8] алдында тизлериннен шоькпедилер».

⁵Соьйтип те, аьлиги заманда да Алладынъ шапагаты ман сайланган кишкей ямагаты калды.

⁶Ама Алла оларды Оьз шапагаты ман сайлаган болса, сонда олардынъ эткен бир затына карамайды. Солай болмаса, шапагат энди шапагат болмас эди.

⁷Аьше, сонъы не? Исраил излеген затына етисалмады, тек Алла сайлаганлар етистилер. Калганлардынъ акылы сезимсиз болды.

⁸Кие Язувда язылгандай: «Алла олардынъ рухын уйклатты. Буьгуьнге дейим де олардынъ коьзлери коьрмейди, А кулаклары эситпейди».

⁹Даут десенъ булай айтады: «Олардынъ сыпыралары оларга тузак эм капкан болсын! Суьринип йыгылсынлар эм тийисли язаларын алсынлар!

¹⁰Коьзлерин, коьралмагандай, каранъалык капласын, Аркалары оьмир бойы буькирейип калсын!»

¹¹Солай болса, мен сорайман: «Ювытлар йыгылаяк уьшин суьриндилерме?» Элбетте, йок! Олардынъ янъылувы ман баска миллетлилерге куткарылмага амал берилди. Сонынъ уьшин ювытлар оларды куьнлейди.

¹²А эгер дейим ювытлардынъ янъылувы дуныяга байлык эм йолдан таювлары баска миллетлерге байлык аькелген болса, йолга савлай кайтувлары оннан да уллы байлык аькелер.

¹³Энди сизге, баска миллетлилерге, соьзим. Мен баска миллетлилерге йиберилген элши болганым уьшин кызметим мен оьктемсиймен.

¹⁴Билким, оьзимнинъ халкымда сизге куьншилик тувдырып, бир кесегин куткаралсам ша?

¹⁵Эгер дейим (Алладынъ) оларды шетке кагувы буьтин дуныяды Оны ман ярастырган болса, оларды янъыдан кабыл этуьви тап оьлилерди яшавга кайтарувындай болар.

¹⁶Эгер дейим оьтпектен алынган баслапкы кесек Аллага багысланган болса, буьтин оьтпек те Ога багысланган. Эгер дейим зейтун теректинъ тамырлары Аллага багысланган болса, бутаклары да солай.

¹⁷Эгер дейим бутаклардынъ бир кесеклери сындырылган болса эм сен, кийик зейтун теректинъ бутагы, олардынъ орнына ялганып, бавда оьскен зейтуннынъ тамырына эм соьлине ортак болсанъ, сындырылган бутаклардынъ алдында мактанма.

¹⁸Мактансанъ, муны мутпа: тамырды сен тутпайсынъ, тамыр сени тутады.

¹⁹Билким, сен: «Мени терекке ялгар уьшин бутаклар сындырылган эдилер», — деп айтарсынъ.

²⁰Дурыс. Олар иманлары болмаганы уьшин сындырылган эдилер, а сен иманлы болганынъ уьшин олардынъ орнындасынъ. Ама сен коькирексиме, корк!

²¹Алла табиат бутакларын аямаган. Солай болганда, Ол сени аяр деп ойланасынъма?

²²Эсинъде тут, Алла эм танъ, эм де каты. Ол айырылып туьскенлерге каты, ама, Онынъ ийгилигине сенип турсанъ, сага танъ. Турмасанъ, сен де кесилип тасланаяксынъ.

²³Ювытлар да, имансызлыкларында тиренмеселер, тагы да асыл терекке ялганаяклар. Неге десе оларды Алладынъ тагы да ялгамага куьши бар.

²⁴Эгер дейим сен табиаты кийик зейтуннан кесилип, табиатка карсы бав зейтунына ялганган болсанъ, сол заманда Аллага сындырылган табиат бутакларды оьз терегине кайтармага тагы да енъил.

²⁵Кардашлар, сиз оьзинъизди бек акыллыга санаманъыз деп, мен сизге бир сырды ашпага суьемен: исраилшилердинъ сезимсизлиги дайымлыкка тувыл, тек баска миллетлилерден иман эткенлердинъ саны толганга дейим тураяк.

²⁶Эне сол заманда буьтин Исраил куткарылаяк. Кие Язувда айтылгандай: «Сионнан Куткарувшы келеек, Якуптынъ тувдыкларыннан алласызлыкты курытаяк.

²⁷Эм Мен олардынъ куьналарын йок эткенде сосы антласувды олар ман бегитирмен».

²⁸Олар Ийги Хабарды кабыл этпегенлери уьшин Аллага душпан, бу да сизге, баска миллетлилерге, пайдалы болып шыкты. Ама олар — Алла сайлаган халк, Алла оларды ата-бабаларынынъ хаьтерине суьеди.

²⁹Неге десе Онынъ савгалары эм шакырувы артына алынмас.

³⁰Бир заманларда сиз де Аллага бойсынмайтаган эдинъиз, а энди исраилшилердинъ бойсынмавлыклары уьшин Алла сизди языксынды.

³¹Соьйтип олар энди де Аллага бойсынмайдылар. Ама Алла сизди языксынгандай, оларды да языксынаяк.

³²Неге десе Алла баьрисин языксынар уьшин оларды бойсынмавлыктынъ есири этти.

³³Ай, Алладынъ байлыгынынъ, акыллылыгынынъ, билимлилигининъ теренлиги! Онынъ карарлары акылга сыйынмас, йоллары эш бир заманда да анъласылмас!

³⁴«Ким Раббийдинъ акылын анълаган эм ким Онынъ кенъесшиси болган?

³⁵Артына кайтармага амалсыз керек болган не болса да бир затты Раббийге ким берген экен?»

³⁶Неге десе баьри зат Раббийден, Раббий аркалы, Раббий уьшин! Ога оьмирлерге данък! Амин.