Read Nogai Урымшылар 15 Bible Online

Урымшылар 15 - Nogai bible

Урымшылар 15

¹Биз, иманлары берк болганлар, тек оьзимиз суьйгенди этпей, карувсызлардынъ куьшсизликлерине шыдамага керекпиз.

²Аьр биримиз де ювыгымыздынъ иманын беркитер уьшин ога не ийги болаягын ойлап, оны разы этпеге куьресеек.

³Масих Оьзи де суьйгениндей этпеген, ама Кие Язувда айтылгандай: «Сени яманлаганлардынъ корлавлары Мага туьсти».

⁴Кие Язувда язылганлардынъ баьриси де берген шыдамлыгы эм коьнъил коьтеруьви аркалы уьмитимизди тутпага бизге насихат беруьв уьшин язылган.

⁵Сабырлык беруьвши эм коьнъил коьтеруьвши Алла, Иса Масихтинъ коьримине иерип, оьз аранъызда бир акылда болганынъызды савга этсин. Соьйтип, бир юректен, бир авыздан Раббийимиз Иса Масихтинъ Алласын эм Атасын данъкларсыз.

⁷Сол себепли Масих сизди Алладынъ данъкы уьшин калай Оьзине алган болса, сиз де бир биринъизди солай алынъыз.

⁸Неге десе айтаягым бу: Масих Алладынъ сенимли болганын коьрсетер уьшин, Онынъ ювытлардынъ ата-бабаларына берген Соьзи толтырылганын бегитип, баска миллетлилер де, оларды языксынганы уьшин, Аллады данъкласынлар деп, ювытлардынъ кулы болды. Кие Язувда язылгандай: «Сол себепли Сени миллетлер арасында данъкларман, Сенинъ атынъды мактап йырларман».

¹⁰Тагы да айтылады: «Ай, миллетлер, Алладынъ халкы ман бирге куванынъыз!»

¹¹Эм тагы: «Баьри миллетлер, Раббийди мактанъыз! Баьри халклар Ога мактав шыгарсынлар!»

¹²Ешая пайхамбар да айтады: «Ишайдынъ[10] Тамыры келеек, Коьтерилип, миллетлердинъ уьстинде аькимлик суьреек, Ога миллетлер сенееклер».

¹³Уьмит булагы Алла — иманынъыз аркалы сизди аьр туьрли суьйинишке эм тынышлыкка толтырсын, соьйтип, уьмитинъиз Кие Рухтынъ куьдирети мен коьптен коьп оьссин.

¹⁴Сиз болсанъыз, кардашларым, ийгиликке толганынъызга, аьр туьрли билимге уьйренип, бир биринъизге насихат берип билгенинъизге толы ынанаман.

¹⁵Кенем де Алла мага берген шапагаты ман бир кесек затларды эсинъизге туьсиреек болып, сосы хатты сизге бираз йигерлик пен яздым.

¹⁶Алла мени баска миллетлилер уьшин Иса Масихтинъ кызметшиси болмага салган. Ювыт болмаганлар Аллага яраган, Кие Рух пан Ога багысланган курман болсын деп, мен, Алладынъ Ийги Хабарын яювды кие борышым деп санап, куллык этемен.

¹⁷Мен, Иса Масихке байыр болып, Аллага багыслаган ислерим мен оьктемсимеге боламан.

¹⁸Неге десе Масихтинъ, баска миллетлилерди Аллага бойсындырар уьшин мен аркалы соьз эм ис пен, аьлемет нышанлар эм аьжейиплердинъ куьши мен, Алла Рухынынъ куьдирети мен эткенлериннен баска бир затты да йигерли айтпага болмаспан. Соьйтип, Ерусалимнен баслап, Иллирияга кадер айланып, Масих акындагы Ийги Хабарды аьр ерде билдирдим.

²⁰Солай этип, дайым да Масихтинъ атын эш эситпеген ерлерде Ийги Хабарды яймага каьрледим. Баскалардынъ аьзирлеген негизлеринде куллыгымды курамага суьймедим.

²¹Кие Язувда айтылгандай: «Оннан хабарлары болмаганлар — коьрееклер, эситпегенлер — анълаяклар».

²²Коьп кере сизге келмеге деп ойлап, бармаганымнынъ себеби сол.

²³А энди сосы ерлерде баска исим калмады эм, коьп йыллардан бербетин сизге келмеге аьсиретим болганнан себеп, Испанияга бара турып, сизди йокларман. Соьйтип, элгезерлигимде сиз мен коьрисермен эм сиз бен бираз заман озгарып завыкланганнан сонъ, сиз мени йолга шыгарып, Испанияга йиберерсиз деп уьмит этемен.

²⁵А соьле мен Ерусалимге Аллага багысланганларга кызмет кылмага бараятырман.

²⁶Македония эм Ахая (иман ямагатлары) Ерусалимдеги колайсыз имандасларына суьйип йыйган акшады аькелемен.

²⁷Аьше, бу ярдамды суьйип йибередилер. Оьзлери де оларга борышлылар: эгер дейим ювытлар баска миллетлилер мен рух байлыклары ман боьлискен болсалар, баска миллетлилер де ювытлардынъ ден муктажларын йок этип ярдамласпага тийислилер.

²⁸Сол исти толтырып, йыйылган садакады оларга таптырганнан сонъ, сизге келип, Испанияга кетеекпен.

²⁹Билемен: сизге келсем, Масихтинъ берекетли савгаларын толысынша аькелеекпен.

³⁰Кардашлар, Раббийимиз Иса Масихтинъ эм Кие Рух савга эткен суьювдинъ аты ман сизге ялбарып тилеймен, Алладынъ алдында меним уьшин дува этип, куьресуьвимге косылынъыз.

³¹Юдеядагы имансызлардан кутылайым, а Ерусалимге алып бараятырган ярдамымды имандасларым кабыл этсинлер деп, тиленъиз.

³²Эне сол заманда, Алла буйырса, мен сизге суьйиниш пен келип, коьнъилим мен тыншаярман.

³³Тынышлыктынъ булагы — Алла баьринъиз бен бирге болсын. Амин.