Read Nogai 1 Коринтшилер 1 Bible Online

1 Коринтшилер 1 - Nogai bible

1 Коринтшилер 1

¹Алладынъ ыхтыяры ман Иса Масихтинъ элшиси болмага шакырылган Паулдан эм де кардашымыз Состенистен —

²Алладынъ Коринттеги иман ямагатына салам! Алла сизди Оьзине байыр болмага шакырган, сиз де Масих аркалы Аллага багыслангансыз. Сизге эм аьр туьрли ерде Раббийимиз, олардынъ да бизим де Раббийимиз Иса Масихтинъ атын айтып дува эткенлердинъ баьрисине.

³Атамыз Алладан эм Раббий Иса Масихтен шапагат эм тынышлык болсын.

⁴Сизинъ акынъызда ойларымда Иса Масих пен сизге берилген шапагаты уьшин дайым Аллама шуькир этемен.

⁵Масих аркалы сиз аьр затка, аьр туьрли тил шеберликке эм билимге байыдынъыз.

⁶Онынъ себеби — Масихке шаатлык этуьвимиз сизде беркиди.

⁷Сонынъ уьшин сиз Раббийимиз Иса Масихтинъ келуьвин аьсирет куьтетаган бу заманда эш бир рух савгасында етиспевлигинъиз йок.

⁸Раббийимиз Иса Масих иманда берк турувынъызды сонъына дейим саклаяк. Соьйтип сиз Ол кайтаяк куьнинде айыпсыз боларсынъыз.

⁹Сизди Оьзининъ Улы Раббийимиз Иса Масих пен айкаспага шакырган Алла ваьдесине берк.

¹⁰Кардашлар, баьринъиздинъ ойларынъыз, пикирлеринъиз баьри ягыннан бир болсын, аранъызда эрис-суьрислер болмасын, татымлыкта яшанъыз деп, Раббийимиз Иса Масихтинъ аты ман тилеймен.

¹¹Кардашларым, аранъызда урсыслар болатаганы акында мага Клоядан келгенлерден белгили болды.

¹²Бир затты айтпага суьемен: аьр биринъиз: «Мен — Паул яклы», «Мен — Аполлос яклы», «Мен — Кефа яклы» яде «Мен — Масих яклыман» деп айтасыз.

¹³Аьше, Масих боьлиндиме? Сиз уьшин Паулды кашта кердилерме? Паулдынъ аты ман сувда шомылдырылып тазаландынъызба?

¹⁴Крисп пан Гайдан баска эш биринъизди де сувда шомылдырып тазаламаганым уьшин Аллага шуькир этемен.

¹⁵Суьйтип, меним атым ман сувда шомылдырылып тазалангансыз деп эш бирев де айтаяк тувыл.

¹⁶Аьше, мен Степанастынъ аьелин сувда шомылдырганман. Билмеймен, тагы да кимди болса да биревди сувда шомылдырдымма…

¹⁷Раббий мени шомылдырмага тувыл, Ийги Хабарды яймага йиберген. Муны да, Масих оьлтирилген каштынъ маьнеси йойылмасын деп, акыл соьзлер кулланмай этемен.

¹⁸Йойылув йолына туьскенлерге сол каш акында хабар — акылсызлык, а бизге, куткарылув йолындагыларга — Алладынъ куьдирети.

¹⁹Кие Язувда Алла: «Акыллылардынъ акыллылыгын йокка шыгарарман, Ойшыллардынъ ойлары бос болганын коьрсетермен» — деп, айтады.

²⁰Кайда ды акыллы аьдеминъиз? Кайда ды дин аьлими? Кайда ды бу оьмир мен яратылган философ? Алла бу дуныядынъ акыллылыгынынъ маьнесизлигин коьрсетпедиме?

²¹Алла акыллы болганы уьшин дуныя оьзининъ акыллылыгы ман Аллады анъламага етисалмайды. Соны уьшин Алла иманлыларды акылсыздай коьринген увазымыз аркалы куткармага токтасты.

²²Ювытлар аьлемет нышанлар талаплайдылар, а греклер акыллылык излейдилер,

²³ама биз кашта керилген Масих акында хабарлаймыз. Ювытлар соны айыпка, а баска миллетлилер акылсызлыкка санайдылар.

²⁴Ама Алла шакырганлар уьшин, ювытлардай болып, баска миллетлилер уьшин Масих — Алла куьдирети эм Алла акыллылыгы.

²⁵Неге десе Алладынъ «акылсызлык» деп айтылган заты аьдемнинъ акыллылыгыннан йогары, Алладынъ «карувсызлык» деп айтылган заты аьдемнинъ карувыннан куьшли.

²⁶Кардашлар, эсинъизге туьсиринъиз: Алла сизди шакырганда сиз ким эдинъиз? Инсан оьлшемине коьре аранъызда акыллы, абырайлы эм де аксуьек асылыннан аьдемлер коьп тувыл эди.

²⁷Алла акыллыларды уялтар уьшин дуныядынъ акылсыз деп, санаган затларын, куьшлилерди уялтар уьшин де дуныядынъ карувсыз деп, санаган затларын сайлады.

²⁸Дуныядынъ маьнели деп айтканларын йояр уьшин Алла дуныядынъ маьнесиз, асылсыз, кадирсиз деп санаганларын сайлады.

²⁹Соьйтип, бирев де Алладынъ алдында мактаналмас.

³⁰Неге десе Алла аркалы сиз Иса Масих пен бирликте турасынъыз. Масих бизим уьшин Алладан келген акыллылык болды. Масих аркалы Алла бизди аклады, Оьзине байыр этти эм эркинликке еткерди.

³¹Кие Язувда айтылгандай: «Мактанган, Раббий мен мактансын».