Read Nogai 1 Коринтшилер 13 Bible Online

1 Коринтшилер 13 - Nogai bible

1 Коринтшилер 13

¹Аьдемлердинъ яде маьлеклердинъ тиллеринде соьйлей турып, ама ишимде суьювим болмаса, зынъырдаган бакыр яде такырдаган кимвал[8] сесимен.

²Эгер мен пайхамбарлык этпеге, кайдай сырлардынъ да билимнинъ де туьбине етпеге амалым, тавларды орынларыннан козгагандай иманым болса да, суьювсиз мен эш бир зат та тувылман.

³Эгер болган муьлкимди ярлыларга уьлестирсем де, шаркымды отка былактырсам[9] да, менде суьюв болмаса, сол затта эш бир пайда йок.

⁴Суьюв тоьзимли, шапагатлы. Суьюв куьнлемейди, мактанмайды, коькирексимейди;

⁵келиссиз аьрекетлемейди, оьзине пайда излемейди, тез ашувланмайды, яманлыкты эсте тургыстпайды;

⁶залымлыкка суьйинмейди, акыйкатлык пан бирге суьйинеди.

⁷Суьюв баьри затка тоьзеди, дайым иманлы, дайым уьмитли эм баьри затка шыдамлы болады.

⁸Суьювдинъ оьмири кесилмес. Ама пайхамбарлыклар йойылаяклар, тиллер тынаяклар, билим де йокка шыгаяк.

⁹Неге десе билимлеримиз де, пайхамбарлыгымыз да толы тувыллар.

¹⁰Ама тамамына етискен зат келген заманда толы болмаганлар йогалаяклар.

¹¹Бала заманымда, балаша соьйлейтаган эдим, баладай анълайтаган, баладай ойлайтаган эдим. Ама уьйкен болганда, мен бала шагымдагы затларымды койдым.

¹²Энди де баьри затты, ез биялада коьргендей, куьнъирт коьремиз, ама бир куьн Аллады бет бетке коьрермиз. Мен соьле Аллады толы билмеймен, ама бир куьн, Ол мени толы билгендей, мен де Оны толы билеекпен.

¹³Мине оьмирликке тураяк уьш зат: иман, уьмит эм суьюв; ама солардынъ энъ маьнелиси — суьюв.