Read Nogai 1 Коринтшилер 16 Bible Online

1 Коринтшилер 16 - Nogai bible

1 Коринтшилер 16

¹Энди имандасларынъызга йыйылатаган акша акында. Мен Галатиядагы ямагатларга не буйырган болсам, соны сиз де этинъиз.

²Мен келген заманда акша йыюв ман каьр шекпес уьшин, аьр киминъиз юмадынъ биринши куьнинде[12] алган куллык акына коьре уьйде не кадер калдырмага амалы болса, соны калдырсын.

³Келгенимде, аранъыздан оьзинъиз айырганларды ярдам акшанъызды аькетер уьшин хатлар ман Ерусалимге йиберермен.

⁴Эгер меним де барганым келиссе, олар мени мен бирге барарлар.

⁵Македониядан оьткеннен сонъ, сизге келермен. Соьле мен Македониядан оьтип турыман.

⁶Сизде мен билким бир кесек заман каларман, эш те кысларман. Кетемен десем, сиз мени йолга аьзирлерсиз.

⁷Неге десе мен сизге йол уьстиннен кирип кетеекпен деп ойламайман: Раббий буйырса, сиз бен узак турмага уьмит этемен.

⁸Эфесте Эллинши куьн байрамына кадер каларман,

⁹неге десе онда мага етимисли ислер уьшин эсиклер кенъ ашылганлар, ама карсылык этуьвшилер де коьп.

¹⁰Тимотей келгенде, аранъыызда ол корккандай зат болмасын, сак болынъыз. Ол да, мендей, Раббийдинъ исин этеди.

¹¹Бирев де ога йогарыдан карамасын! Оны баьринъиз де йолга аьзирлеп, тынышлык пан озгарарсыз, ол мага кайтып келсин. Мен оны (иман) кардашларымыз бан бирге саклап тураман.

¹²Аполлос кардаш акында. Мен ога коьп ялбарып тиледим, баска (иман) кардашларымыз бан бирге сизге барганын суьйген эдим, ама онынъ соьледен соьле сизге бармага коьнъили йок. Бир онъайлы вакыт тапканлай, ол келер.

¹³Уяв турынъыз, иманынъызга берк болынъыз, йигит эм карувлы болынъыз!

¹⁴Эткен баьри затынъыз суьюв мен этилсин!

¹⁵Сизге бир тилегим бар, кардашлар: Степанастынъ уьйдегилерин билесинъиз. Олар Ахаяда биринши болып Масихке ынандылар эм оьзлерин имандасларына кызмет кылмага савлай бердилер.

¹⁶Сондай аьдемлерге эм бизи мен бирге ислеп кызмет кылганлардынъ баьрисине де бойсынганынъызды суьемен.

¹⁷Степанастынъ, Фортунаттынъ эм Ахайиктинъ мунда келгенлерине бек суьйинемен. Олар янымда болып, йоклыгынъызды муттырдылар.

¹⁸Коьнъилинъизди коьтергендей, олар меним де коьнъилимди коьтередилер. Сондай аьдемлерди баалап билинъиз!

¹⁹Асия элиндеги иман ямагатлары сизге салам йибередилер. Аквила ман (пишеси) Приска эм олардынъ уьйинде йыйылатаган ямагат та, Раббийге байыр болып, сизди исси саламлайдылар.

²⁰Мундагы баьри (иман) кардашларынъыз сизди саламлайдылар. Бир биринъизди, Аллага багысланганларга тийислише оьбип, саламланъыз.

²¹Энди оьзимнинъ колым ман язаман: Паулдан салам!

²²Раббийди суьймегенлер язаларын алсынлар! Марана та (Раббийимиз, кел)!

²³Раббий Исадынъ шапагаты сиз бен болсын!

²⁴Масих Исага байыр болып, баьринъизге суьйимимди билдиремен!