Read Nogai Галатияшылар 3 Bible Online

Галатияшылар 3 - Nogai bible

Галатияшылар 3

¹Ай, акылсыз галатияшылар! Ким сизди саарлады? Масих Исадынъ кашка керилгени коьзлеринъиз алдында ашылып коьргистилген эди, тувылма?

²Сизден тек сосы затты билгим келеди: сиз Таурат йорыгын толтырувынъыз бан Кие Рухты алдынъызба, яде эситкенлеринъизге ынанувынъыз бан ма? Сиз сондай акылсызсызба? Рухтан баслап, энди оьз куьшинъиз бен толтырмага куьресесизбе?

⁴Сол кадер коьп затларды тоьзгенинъиз босынама болды?

⁵Сизге Рухты беретаган, аранъызда аьжейиплерди этетаган Алла муны, Таурат йорыгын толтырганынъыз уьшин ме яде эситкенлеринъизге ынанганынъыз уьшин ме, этеди?

⁶(Кие Язувда айтылгандай): «Ибрагим Аллага ынанды, Алла да ынанганын туврашылыкка санады».

⁷Муннан сиз анъланъыз: Ибрагимнинъ акыйкат уллары — иманы болганлар.

⁸Кие Язувда Алла, Ибрагимге: «Сен аркалы баьри миллетлер разылыгымды табаяклар», — деп Ийги Хабарды билдирип, баска миллетлилерди иманы уьшин аклаягын алдыдан айтты.

⁹Соьйтип, иманлылар сенимли Ибрагим мен разылык табадылар.

¹⁰А йорыкты толтырувга таянганлар наьлет боладылар, неге десе язылган: «Таураттынъ китабында белгиленген аьр затты дайым толтырмаганнынъ аьр бирисине каргыс туьсеек».

¹¹Эш бирев де Алла алдында Таурат йорыгы ман акланмаягы белгили, неге десе (Кие Язувда айтылгандай) «туврашыл аьдем иманы ман акланып яшаяк».

¹²А сол йорык иманга негизленмейди. (Кие Язувда айтылгандай,) «ким йорыкты толтырады, сол оны ман яшар».

¹³Таурат йорыгы аькелген наьлетликтен Масих бизди азат этти, бизим орнымызга наьлетлевди Оьзине алды, неге десе (Кие Китапта) «Агашка асылган аьр ким — наьлет» деп язылган.

¹⁴Масих Иса муны, Ибрагимге берилген разылыкты Оьзи аркалы баска миллетлилерге яяр уьшин, этти. Соьйтип биз ваьде этилген Рухты иман аркалы алдык.

¹⁵Кардашларым, аьдемлердинъ ойлаганына коьре айтаман, эш бирев аьтте аьдем эткен антласувдынъ куьшин йоялмайды эм ога бир затты да косалмайды.

¹⁶Ама Алладынъ ваьделери Ибрагимге эм онынъ тувдыгына берилген эди. Алла, коьплердинъ акында айткандай, «тувдыкларынъа» деп айтпайды, ама тек биревдинъ акында айткандай: «тувдыгынъа» деп айтады, а сол — Масих.

¹⁷Меним айтатаганым бу: эртеден Алла ман беркитилген антласувдан доьрт юз отыз йылдан сонъ туьзилген Таурат, сол антласувдынъ куьшин йойдырып Алладынъ берген ваьдесин бузалмайды.

¹⁸Неге десе асабалык Тауратка негизленген болса, ол энди ваьдеге негизленмейди. Ама Алла асабалыкты Ибрагимге ваьдеси мен тапшырган.

¹⁹Солай болса, не уьшин Таурат йорыгы (яратылган)? Алла оны, куьнага туьскенимизди коьрсетер уьшин антласувына коскан. (Таурат,) ваьде этилген эм (Ибрагимнинъ) тувдыгы болган (Масих) келгенге дери (куьшин саклады); маьлеклер аркалы, орташылык этуьвши (Муса пайхамбардынъ) колы ман (халкка) тапшырылган.

²⁰Ама орташылык этуьвши келисуьвликтинъ эки ягы болган ерде керек. Алла бир ди де!

²¹Сога коьре Таурат йорыгы Алла эткен ваьделерине карсы болама? Эш болмас! Эгер яшавды береек йорык берилген болса, инсан, акыйкатлай, сол йорык пан акланар эди.

²²Кие Язувга коьре буьтин дуныя — куьналыктынъ есиринде, сога коьре Алладынъ ваьде эткени иманга негизленип, Иса Масихке сенген аьдемлерге берилеек.

²³Иман шагы келгенге дейим биз Таурат йорыгынынъ есиринде болып, иманнынъ ашылаяк заманына дейим сакланып турдык.

²⁴Биз иманымыз бан акланар уьшин, Таурат, балады мектепке аькелуьвши кулдай, бизди Масихке аькелди.

²⁵Ама энди иман шагы келгенде, биз тербиялавшы кулга бойсынган балаларга усамаймыз.

²⁶Неге десе баьринъиз де Иса Масихке сениминъиз бен Алладынъ уллары болдынъыз.

²⁷Баьринъиз де, сувда шомылдырылып[3] Масих пен бир болганда, янъы кийим кийгендей, Масихти коьнъилинъизге алдынъыз.

²⁸Энди ювыт пан грек, кул ман эркин, эр киси мен хатын арасында баскалык йок: баьринъиз де Масих Иса ман бирсиз.

²⁹Масихтики болсанъыз, сонда сиз Ибрагимнинъ тувдыгысынъыз эм Алла ваьде берген асабалыктан уьлисли боларсыз.