Read Nogai Галатияшылар 4 Bible Online

Галатияшылар 4 - Nogai bible

Галатияшылар 4

¹Кене де айтып озайым: асаба, баьри муьлк оныкы болса да, аьле бебейлигинде ол кулдан баскаланмайды.

²Атасы белгилеген заманга дейим, асаба тербиялавшыларга эм уьй ислерин юргистуьвшилерге бойсынады.

³Соьйтип биз де, рухымыздынъ бала шагында дуныядынъ баслапкы окувларына кул эдик.

⁴Ама Алла белгилеген вакыт еткенде, хатыннан тувган эм Таурат йорыгына байлы болып яшаган Улын йиберди.

⁵Алладынъ Улы, бизди, йорыкка байлы болып яшайтаганларды, эркин этип, Алладынъ уллары этпеге келди.

⁶Сиз Онынъ уллары болганынъыз уьшин, Алла, Оьз Улынынъ: «Абба![4] Ата!» — деп шакыратаган Рухын сизинъ юреклеринъизге салды.

⁷Сога коьре сиз энди куллар тувылсынъыз, улларысынъыз. Уллары болганнан сонъ, Алла ваьде бергенлердинъ асабаларысыз.

⁸Ама эртеден, Аллады танымаган заманынъызда, акыйкатлай алла болмаган затларга кызмет кылдынъыз.

⁹А энди, сиз Аллады таныйсыз, туврасын айтсам, Алла да сизди таныйды. Солай болса неге артынъызга карувсыз, пайдасыз баслапкы окувларга кайтасынъыз? Оларга янъыдан кул болмага суьесинъизбе?

¹⁰Сиз кайдай да бир куьнлерди, айларды, йылларды эм байрамларды да белгилейсинъиз!

¹¹Сизге кылган кызметим бос кеттиме экен деп, кайгыраман.

¹²Кардашларым, сизден тилеймен, мендей болынъыз, неге десе мен де сиздей болдым. Мага сиз эш бир яман зат этпединъиз.

¹³Билесинъиз, сизде биринши кере болганымда, авырувым Ийги Хабарды сизге билдируьвге амал берди.

¹⁴Меним денимнинъ сыпаты, сизди кыйнаган болса да, сизди шийкендирмеди, меннен шет кактырмады. Сиз мени, Алладынъ маьлегиндей, Иса Масихтинъ Оьзиндей, макул эттинъиз.

¹⁵Сизинъ куванышынъыз кайда кетти? Сизинъ уьшин оьзим шаатлык этейим: эгер дейим амал болган болса, сиз аьле коьзлеринъизди кармап алып мага бермеге аьзир эдинъиз.

¹⁶Аьше суьйткенде, сизге акыйкатты айтып, мен сизинъ душпанынъыз болдымма?

¹⁷Сол аьдемлер сизге бир хыйлы эс бередилер, тек бу ийгиликке тувыл: олар сизди (бизден) айырып, оьзлерине эс бердирмеге суьедилер.

¹⁸Аьруьв эди, эгер дейим олар, тек мен сиз бен бирге болганда тувыл, алал ниет пен сизге дайым да эс берселер.

¹⁹Балаларым, Масих сизде кепленгенге дейим, мен кыйынлыкта сизди тагы янъыдан дуныяга эндиремен!

²⁰Соьле сизинъ аранъызда болып, давысымды туьрлендирип соьйлемеге суьер эдим. Сиз мени бек сейирсиндирдинъиз.

²¹Таурат йорыгына байлы болып яшамага суьйгенлер, айтынъыз мага, Таураттынъ не зат айтатаганын билмейсизбе?

²²Онда, Ибрагимнинъ эки улы болган, бири — кул хатыннан, экиншиси — эркин хатыннан тувган деп, язылган.

²³Кул хатыннан бала, дуныяга бала кайтип энетаган болса, соьйтип тувган, а эркин хатыннан болган бала Алладынъ ваьдеси бойынша тувган бала болады.

²⁴Мунынъ терен маьнеси бар: бу хатынлар — эки антласувдынъ белгиси боладылар. Бири Синай тавыннан болып, кул болаяк балаларды табатаган, ол — Хаджар.

²⁵Хаджар Арабистандагы Синай тавына эм аьлиги Ерусалимге келиседи, неге десе ол балалары ман бирге кул болып яшайды.

²⁶Ама коьктеги Ерусалим эркин, бизим анамыз — ол.

²⁷Кие Язувда айтылгандай: «Суьйин, бала таппаган, каратон хатын! Бала табув азабын билмеген хатын, давысынъды коьтер эм суьйингенинъди кышкырып билдир. Неге десе эри таслаган ялгыз хатыннынъ балалары эри болгандыкыннан коьбирек».

²⁸Сиз кардашлар, Исхактай, Алла ваьдесининъ балаларысынъыз.

²⁹Тек эрте замандагындай, баьри баска балалардай тувган бала Рух куьши мен тувганды кайтип кувган болса, сол зат соьле де болады.

³⁰Ама Кие Язувда не зат айтылады? «Кул хатынды эм онынъ улын кувып шыгар, неге десе кулдынъ улы эркин хатыннынъ улы ман бирге асаба болмаяк».

³¹Сога коьре, кардашлар, биз кул хатыннынъ тувыл, а эркин хатыннынъ балаларымыз.