Read Nogai Галатияшылар 6 Bible Online

Галатияшылар 6 - Nogai bible

Галатияшылар 6

¹Кардашлар, эгер дейим кимди болса да биревди куьна этип турганда тутсалар, сиз, Рухы болган аьдемлер, оны юваслык пан туьзетпеге керексинъиз. Сиз де туьз йолдан таймас уьшин оьзинъизге сак болынъыз.

²Бир биринъизге авыр юклеринъизди коьтермеге ярдамласынъыз, соьйтип Масих йорыгын толтырарсынъыз.

³Эгер дейим бирев оьзининъ бир заты болмаса да оьзин бир затка санаса, ол оьзин оьзи алдайды.

⁴Суьйткенде, аьр ким оьзининъ исин тергесин, сол заманда ол баскалардыкы ман тувыл да тек оьзининъ етимислери мен оьктемсир,

⁵неге десе аьр ким оьзининъ яваплы югин оьзи коьтермеге тийисли.

⁶Алладынъ соьзи мен насихатланган аьдем аьр туьрли яхшы затын насихатшылары ман боьлиссин.

⁷Янъылманъыз: Аллады алдамага амал йок. Аьдем не шашса, соны орар.

⁸Оьзининъ инсан кылыгына ярар уьшин шашув шашкан, сол кылыгыннан каза табар. Рухка ярар уьшин шашкан, Рухтан оьмирлик яшав алар.

⁹Ийгилик этпеге арымайык, безбей турсак, заман келгенде аслыкты орармыз.

¹⁰Сонынъ уьшин, мырсатымыз болса, баьрисине де, боьтен де иманлыларга, ийгилик этеек.

¹¹Каранъыз, сизге оьзимнинъ колым ман сосы уьйкен аьриплерди язаман!

¹²Аьдемлерге яраяк болганлар сизди суьннетленмеге зорлайдылар, неге десе оьзлери Масихтинъ кашы уьшин кувгынга туьспеге унамайдылар.

¹³Ама суьннетленгенлер де Тауратты толтырмайдылар, сизди бабага олтыртып, денинъизге эткенлери мен мактанмага суьедилер.

¹⁴Мен Раббийим Иса Масихтинъ кашыннан баска эш бир зат пан мактанмага суьймеймен. Сол каш пан бу дуныя меним уьшин, мен де бу дуныя уьшин оьлгенмен.

¹⁵Сенинъ суьннетинъ барма яде йокпа — ол маьнели тувыл. Маьнелиси — (Алла ман) янъы яратылган болувынъ.

¹⁶Тынышлык эм рагимлик сол йорыкка ызлаганларга, Алладынъ Исраилине!

¹⁷Мен тенимде Исадынъ яра белгилерин юргистемен, соны уьшин мага бирев де арбатын кыйынлык тувдырмасын.

¹⁸Кардашларым, Раббийимиз Иса Масихтинъ шапагаты сизинъ рухынъыз бан болсын. Амин.