Read Nogai Колосшылар 3 Bible Online

Колосшылар 3 - Nogai bible

Колосшылар 3

¹Соьйтип, Алла сизди Масих пен бирге оьлилерден тирилткен болса, коьктеги затларга ымтылынъыз.

²Ердеги затлар акында тувыл, коьктеги затлар акында ойланъыз.

³Неге десе сиз оьлгендей эдинъиз, а энди яшавынъыз Масих пен бирге Аллада тасаланып турады.

⁴Масих — яшавынъыз, Ол коьринген заманда, сиз де Оны ман бирге данък пан коьринеексиз.

⁵Сол себептен бу дуныядагы кылыкларынъызды: каьхпеликти, арамлыкты, куьсевди, яман ымтылувларды эм бутларга табынувдан бир баскалыгы болмаган ашкоьзликти оьлтиринъиз.

⁶Бойсынмаганларга бу баьри затлар Алла азабын келтирер.

⁷Бир заманларда сиз де, сондайлардынъ ишинде яшап, сол йоллар ман юрдинъиз.

⁸А энди каарлык, ашув, кара ниет, яманлав, авызынъыздан эдапсыз соьзлер шыгарув — баьрисин де артка тасланъыз.

⁹Бир биринъизге оьтирик айтпанъыз, неге десе сиз оьзинъизден, эски кийиминъизди таслагандай, эски аьдемлигинъизди баьри ислери мен бирге алып тасладынъыз

¹⁰эм янъы аьдемликти кийдинъиз. Алла яраткан сол аьдемликти, Ога усасын эм толы билимге етсин деп, янъыртып турады.

¹¹Бу янъырувда грек те, ювыт та, суьннетли де, суьннетсиз де, варвар[3] да, скиф те, кул да, азат та йок. Тек Масих бар: Ол — баьри зат эм Ол — баьринде!

¹²Суьйткенде, сиз, Алладынъ сайлаганлары, Ога багысланганлар, Онынъ суьйген аьдемлери болганнан себеп, янъы кийим кийгендей, юмсак юрекли, танъ, сабыр, ювас эм шыдамлы болынъыз.

¹³Бир биринъизге тоьзимли болынъыз, биринъиздинъ баскасына оьпкелеринъиз бар болса, кеширинъиз. Раббий сизди калай кеширген болса, сиз де солай кеширинъиз!

¹⁴Олардынъ баьрисининъ уьстине суьйимди косынъыз, неге десе толы бирлесуьвди байлаган — суьйим.

¹⁵Масихтинъ тынышлыгы юреклеринъизде оькимши болсын. Алла сизди бир шарк этип, бу тынышлыкка шакырды. Шуькир этуьвшилер болынъыз!

¹⁶Масихтинъ соьзи оьз байлыгы ман дайым да сизде яшасын. Бир биринъизди толы акыллылык пан уьйретип, насихатланъыз, Аллага юрек разылыгынъыз бан Забурдан уьзиклер эм мактав зикирлер, Кие Рух пан коьнъилленген йырлар йырланъыз.

¹⁷Баьри эткен затларынъыз — соьзлеринъиз де, ислеринъиз де — Раббий Исадынъ аты ман этилсин. Ол аркалы Атамыз Аллага шуькир этинъиз.

¹⁸Бийкелер, эрлеринъизге бойсынынъыз. Ол — Раббийдинъ алдында борышынъыз.

¹⁹Эрлер, бийкелеринъизди суьйинъиз эм оларга каты болманъыз.

²⁰Балалар, ата-аналарынъызга тынъланъыз, неге десе бу Раббийди суьйиндиреди.

²¹Аталар, балаларынъызды корламанъыз — йигерсиз боларлар.

²²Куллар, аьр ягыннан да дуныядагы иелеринъизге тынъланъыз. Ырыядай, коьзге коьринер уьшин тувыл, Раббийден коркып, таза юректен кызмет этинъиз.

²³Не зат этсенъиз де аьдемлерге тувыл да, а Раббийге ислегендей, ян-юрегинъиз бен шалысынъыз.

²⁴Сиз билесиз, Раббийден Оьз халкына саклаган савгады алаяксыз. Сизинъ Иенъиз — Масих, сиз Ога кызмет кыласыз.

²⁵А ким яманлык этсе, сол кадер де ол яманлыкка йолыктырылаяк. Алладынъ алдында баьриси де бирдей.