Read Nogai 1 Салоникшилер 4 Bible Online

1 Салоникшилер 4 - Nogai bible

1 Салоникшилер 4

¹Кардашлар, Аллады разы этер уьшин, калай яшамага керегин сиз бизден уьйрендинъиз. Сиз де солай яшайсыз. Ахырында бу исте тагы да бек етимисли болынъыз деп, Раббий Исадынъ аты ман ялбарып тилеймиз.

²Раббий Исадынъ кайдай насихатларын сизге бергенимизди билесиз.

³Алла Оьзине багысланганынъызды, каьхпеликтен эрек турганынъызды талаплайды.

⁴Аьр киминъиз де оьзининъ тенин Аллага багыслап, намыслыкта ыслап уьйренсин,

⁵Аллады билмеген баска миллетлилердей, уятсыз куьсевлерге берилмесин.

⁶Бу затта бир аьдем оьзининъ (иман) кардашына яманлык этпесин, сеними мен ойнамасын. Биз сизге алдын беркитип айткандай, сондай куьналар уьшин аьдемге Раббийден оьким шыгаяк.

⁷Алла бизди арамлыкка тувыл, Ога багысланган яшавга шакырган.

⁸Соны ман ким (Алла насихатларын) шет какса, сол тек инсанды тувыл, а Кие Рухын сизге беруьвши Алладынъ Оьзин шет кагады.

⁹Энди сизге (иман) кардашларынъызды суьюв акында язбага керек тувыл, сизди Алла Оьзи бир биринъизди суьймеге уьйретти.

¹⁰Уьшини мен сиз буьтин Македониядагы баьри кардашларынъызды суьесиз. Тек, кардашлар, бу исте тагы да етимисли болынъыз деп, ялбарамыз.

¹¹Алдын айтканымыздай, тыныш болып оьз исинъиз бен каьр шегинъиз, оьз колларынъыз бан куллык этпеге куьресинъиз.

¹²Соьйтип, бир затка да заьр болмай, баскалардынъ алдында аьдепли яшарсыз.

¹³Кардашлар! Уьмитлерин уьзген баска инсанлардай, кайгырманъыз деп, оьлгенлер[2] акында билимсизликте калганынъызды суьймеймен.

¹⁴Биз Исадынъ оьлгенине эм оьлилерден тирилгенине ынанамыз. Соьйтип, Исага ынанып оьлгенлерди Алла Оны ман бирге артына аькелеек.

¹⁵Биз сизге айтаяк соьзлеримиз — Раббийимиздинъ соьзлери. Биз тирилер, Раббий келгенге дейим сав калганлар, оьлгенлердинъ алдына шыкпаякпыз.

¹⁶Раббий Оьзи шакырув авазы ман, бас маьлектинъ авазы эм Алладынъ зурнасынынъ давысы ман коьктен туьсеек эм Масихке ынанып оьлгенлер биринши болып тирилееклер.

¹⁷Оннан сонъ биз де, сав калганлар, олар ман бирге Раббийге авада, булытларда йолыгар уьшин ерден коьтерилеекпиз. Соны ман дайым Раббий мен бирге болаякпыз.

¹⁸Соьйтип, бир биринъизди сол соьзлер мен коьнъиллендиринъиз.