Read Nogai 1 Салоникшилер 5 Bible Online

1 Салоникшилер 5 - Nogai bible

1 Салоникшилер 5

¹Кардашлар, (бу затлардынъ болаяк) заманы эм болжалы акында язбага кереги йок.

²Сиз оьзинъиз бек яхшы билесиз: Раббийдинъ (кайтар) куьни, кеше уры келгендей болып, анъсыздан келеек.

³Аьдемлер «тынышлык эм коркынышсызлык» деп айтканда, анъсыздан, авыраяклы хатын бирден толгатып баслагандай, оларга каза келеек, оьлимнен кашып кутылалмаяклар.

⁴Тек сиз, кардашлар, каранъылыкта тувылсыз, сонынъ уьшин сол куьн сизге, урыдай, анъсыздан келмеек.

⁵Сиз баьринъиз де ярык пан куьннинъ улларысынъыз. Сизинъ кеше яде каранъалык пан ортак бир затынъыз да йок.

⁶Сонынъ уьшин, баскалар эткендей, биз уйкламаймыз. Эсирмей, уявлы болып турамыз.

⁷Неге десе уйклайтаганлар кеше уйклайдылар, ишкишиликте юретаганлар да кеше эсиредилер.

⁸Ама биз ярык куьндики болганымыз уьшин, иманымызда эм суьювимизде куьбеге каплангандай каты турып, басымызга тувылга кийгендей, куткарылувга уьмитимиз бен коршаланып, эсирмей турамыз.

⁹Неге десе Алла бизди ашувына йолыктырар уьшин тувыл, Раббийимиз Иса Масих аркалы куткарылув алар уьшин белгилеген.

¹⁰(Ол келген заманда) яшайтаган болсак та, оьлген болсак та, биз Оны ман бирге яшаяк деп, Ол бизим уьшин янын берген.

¹¹Сонынъ уьшин, сиз этетаганынъызша, бир биринъизди коьнъиллендиринъиз эм (иман ягыннан) беркитинъиз.

¹²Кардашлар, сизге меним тилегим: аранъызда куллык эткенлердинъ, Раббийдинъ йолында ямагатынъыздынъ басшыларынынъ эм сизди насихатлаганлардынъ баасын билинъиз.

¹³Оларды суьйинъиз эм юргисткен ислери уьшин айлак бек сыйланъыз. Бир биринъиз бен татымлыкта яшанъыз.

¹⁴Кардашлар, ялбарып сизден тилеймиз: ислемеге суьймегенлерге кыйынлыкка туьсуьвин анълатынъыз; йигерсизлерди коьнъиллендиринъиз; карувсызларга ярдам этинъиз; баьрисине де шыдамлы болынъыз.

¹⁵Эш бирев де яманлыкка яманлык пан тоьлемесин, тек бир биринъизге эм баьрисине де дайым да ийгилик этпеге куьресинъиз.

¹⁶Дайым да суьйининъиз.

¹⁷Токтамай дува этинъиз.

¹⁸Кайдай аьлге туьссенъиз де Аллага шуькир этинъиз, неге десе сиз Иса Масихке байыр болсанъыз, Алла сизден соны тилейди.

¹⁹Кие Рухтынъ отын соьндирменъиз.

²⁰Пайхамбарлык соьзлерди кемситпенъиз,

²¹ама баьри затты тергенъиз, яхшысын тутынъыз.

²²Аьр туьрли яманлыктан шет кагылынъыз.

²³Тынышлык беруьвши Алла Оьзи Ога толысынша багысланувынъызга амал болсын. Рухынъыз, янынъыз, тенинъиз Раббийимиз Иса Масих келеек заманга минсиз, таза болар уьшин коршалансын.

²⁴Сизди шакырган (Алла) — сенимли, Ол муны этеек.

²⁵Кардашлар, бизим уьшин дува этинъиз.

²⁶Баьри иман кардашларынъызды, Аллага багысланганларга тийислисинше оьбип, саламланъыз.

²⁷Раббий алдында тилеймен: сосы хатты баьри (иман) кардашларынъызга окынъыз!

²⁸Сизи мен дайым да Раббийимиз Иса Масихтинъ шапагаты болсын.