Read Nogai Тит 2 Bible Online

Тит 2 - Nogai bible

Тит 2

¹Ама сен дурыс уьйретуьвге келисли болганды анълат:

²Карт кисилер айык, тебентели, туьз акыллы, иманында, суьювинде, тоьзимлигинде берк болсынлар.

³Карт кыскаяклылар болсалар Аллады оьрметлейтаганларга тийисли болганын кийсинлер; соьз юргистуьвши болмасынлар, ишкишиликке карыспасынлар, ийгиликке уьйретсинлер.

⁴Алла соьзи яманланмас уьшин, яс хатынларга эсли болып, эрлерин яратувды, балаларын суьювди,

⁵туьз акыллы, танъ, уьйине яныплы, хайырлы эм оьз эрлерине бойсынувшы болувды коьрсетсинлер.

⁶Яс кисилерге де солай ок аьр исте туьз акыллы болувды насихатла.

⁷Оьзинъ де, ийгиликлер этип, оларга уьлги бол. Окытувшылыгынъда аьдилликти эм тебентеликти коьрсет.

⁸Карсы турганлар бизге бир яман соьз де айталмастай, уялткандай этип, бирев де шуьшлеп болмастай, дурыс соьзлер соьйле.

⁹Куллар да, аьр исинде иелерине бойсынувшы болсынлар, олардынъ коьнъиллерине етпеге шалыссынлар. Терисиннен явапламай,

¹⁰урламай, буьтинлей сенимли аьдемлер болганларын коьрсетсинлер деп, уьйрет. Солай этселер, Куткарувшымыз Алладынъ окувы аьр ягыннан калай аьлемет экенин коьрсетерлер.

¹¹Неге десе куткарувды беруьвши Алла шапагаты баьри аьдемлерге де ашылды.

¹²Бу шапагат бизди, алласызлыктан эм дуныядынъ (айыплы) куьсевлериннен кери таювга, оьзимизди ыслап билуьвге эм бу оьмирде ойлы-эсли, туврашыл эм Алладынъ йолына келисли яшавга уьйретеди.

¹³Сол вакытта, муьбарек уьмитимиздинъ толувын, уллы Алла эм Куткарувшымыз Иса Масихтинъ данък ишинде келуьвин саклаймыз.

¹⁴Масих, бизди аьр туьрли куьнадан куткарып эм тазалап, Оьзине байыр, яхшылык этип шалыскан халк кеплестирер уьшин, Оьзин курман этти.

¹⁵Булардынъ баьрисин каныгыслы билдир, тынълаганларды анъламага шакыр, насихатлап, тувра йолга сал. Сага эш бирев де мисетсинмей карамасын.