Read Nogai 2 Яхъя 1 Bible Online

2 Яхъя 1 - Nogai bible

2 Яхъя 1

¹Ямагаттынъ тамадасыннан Алла сайлап алган эм мен акыйкатлай суьйген ханбийкеге эм онынъ балаларына[1] салам! Ялгыз мен болмай, белки, акыйкатты таныганлардынъ баьриси де сизди суьедилер,

²неге десе акыйкат ишимизде яшайды эм де оьмирлер бойында бизи мен калаяк.

³Атамыз Алладан эм Онынъ Улы Иса Масихтен шапагат, рагимлик эм тынышлык сизи мен бирге болсын.

⁴Мен балаларынънынъ арасында, биз Атадан алган парызымызга бойсынып, акыйкатлыктынъ йолында юретаганларды тапканда бек кувандым.

⁵Соьле де тилеймен сеннен, ханбийкем, бир биримизди суьеек. Сага янъы парыз этип бермей, ама сол басыннан алып бизге белгили болган затты язаман.

⁶Суьюв болса биз Алладынъ парызлары бойынша яшаганымыздан шыгады. Мине сол сиз басыннан алып эситкен парыз — калай яшамага кереги акындагы парыз.

⁷Неге десе дуныяга, Иса Масих инсан шаркында келгенин кабыл этпеген коьп алдавшылар дуныядынъ ер ерине яйылганлар. Ондайлар — шынты алдавшылар эм Масихтинъ душпанлары.

⁸Бизим (Алла йолында) кызмет кылып тапканымызды йоймай кыйын акынъызды толысынша алар уьшин сак болынъыз.

⁹Масихтинъ уьйретуьвин бузган эм ога ызламаган аьдемде Алла йок. Масихтинъ уьйретуьви мен яшаганда Атасы да, Улы да бар.

¹⁰Эгер Масихтинъ уьйретуьвин аькелмеген бирев сизге келсе, оны уьйинъизге ювытпанъыз, салам да берменъиз.

¹¹Неге десе сондай аьдем мен саламласкан онынъ яман ислеринде катнасады.

¹²Сизге язбага коьп затым бар эди, ама калем мен кагытты кулланмага суьймеймен. Куванышымыз толы болсын деп, коьзбе-коьз соьйлесермиз деп уьмит этемен.

¹³Алла сайлап алган аьптенънинъ балалары сага салам йибередилер.