Read Nogai Ашылув 21 Bible Online

Ашылув 21 - Nogai bible

Ашылув 21

¹Мен янъы коьк эм янъы ерди коьрдим. Алдынгы коьк пен ер йойылып кеткен эди, денъиз де энди йок эди.

²Мен кие шахарды, янъы Ерусалимди, коьрдим. Ол коьктен, Алладынъ алдыннан келе эди. Шахар, оьзининъ киевине аьзирленген келиндей, ярасыкланган эди.

³Тактан коьтеринки тавыс: «Мине Алладынъ меканы — аьдемлер арасында. Ол олардынъ арасында яшаяк. Олар Онынъ халкы болаяк, Алла Оьзи де олар ман бирге болып, Алласы болаяк.

⁴Олардынъ баьри коьзясларын суьртеек. Оьлим энди болмаяк, кайгы да, бакырык та, авырув да энди болмаяк, неге десе алдынгы баьри зат та кетти», — деди.

⁵Сол заманда такта Олтырган: «Мине, баьри затты янъы этемен!», а мага: «Яз, неге десе бу соьзлер сенимли эм акыйкат», — деди.

⁶Эм косты: «Аьр зат тамам! Мен — Альфа эм Омега, Басы эм Сонъыман. Сувсаганларды тоьлевсиз яшав шокырагыннан алынган сув ман савгаларман.

⁷Ким енъеди, сол бу затлардынъ асабасы болаяк. Мен ога Алла болаякпан, ол да Мага ул. Коркаклардынъ, сенимсизлердинъ, шийкендиргенлердинъ, аьдем оьлтируьвшилердинъ, каьхпеликке берилгенлердинъ, саьаршилердинъ, бутларга табынувшылардынъ эм баьри оьтирикшилердинъ бактысы — янып турган отлы, коькиртли коьл. Сол — экинши оьлим».

⁹Сонъгы ети баьле-казага толган ети аягы болган ети маьлектинъ бириси келди. Ол мени мен соьйлесип: «Кел булайга, мен сага Козыдынъ хатыны болаяк келинди коьрсетейим», — деди.

¹⁰Сонъ мени Рухтынъ бийлеви мен бир бийик, уьйкен тавга коьтерди эм коьктен, Алладынъ алдыннан туьсип келеятырган кие шахарды, Ерусалимди, коьрсетти.

¹¹Бу шахар Алладынъ данъкы ман яркырайды эм онынъ ярыгы, куьрт сиседей, ашык болган бек баалы яспис тасына усайды.

¹²Шахарды он эки капысы болган уьйкен, бийик ирге курсап алады. Он эки капыды он эки маьлек саклайды. Капыларга Исраил улларынынъ он эки ырувынынъ атлары язылган.

¹³Куьнтувардан — уьш капы, сырттан — уьш капы, кубыладан — уьш капы, куьнбатардан да уьш капы бар.

¹⁴Шахардынъ иргеси он эки негизге таянады эм аьр биринде Козыдынъ он эки элшисининъ бирер аты язылган.

¹⁵Мени мен соьйлеген маьлектинъ колында шахарды, онынъ капыларын, иргесин оьлшемеге алтын таягы бар эди.

¹⁶Шахар доьрткил болып, узыны ман эни бирдей эди. Маьлек шахарды таягы ман оьлшеди. Аьр бир ягы 12 000 стадия[18] болып шыкты. Узыны да, эни де, бийиклиги де бирдей.

¹⁷Маьлек шахардынъ иргесин де оьлшеди: ол кулланатаган аьдем оьлшеми мен 144 аршын[19] болып шыкты.

¹⁸Шахардынъ иргеси яспис тасыннан, оьзи болса ярык сисеге усаган таза алтыннан этилген эди.

¹⁹Иргединъ негизлери туьрли баалы таслар ман: биринши негиз — яспис, экиншиси — сапфир, уьшиншиси — халкидон, доьртиншиси — зубаржат,

²⁰бесиншиси — сардоникс, алтыншысы — сардис, етиншиси — хризолит, сегизиншиси — берил, тогызыншысы — топаз, оныншысы — хризопраз, он бириншиси — гиацинт, а он экиншиси — аметист пен ярасыкланган эдилер.

²¹Он эки капы — он эки ынжы. Аьр бир капы — бир сав ынжыдан. Шахардынъ уьйкен йолы — сиседей ашык таза алтыннан.

²²Шахарда Алла уьйин коьрмедим, неге десе шахардынъ табынув уьйи — буьтин дуныяды туткан Раббий Алла эм Козы.

²³Шахарга куьн мен айдынъ яркыраганы керек тувыл. Алла данъкы онынъ уьстинде яйнайды эм Козы — онынъ шырагы.

²⁴Миллетлер шахардынъ ярыгында юрееклер, дуныя патшалары оьзлерининъ данъкларын мунда аькелееклер.

²⁵Шахардынъ капылары куьндиз киртленмеек, неге десе онда туьн болмаяк.

²⁶Сосы шахарга миллетлердинъ данъкы эм оьрмети аькелинеек.

²⁷Эш бир арам зат, шийкендирген иске эм оьтирикке берилген эш бирев де сосы шахарга кирмеек, тек аты Козыдынъ яшав китабына язылганлар кирееклер.