Read Nomaande Mat 10 Bible Online

Mat 10 - Nomaande bible

Mat 10

¹Yésus ŋɔɔ́ lɔ́ŋɔ́kɔ́ bááyɛ́ *baákɔ́nɛ́na bɔ́ɔ́hátá ne béfendí, u ŋé beébe iínjíé makɛ́nda ne me ohémúkúnyi *bɛɛbɛ́ bí bililé ne me oweéŋúnyísíki na ɛkɔnɔ ikime na bɛnamɛ́tɛ́ bikime.

²Eénye cá *baacɔ bá ɛndɔ́ma eece aana : O otúme Símon awɔ́ bɔ́ ŋɔɔ́ lɔ́ŋɔ báyɛ Bíel, ne onyíinyí *Andɛlɛ́, na Sáak ne onyíinyí Sáaŋ, bífendí eébí bikime baáná bé Sebeté ;

³ne Fílib, na Baatelemí ; na Tɔ́mas na Matío *mutúé etéési ; na Sáak ɔɔ́nɔ́ u Alafɛ, na Tatɛ́ ;

⁴ne Símon, Muléne ɔkátɔ́na bunɔŋɔ bú *Islayɛ́l ; na Yútas Iskaliót awɔ́ u ŋaá bɛ́cáŋa mufiimbie Yésus.

⁵Yésus ŋaá tɔ́mɔ́kɔ́ná *baákɔ́nɛ́na eébé bɔ́ɔ́hátá ne béfendí a masɔ́ma, yó beébe oónyísíkínyi ne mehúnyi eeme ɔsɛ : « Nuti súétéke i iisí cɛ́ baacɔ a bá tɛ ábɔ́ bá *Besuif ; nuti oofókíne a bálɛ́ka cí iisí cɛ *Samalí,

⁶mbá ánɔ cɔbáka yáaŋa né ciíbe cɛ baacɔ ci *Islayɛ́l. Bá bɔ́ŋa háyɛ baáná bá ɛtɔ́mbá e bé ŋe bú nyímúkúne.

⁷Ánɔ cɔcɔ́báka, nu húlé láakɛna baacɔ nɔsɛ : “Bandɔ́mɛsɛ́ a yáaŋa o otéŋínyi baacɔ.”

⁸Énu húlé ééŋúnyísíki bɔkɔnɔ́kɔ́nɔ, nu heenyiki baacɔ o owé, nu ééŋúnyísíki beénuúnu, nu hémúkúnyi *bɛɛbɛ́ bí bililé a baacɔ. A asana ayɛ́ nu tɛ ɔ́mɔ nɔ ɔɔ́ndɔ́kɔ makɛ́nda eémé, ánɔ ɔ́ɔ́lɔ́kɔ baacɔ, nuti beébe batá bɔkɔ.

⁹Nɔtɛ hákɛ́na ta mɔɔnyɛ́ me kóolo, te eléŋú yɛ́ mɔɔnyɛ́, te tuléŋúléŋú tú etémbí aanɔ́ a bɛmbalá ;

¹⁰ekúlú eyí nú ŋe nú súéte, nuti hiite ta ambalá, mbá te otúmbe ; nɔtɛ laŋába bɛháŋá namuaná bífendí, ta bɛkandɛ́na. Yááŋa anyía, munyiɔnɔ ŋá nyɛmána mu ɔnɔhɔkɛna a búáyɛ́ buólí.

¹¹Ekúlú ekime ayɛ́ nu ká ká nɔ́ háma a bálɛ́ka a cɛmɔtɛ́ ta anyía a bunɔŋɔ a bumɔtɛ́, ánɔ aambáka ɔɔcɔ a wáŋa wu ɔ banɔ́ káha ; núénú wuúci bɔ́ŋɔ, énu limékíne nááyá ɔ ɔkɔɔ́háma ahá nu ká nɔ́ hátɔna.

¹²Ekúlú ekime eyí nu ké ke nú óófine eé ciíbe a cɛ́mɔtɛ́, ánɔ kɔɔ́na nɔsɛ : “Mbuumu á bá na banɔ́ʼo.”[39]

¹³Mbɔ́kɔ baacɔ bé ciíbe eécí ŋá bɔ́ banɔ́ káha bɔmbányɛ, cianɔ́ mbuumu káá bá ne beébe ; mbá mbɔ́kɔ bé ŋé bú kíne ɔ banɔ́ káha bɔmbányɛ, cianɔ́ mbuumu káá banɔ́ hálɔ́mɔ́nɛ́na.

¹⁴Mbɔ́kɔ eé ciíbe a cɛmɔtɛ́ ta anyía a bálɛ́ka a cɛmɔtɛ́ baacɔ ŋé bú kíne ɔ banɔ́ káha bɔmbányɛ, ta anyía bé ŋé bú kíne ɔlɔ́kɔ́ma úúnú ɔtáŋa, ánɔ hatɔ́na hɔ́á, mbá nu bíkítéke ofunú ɔ́ cáánɔ́ akɔlɔ́.[40]

¹⁵Ɛ ŋaá mɛ banɔ́ láana aá taaká isíʼo : A buɔ́sɛ́ bɔ́ nyɛkála, baacɔ bá bálɛ́ka eécí ká bɔ́ lɔ́kɔ́máka muuyé buéŋí ɔ ɔhɔla muuyé amɔ́ baacɔ bá bálɛ́ka cɛ́ na *Sɔ́tɔm na Kɔmɔ́ɔlɛ[41] ká bɔ́ lɔ́kɔ́máka. »

¹⁶« Ɛ́ná, ɛ́ ma mɛ́ banɔ́ tɔ́mɔ́kɔ́na ; nua nɔ́ŋa háyɛ baáná bá ɛtɔ́mbá haála ahá ɛbála áŋa. Ɛ́ɛhɛ́ ánɔ bámɔ́kɔ́na aná ne injiŋé a bɛɛtɔ́ i iŋetí cɛ mɔɔ́hɔ, banɔ́ tɛ́ka na hɛkɔma hɛ́ ɔ banɔ́ túme i iŋetí ci tubúbé.

¹⁷Énu bíkékényíki buéŋí na baacɔ ; bá ká bɔ́ banɔ́ cɔ́bakana eé buúse bú bekélísi bɛsana, bá banɔ́ súbéke a *bɛndaŋía bɛ́ ɔbɛ́cɔ́kɔ́lɛ́na bí *Besuif.

¹⁸Bá káá banɔ́ télímíkínyi a akála eé buúse bú betéŋí bá baacɔ ne e betíkítíki na a *baáŋá áyá aámɛ a asana, ananyía nuanɔ́ hakɛ́na ɛmbasɔ́ ne eébú eé buúse ne eé buúse bɔ́ baacɔ a bá tɛ ábɔ́ bá Besuif.

¹⁹Ekúlú ayɛ́ bá káá banɔ́ cɔ́bakana eé buúse bú bekélísi bɛsana, nɔtɛ áákɛ́na ta bɔkɔ á nyɛbɛ́káma anyɛ́ nu ká nɔ́ bɛ́kámáka, mbá ta nyɛnamá nyɛ́ ɔbɛ́kála anyɛ́ nu ká nɔ́ bɛ́káláka. Yááŋa anyía, Bandɔ́mɛsɛ́ káá banɔ́ íínjíékíne mehúnyi ma ɔkɔɔnaka a yaátɛ́ ekúlú eéyé.

²⁰Tɛ́ cáŋa banɔ́ nu ké nú hémúkúnyi mehúnyi eémé, mbá Elilé yɛ́ cianɔ́ Síkíne yɛ́ káá banɔ́ íínjíékíne makɛ́nda ma ɔtáŋáka.

²¹Baacɔ ɔ bɔ́mɔtɛ́ ké bú íínjíékíne mahɛ́ndɛ́ a baacɔ anyía bé beébe ɔ́ɔ́nɔ́kɛ́na báábɔ́ benyíinyí bá bɛ́muátá. Híáná síkíne ká bɔ́ kɛ́laka báábɔ́ baáná. Baáná ké bú núúsiki bíábɔ́ bibíényi, bó ko wíínjíékíne mahɛ́ndɛ́ a baacɔ anyía bé ke bú beébe ɔ́ɔ́nɔ́kɛ́na.

²²Baacɔ bekime ká bɔ́ banɔ́ líŋekine a asana na nyiámɛ nyiínyi. Mbá asana ɔ́mɔtɛ́, ɔɔcɔ ewú u kéé yééhíkínyínyi muuyé ɔ ɔkɔɔ́háma a nyɛmana nyí úúyé olíhe, wuúci u kɔ́ɔ́ nɔ́hɔ.

²³Ekúlú ayɛ́ bá káá banɔ́ tékeseke a bálɛ́ka a cɛ́mɔtɛ́, ánɔ cábákɛ́na a bálɛ́ka ci etémbí. Ɛ ŋaá mɛ banɔ́ láana aá taaká isíʼo : Ɔɔ́nɔ́ u ɔɔcɔ káá fáaya ɛ́cɛ nu tɛ ŋá nɔ́ mána o húlé kanda a bálɛ́ka ikime cí *Islayɛ́l.

²⁴Muákɔ́nɛ́na ta mumɔtɛ́ tɛ ŋáá hɔ́la muayɛ́ muékúnyi ; munyiɔnɔ ta mumɔtɛ́ tɛ ŋáá hɔ́la ciayɛ́ síkíne ci buólí.

²⁵Bú ŋá nyɛmána yáaŋa anyía *muákɔ́nɛ́na á háma bɔkɔ búmɔtɛ́ háyɛ muayɛ́ muékúnyi ; munyiɔnɔ tɔ́na múɔ háma bɔkɔ búmɔtɛ́ háyɛ ciayɛ́ síkíne ci buólí. Mbɔ́kɔ bé ŋe yíínjie mutéŋínyi ciíbe cɛ baacɔ nyiínyi anyía Bɛlɛsɛbúl[42], mbá anyána aná na baacɔ bá ciayɛ́ ciíbe cɛ baacɔ e ? »

²⁶« Nuti beébe líkíméke aná, anyía bɛsana bikime a bɛ́áŋa bɛnambákánɔ́, baacɔ ké bú biíbi lɛcaka ; bikime a bɛ́áŋa indiitie, bé kéé biíbi menyukune.

²⁷Aáná bɛsana bikime abɛ́ ɛ ŋaá mɛ banɔ́ bɛ́nyɔ́ŋɛ́na nebutúé, énu biíbi kɔɔnáka nabuɔ́sɛ́ ; híáná bɛsana bikime abɛ́ bá ŋaá banɔ́ láana ɛmbásɛmbásɛ, énu biíbi kɔɔnáka okelú ɔ ɔmuaná a tɔháatɛ́.

²⁸Nuti líkíméke baacɔ a bá ŋa bɔ́ ɔ́ɔ́nɔ hú cɛɛ́tɔ bímuócí, mbá beébe tɛ́ka na makɛ́nda ma ɔwɔɔ́nɔ hɛtányɛ́ ; mbá énu líkíméke yáaŋa Bandɔ́mɛsɛ́ ; wuúci wáŋa wu ɔwɔɔ́nɔ́kɔ na cɛɛ́tɔ na hɛtányɛ́ bikime bífendí a nɔɔfia nú oocó.

²⁹Bá náŋa bé túéke tulíondío túfendí a tɔ́la ɛ́mɔtɛ́. Ta híáná, hilíondío hɛ́mɔtɛ́ tɛ ŋáá kua ɔ ɔmɛsɛ́, cianɔ́ Síkíne Bandɔ́mɛsɛ́ tɛ́ka o olumitine anyía hɛ́ a kua ɔ ɔmɛsɛ́.

³⁰Mbá aá banɔ́, túánɔ́ tuhúnyi a bɛɛtɔ́ áŋa tɔfanákánɔ́ tukime.

³¹Nuti líkíméke aná ! Bandɔ́mɛsɛ́ ŋaá banɔ́ léne buéŋí ɔ ɔhɔla tulíondío tukime.

³²Ɛ́ɛhɛ́ ɔɔcɔ okime awɔ́ u ŋa kɔ́ɔna eé buúse bɔ́ baacɔ anyía wáŋa uumi, yaŋɔ́ tɔ́na ɛ ká mɛ kɔɔna eé buúse bɔ́ ciamɛ Síkíne cɛ Ɔmuaná anyía ɔɔcɔ oócí áŋa uumi.

³³Mbá ɔɔcɔ okime ewú u ŋe mí bínéŋítínyi eé buúse bɔ́ baacɔ, yaŋɔ́ tɔ́na i ké mi wuúci bínéŋítínyi eé buúse bɔ́ ciamɛ Síkíne cɛ Ɔmuaná. »

³⁴« Yáakɛlá nu ŋe nú bíkéti anyía ɛ ŋá mɛ faáya ɔ ɔmɛsɛ́ anyía baacɔ ábɔ́ lɔ́kɔ́mákána. Eéʼeé, ɛ tɛ ɔ́mɔ faaya anyía baacɔ ábɔ́ lɔ́kɔ́mákána, mbá ɛ ŋa mɛ́ faáya anyía baacɔ ébú tíénéke.

³⁵Ɛ ŋa mɛ́ faáya o okowéélúnyi na ɔɔ́nɔ́ a wɔnɔ́mɔcɔ́ ne síkíne, na ɔɔ́nɔ́ e woónjú ne iinyí, ne oónyónó ne iinyíkíné.

³⁶Beliŋine bá ɔɔcɔ ká bɔ́ bámɔ́kɔ́nɛ́na baacɔ bá ciayɛ́ ciíbe cɛ baacɔ cɛ bɛ́muátá.

³⁷Mbɔ́kɔ ɔɔcɔ ti ŋé mi léne ɔ ɔhɔla nyɛnamá enyí u ŋeé léne ne síkíne ne iinyí, u tɛ á bá ooci awɔ́ á nyɛmána wu ɔbá uumi. Ɔɔcɔ ewú u kéé lénéke uuyé ɔɔ́nɔ́ a wɔnɔ́mɔcɔ́ ta anyía e woónjú ɔ ɔ mɛ hɔla, tɛ á bá ooci awɔ́ á nyɛmána wu ɔbá uumi.

³⁸Ɔɔcɔ okime ewú é kíne ɔháya úúyé owé a ambalá, mbá u kíne ɔ mɛ látáka, u tɛ á bá ooci awɔ́ á nyɛmána wu ɔbá uumi.

³⁹Ɔɔcɔ okime ewú u ŋeé léne otétényi úúyé olíhe kéé wuúci nyímísi ; mbá ɔɔcɔ ewú u kéé nyímísi úúyé olíhe aámɛ a asana kéé wuúci bɔ́ŋɔ́tɔ́na.

⁴⁰Ɔɔcɔ okime awɔ́ á banɔ́ káha bɔmbányɛ má mɛ káha bɔmbányɛ ; ɔɔcɔ okime awɔ́ á mɛ káha bɔmbányɛ má káha bɔmbányɛ Ooci awɔ́ u ŋaá mɛ tɔ́má.

⁴¹Ɔɔcɔ okime awɔ́ á káha bɔmbányɛ *muhémúnyi bɛsana mɔ Bandɔ́mɛsɛ́ anyía muáŋa muhémúnyi bɛsana, ɔɔcɔ oócí káá bá na bɛnamá a bɛ́ á nyɛmána muhémúnyi bɛsana ; aáná ɔɔcɔ okime awɔ́ á káha bɔmbányɛ atálɛ́mánánɔ́ yɛ́ ɔɔcɔ anyía yááŋa atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́, káá bá na bɛnamá a bɛ́ á nyɛmána atálɛ́mánánɔ́ yɛ́ ɔɔcɔ.

⁴²Ɛ ŋaá mɛ banɔ́ laana aá taaká isíʼo : Ɔɔcɔ okime ewú u kéé múúsi ta hú atáya yí menyífé e mesiotóto ná hɛ́mɔtɛ́ hɛ́ ɔɔ́nɔmbɔ́ a *baákɔ́nɛ́na eebe anyía wáŋa muamɛ *muákɔ́nɛ́na, tɛ káá yááŋa bíáyɛ́ bɛnamá. »