Read Nomaande Mat 11 Bible Online

Mat 11 - Nomaande bible

Mat 11

¹Ɛŋakɛlá Yésus á máná ɔlaana bááyɛ́ *baákɔ́nɛ́na bɔ́ɔ́hátá ne béfendí bɛsana abɛ́ bábɔ́ nyɛmána bá ɔkɛlaka, u ŋá hátɔna aáhá, u ŋé súéte ne o o húle eékúnyi ne o ohulinyi baacɔ bá bálɛ́ka cí iisí eécí Ambányɛ yɛ́ Ɛsɔ́ma.

²Ekúlú eéyé, Sáaŋ Batis ŋaá bá eé ciíbe cɛ ɛcaná. Aáhá u ŋaá lɔ́kɔ́máka bɛsana ebí *Kilís ŋaá bá wá kɛ́laka. U ŋá tɔ́ma bááyɛ́ baákɔ́nɛ́na a bɔ́mɔtɛ́

³ɔ ɔkɔbáta Yésus báyɛ : « Mbá ɔ ɔ́ŋa Ooci awɔ́ á nyɛ́mana wu ɔfaaya ayɛ́ʼ tu ŋá sɔ́ nyɛ́mána tú ɔtátáka u etémbí e ? »[43]

⁴Mbá ɔsɛ : « Ánɔ ka láakɛna Sáaŋ bɛsana abɛ́ nú ma nɔ́ lɔ́kɔ́máka núɔ́ lɛcaka tɔ́na :

⁵Bendíméndíme ŋa bɔ́ lɛ́cana, baacɔ e bé ŋe bú síndólo kandaka bɔmbányɛ, beénuúnu aáŋɔ́núaka, bɔndɔ́kɔ́ndɔ́kɔ lɔ́kɔ́mákána, biwéewé háányuaka, basɔ́kásɔ́ka lɔ́kɔ́máka Ambányɛ yɛ́ Ɛsɔ́ma.

⁶Bɔmbányɛ né ooci ewú u ti kéé kúféténe aámɛ a asana. »

⁷Ɛ́makɛ́la baákɔ́nɛ́na bá Sáaŋ Batis ébú súété, mbá Yésus a asana yɛ́ Sáaŋ ɔsɛ ná baacɔ bá nyɛkɔca : « Aátɛ́ nu ŋa nɔ́ bá nuanɔ́ áambaka ɔkɔlɛ́ca, ekúlú ayɛ́ nu ŋa nɔ́ cɔ́ba i iisí cɛ ɔsɛ́bɛ́á e ? Nɔtɔŋɔtɔ́ŋɔ́ enú ehúne ŋeé fúke ayɛ́ʼ ?

⁸Aátɛ́ nú ŋa nɔ́ bá nuanɔ́ áambaka ɔkɔlɛ́ca aná e ? Ɔɔcɔ awɔ́ ú maa láŋabaka bɔmbányɛ e ? Eéʼeé, anyía baacɔ a bá ŋa bɔ́ láŋaba bɔmbányɛ ŋe bú líhe bɔmbányɛ eé meébe me betéŋí.

⁹Mbá aátɛ́ aná nu ŋa nɔ́ bá nuanɔ́ áambaka ɔkɔlɛ́ca e ? Muhémúnyi bɛsana mɔ Bandɔ́mɛsɛ́ e ? Ɛ́ɛ, ɛ ŋa mɛ́ banɔ́ láana anyía u ŋa hɔ́la *muhémúnyi bɛsana.

¹⁰Yááŋa anyía Sáaŋ áŋa ooci awɔ́ Bandɔ́mɛsɛ́ ŋaá kɔ́ɔ́na a Ciɔɔ́ŋɛ́ ɔsɛ : “Ɛ́ná ! Ɛ́ maá mɛ tɔ́ma uumi ɔɔcɔ u bɔsɔ́ma oówo eé buúse ɔ ɔ kuɔŋɔ́ tábɔ́nɛ́na ohónyí.”

¹¹Aá taaká ɛ ŋa mɛ́ banɔ́ láana ɛsɛ́ : A bɔnyɛ baacɔ bukime bɔ́ ɔmɛsɛ́, ta ɔɔcɔ tɛ ŋáá bá waáŋá buúse bukime ɔ ɔháma háyɛ Sáaŋ Batis. Ta híáná, hɛcɔɔ́cɔ́ e *Butéŋí bɔ́ Ɔmuaná áŋa waáŋá ne wuúci.

¹²O otúme ekúlú ayɛ́ Sáaŋ Batis ŋaá bá weé húlikinyi baacɔ Ambányɛ yɛ́ Ɛsɔ́ma ɔ ɔkɔɔ́háma aámbáya, baacɔ ŋa bɔ́ hɔ́nɔnɔ Butéŋí bɔ́ Ɔmuaná. Bakɛ́ndákɛ́nda meé buúbu ŋaŋɛmɛna.

¹³Ne *behémúnyi bɛsana bekime bá Bandɔ́mɛsɛ́ ne tufule tú *bikotí áyá ŋa bɔ́ kɔ́ɔ́náka asana yí Butéŋí eébú, ɔ ɔkɔɔ́háma e ekúlú ayɛ́ Sáaŋ ŋaá fááya.

¹⁴Mbɔ́kɔ nu ŋe nú léne olumitine anyía nyiámɛ nyɛkɔɔna áŋa taaká, énu menyi anyía Sáaŋ áŋa Éli, oócí awɔ́ bá ŋaá bá bá tátáka nyɛfaaya.

¹⁵Ɔɔcɔ a wáŋa ne eetú cá ɔlɔ́kɔ́máka bɛsana, á lɔ́kɔ́máka !

¹⁶Ná aányɛ́ ya mɛ́ŋa wu oketi baacɔ bá hɛɛya eehi e ? Bá ŋa bɔ́ hɔ́á banásɛ́ a bɔ́mɔtɛ́ a bá bɔ́ŋa limekine a nɔháatɛ́ ; beébe eébé bá ŋa bɔ́ láákɛ́na bɔsɔ́ɔ́kɔ́ báyɛ :

¹⁷“Tu ŋá sɔ́ banɔ́ súbékíníné bikembí, mbá banɔ́ te obíne. Túɔ́ banɔ́ hákɛ́nɛ́na maŋana me buwé, banɔ́ ta ɔlɛla.”

¹⁸Yááŋa anyíaʼo, Sáaŋ Batis ŋaá faáya ; u kineke na ɔnyíá na ɔmúána, nɔsɛ : “Wáŋa na *aabɛ́ yí elilé !”

¹⁹Ɔɔ́nɔ́ u ɔɔcɔ ŋaá fááya ; u nyíáka bɛnyɛ́ma, u muákɛ́na meluku, nɔsɛ : “Huúúʼ, munyíá bɛnyɛ́ma eemu muáŋa, wuúci tɔ́na mumúána meluku. Wáŋa ekendinyi yí ne *betúé etéési na bakɛla maabɛ́ bé etémbí !” Mbá baacɔ a bá ŋa bɔ́ látɛ́na taaká cí ihényí cɛ́ Bandɔ́mɛsɛ́ ŋe bú tóŋínyi anyía cɛ́áŋa ɛtálɛ́mánánɔ́. »

²⁰Yésus ŋeé túme ɔkákálɛ́na baacɔ bá bálɛ́ka acɛ́ u ŋa ka kɛ́láka *bikéki bɛ́ bɛsana biéŋí hɔ́á, anyía beébe ta ɔbɛ́kákálɛ́na máábɔ́ maabɛ́. U ŋaá kɔ́ɔ́na ɔsɛ :

²¹« Nua nɔ́ŋa mahana, banɔ́ baacɔ bá Kolasine ! Nua nɔ́ŋa mahana, banɔ́ baacɔ bá Bɛtɛsɛ́ta ! [44] Yááŋa anyía, mbɔ́kɔ bikéki bɛ́ bɛsana abɛ́ Bandɔ́mɛsɛ́ ŋaa kɛ́láka náánɔ́ á bɛ́kɛ́láka ne e Tíil ne e Síton,[45] keyé baacɔ bá bálɛ́ka eécí na maá bɔ́ láŋabaka ikute, bó límekine a mɔɔtɔ́ anyía bébú tóŋínyi anyía bá ŋa bɔ́ áamba ɔbɛ́kákálákɛ́na maabɔ́ maabɛ́, mbá bá sɔ́mba ɔkɔlɔ́ eé meéme.

²²Yaátɛ́ asana, ɛ ŋa mɛ́ banɔ́ láana anyía, a buɔ́sɛ́ abɔ́ Bandɔ́mɛsɛ́ kéé kélísíki baacɔ, banɔ́ nu ká nɔ́ lɔ́kɔ́máka muuyé buéŋí ɔ ɔhɔla baacɔ bé ne Tíil ne Síton.

²³Mbá banɔ́ baacɔ bá Kabɛlnawum, nu ŋe nú kéti anyía nu ká nɔ́ báátáka, nuɔ́ kɔɔ́háma ɔ Ɔmuaná e ? Eéʼeé, Bandɔ́mɛsɛ́ káá banɔ́ lóosiki, nuɔ́ kɔɔ́háma haála ehé biwéewé áŋa, anyía mbɔ́kɔ bikéki bɛ́ bɛsana abɛ́ Bandɔ́mɛsɛ́ ŋaa kɛ́láka náánɔ́ á bɛ́kɛ́láka a bálɛ́ka cɛ *Sɔ́tɔm, keyé bálɛ́ka eécí a yánáŋa ɔ ɔkɔɔ́háma aámbáya.

²⁴Yaátɛ́ asana, ɛ ŋaá mɛ banɔ́ láana ɛsɛ́ ɔ buɔ́sɛ́ abɔ́ Bandɔ́mɛsɛ́ kéé kélísíki baacɔ, nu ká nɔ́ lɔ́kɔ́máka muuyé buéŋí ɔ ɔhɔla baacɔ bá bálɛ́ka cɛ Sɔ́tɔm. »

²⁵Hí e ekúlú etéeyé, Yésus ɔsɛ : « Ééʼ, Taatá, kuɔŋɔ́ ó ŋoó téŋínyi na Ɔmuaná na ɔmɛsɛ́. I ŋe mí o wiínjie bitéŋíti anyía ɔ́ ŋɔ́ɔ nambɛ́na ne bemenyi bɛsana ne benjiŋénjíŋe bɛsana eébí, wó biíbi tóŋgínyi né iŋéné.

²⁶Ɛ́ɛ, Taatá, aáná bú ŋo yóo bílénékíné.

²⁷Ciamɛ Síkíne ŋeé mi íínjíékíné bɛnyɛ́ma bikime. Ta ɔɔcɔ ti ŋée ményi Ɔɔ́nɔ́, ɛ́ tɛ ŋáa bá Síkíne ; ta ɔɔcɔ tɔ́na ti ŋée ményi Síkíne, ɛ́ tɛ ŋáa bá na Ɔɔ́nɔ́ na baacɔ ebé u ŋeé léne o beébe tóŋínyi ciayɛ́ Síkíne.

²⁸Ánɔ faákɔ́na náámɛ, banɔ́ bekime abá nua nɔ́ŋa bɔtɔmbɔ́kɔ́nɔ́, banɔ́ tɔ́na na malamɔ́, ɛ ká mɛ́ banɔ́ iínjíékíne ehélúme.

²⁹Énu lumítíne ɔbámɔ́kɔ́nɛ́na báámɛ *baákɔ́nɛ́na ; ánɔ mɛ nyɛána yámɛ banɔ́ eékúnyíki bɛsana, anyía úúmi ɔtɛ́má áŋa mbuumu, wuúci tɔ́na obílóósínyi ɔ ɔmɛsɛ́ ; aáná túánɔ́ tɔtányɛ́ káá bá ne ehélúme.

³⁰Yááŋa anyía nyiámɛ nyiékúnyi tɛ ŋáá náta ɔ ɔlátɛ́na, bɔlamɔ́ abɔ́ ɛ ŋa mɛ́ banɔ́ íínjie tɛ lama. »