Read Nomaande Mat 15 Bible Online

Mat 15 - Nomaande bible

Mat 15

¹Na *Bafalisiɛ́ŋ ne *beékúnyi bikotí e bé ŋe bú húlúkúne eé Yelúsalɛm ŋa ka bɔ́ kuána Yésus. Bé ŋé wuúci batá báyɛ :

²« Anyíatɛ́ bɔ́ɔ́wɔ *baákɔ́nɛ́na tɛ ŋá bɔ́ látɛ́na bɛsana bí bokóo e ? Bá ŋa bɔ́ nyíá bɛnyɛ́ma bɛ́ ɔnyíá tɛ́ka na ɔbɛ́sua aabá. »

³U ŋe beébe bɛ́kámá ɔsɛ : « Banɔ́ʼo ? Anyíatɛ́ nu tɛ ŋá nɔ́ látɛ́na *bikotí bɛ́ Bandɔ́mɛsɛ́, nu látákɛ́na yáaŋa bíánɔ́ bɛsana bí bokóo e ?

⁴Yááŋa anyía Bandɔ́mɛsɛ́ ɔsɛ : “Kékéke na ɔɔtɛ́ na ɔɔnyia.”[51] Yó túné kɔ́ɔna ɔsɛ : “Bá ŋá nyɛmána bá ɔwɔɔ́nɔ ɔɔcɔ okime awɔ́ u ŋɔ lɔ́mɔ síkíne ta anyía iinyí.”

⁵Mbá banɔ́, nu ŋe nú éékúnyi baacɔ nɔsɛ ɔɔcɔ á laána síkíne ta anyía iinyí anyía : “Bɔkɔ abɔ́ yámɛ bá wu ɔ kuɔŋɔ́ ɔɔ́lɛ́ta ne buúbu á yáaŋa kíléke, búáŋa bɔ́ Bandɔ́mɛsɛ́”,

⁶u tɛ ɔ́mɔ nyɛmána wu ɔ háná ɔɔ́lɛ́ta ebíényi o o yiíyi kéké. Aáná nu ŋe nú cónyisi Bɛsana bɛ́ Bandɔ́mɛsɛ́ a bíánɔ́ bɛsana bí bokóo.

⁷Nua nɔ́ŋa tɔbɛ́mbɛ túfendí ! Ɔtáŋa ú *Ɛsayí ŋaá bá o ohónyí ekúlú ayɛ́ u ŋaá bá weé hémúkúnyi bɛsana bɛ́ Bandɔ́mɛsɛ́ a yáánɔ́ asana, anyía Bandɔ́mɛsɛ́ ɔsɛ :

⁸“Baacɔ eebe ŋe bú mí nyemi hú ne nyuúté ; cííbú ɛtɛ́má áŋa haaca na yaŋɔ́.

⁹Nyíábɔ́ nyinyemi áŋa etémbí anyía bé ŋe bú éékúnyi esúŋe cá baacɔ háyɛ anyía cááŋa cáámɛ.” »

¹⁰E elime eécí, Yésus ŋɔɔ́ lɔ́ŋɔ́kɔ́ baacɔ beéŋí, yó beébe laakɛna ɔsɛ : « Ánɔ tákɛ́na eetú, núá lɔ́kɔ́ma bɔmbányɛ bɔmbányɛ ɔtáŋa ooci :

¹¹Tɛ́ cáŋa bɔkɔ abɔ́ ɔɔcɔ ŋá nyíá bú ŋa cáŋɛna úúyé olíhe ; eéʼeé. Mbá buhúnyi a bɔ́ ŋaá háma eeyé e nyuúté, bú húlúkúne e uúye ɔtɛ́má noómi, buúbu eébú bú ŋa cáŋɛna úúyé olíhe. »

¹²Baákɔ́nɛ́na ŋe bú bíkósíti, mbá báyɛ nááyá : « O ŋoó menyi anyía *Bafalisiɛ́ŋ ŋa bɔ́ lɔ́kɔ́ma bɔɔbɛ́ ɔ ɔtáŋa awɔ́ ɔ́ mɔɔ́ táŋáka e ? »

¹³Mbá ɔsɛ : « Bá káá lɔ́ba yɔɔ́nɔ́kɔ ekime ayɛ́ ciamɛ Síkíne cɛ Ɔmuaná tɛ ɔ́mɔ wɔɔ́nɔ.

¹⁴Énu beébe nyɛána. Bá bɔ́ŋa bendíméndíme, bé kéndiki bendíméndíme. Ekúlú eyí ondíméndíme ŋe kéndi sɔ́ɔ́kɔ́ ondíméndíme, bá ká ka bɔ́ kúákɔna a nɔɔfia beébe bekime béfendí. »

¹⁵Aáná Bíel ŋaá láána Yésus ɔsɛ : « Cɔ́kɔ́lɛ, basɔ́ hémbúlékíne ɛnjaba eécí. »

¹⁶Mbá Yésus ɔsɛ : « Ta banɔ́ tɔ́na, nua núánáŋa bɛála e ?

¹⁷Énu menyí anyía bɔkɔ abɔ́ ɔɔcɔ a nyíáka ŋo yóofine aáyá a tɔɔna ; búɔ́ háma ekúlú eyí wé súéte a afalɔ́.

¹⁸Mbá ɔtáŋa ú nyuúté ú ɔɔcɔ ŋeé húle e úúyé ɔtɛ́má noómi ; wuúci, ú ŋeé wuúci cáŋɛna.

¹⁹Yááŋa anyía, ɔ ɔtɛ́má ú ɔɔcɔ noómi bɛɛbɛ́ bí ibíkéti ŋé húle. Biíbi bí ŋeé wuúci tɔ́ma na a muɔ́nɔ́nɔ, na ɔ ɔkanda tusɔmɔ, na ɔ ɔkɛla bɛsana bɛ́ ɛnjɔkɔ́nɔ́nɔ, ne e buébi, na ɔ ɔháyɛ́na baacɔ ɛmbasɔ́ cɛ́ bɛfala ne e muótóno.

²⁰Ánɔ lɛcá, biíbi eébí bɛ́ ŋá cáŋɛna olíhe ú ɔɔcɔ. Mbá ɔnyíá bɛnyɛ́ma tɛ́ka na ɔbɛ́sua aabá tɛ ŋa cáŋɛna olíhe ú ɔɔcɔʼo. »

²¹E elime eécí, Yésus ŋa hátɔ́na aáhá, yó súéte e ekéti yí iisí ayɛ́ bálɛ́ka cí ne Tíil ne Síton ŋaá bá.

²²Oónjú a wɔmɔtɛ́, itónyi cɛ Kanaáŋ[52], ŋaá bá weé límekine hɔ́á ; u ŋaá faáya né Yésus, yó túme o wuúci baŋɛna ɔsɛ : « Otéŋí a Waáŋá, ɔɔ́nɔ́ u Táfit ! Ɔ́ɔ mɛ bɛ́cáma mahana. Uumi ɔɔ́nɔ́ e woónjú ŋaá lɔ́kɔ́ma ɔkála buéŋí ; wáŋa na aabɛ́ yí elilé. »

²³Mbá Yésus ŋeé wuúci ɔ́ɔ́nɔ́ indímé. Aáná bááyɛ́ *baákɔ́nɛ́na ŋe bú bíkósíti nááyá, báyɛ : « Ɔɔ́ŋɔ́kɛ́na oónjú ooci, anyía u ŋaá basɔ́ látɛ́na ne hikókó buéŋí ɔ ɔhɔla. »

²⁴Mbá ɔsɛ : « Ciamɛ Síkíne ŋaá mɛ tɔ́ma hú a asana na baacɔ bé *Islayɛ́l. Bá bɔ́ŋa háyɛ ɛtɔ́mbá e cí ne me nyímúkúne. »

²⁵Ta híáná, oónjú oócí ŋeé bíkósíti, yó túmíne Yésus eŋéndu, mbá ɔsɛ : « Otéŋí a Waáŋá, cɔ́kɔ́lɛ, mɛ ɔɔ́lɛ́ta. »

²⁶Yésus ŋé wuúci bɛ́káma ɔsɛ : « Bú tɛ a bá bɔmbányɛ anyía bé hiíte bɛnyɛ́ma bɛ́ ɔnyíá bɛ́ banásɛ́, bé biíbi iínjíékíne ná tɔbɔ́ɔ́bɔ́. »

²⁷Oónjú ɔsɛ : « Ɛ́ɛ, Otéŋí a Waáŋá. Yááŋa aáná taaká, mbá ɛ ɛmbana ci tébíli tɔbɔ́ɔ́bɔ́ ŋaá nyíá imbuumbú acɛ́ báábɔ́ baacɔ ŋe bú kúusi. »

²⁸Mbá Yésus ɔsɛ nááyá : « Kuɔŋɔ́, oónjú ooci, úúwu olumitinine áŋa waáŋá ɔ ɔhɔla ! Bú á bɛ́kɛ́láka háyɛ bú ŋo yóo bíléníne. » Hú a yaátɛ́ ekúlú uuyé ɔɔ́nɔ́ ŋa yaáŋɔ́núá.

²⁹Yésus ŋá hátɔ́na aá haála eéhé, u ŋá láta cɛ asálá cɛ asálá yɛ́ nuɔmɔ́ nɔ́ *Kalilé ; u ŋá bááta a nɔkɔndɔ ɔ ɔmuaná, u ŋe limíne ɔ ɔmɛsɛ́.

³⁰Aáná bitúte bɛ́ baacɔ ŋa fáákɔ́na nááyá. Bí ŋe hélékénéne baacɔ e bé ŋe bú síndólo, ne bendíméndíme, na baacɔ bá bɛfɛ́kɛ́, ne múkúmúku, na bɔkɔnɔ́kɔ́nɔ bé etémbí beéŋí. Bí ŋe beébe télímíkínyí eeyé eé buúse, u ŋé beébe eéŋúnyísíki.

³¹Akɔca cá baacɔ eécé ŋé kékéke buéŋí, baacɔ lɛ́caka anyía múkúmúku ŋaá táŋa, baacɔ bá bɛfɛ́kɛ́ ma bɔ́ aáŋɔ́núaka, e bé ŋe bú síndólo ŋa bɔ́ kánda bɔmbányɛ, bendíméndíme lɛ́cákána. Bé ŋé túme owiínjie Bandɔ́mɛsɛ́ ci *Islayɛ́l nuúmi.

³²Yésus ŋɔɔ́ lɔ́ŋɔ́kɔ́ bááyɛ́ *baákɔ́nɛ́na, mbá ɔsɛ náábɔ́ : « Mahana ŋa mɛ́ kɛla a baacɔ eebe, anyía mɔɔ́sɛ́ á yáaŋa matátɔ́ amá tua sɔ́ŋa ɔlɔŋɔ ne beébe. Bá tɛ abɔ́ bá tɔ́na na bɔkɔ bɔ́ ɔnyíá. Ɛ tɛ ŋá mɛ́ aamba o beébe óólísíki ɛcaná, keyé bá bɔ́ŋa bá ɔkuákɔ́na o ohónyí, tɛ́ka na makɛ́nda. »

³³Baákɔ́nɛ́na ŋe bú wuúci bata báyɛ : « Háányɛ́ tua sɔ́ŋa tu ɔbɔ́ŋgɔ́na biléti bí otúkékíne baacɔ eebe bekime, bó weécéke aaha a atúalɔ́ etémbí e ? »

³⁴Yésus ɔsɛ : « Biléti bínyie nua nɔ́ŋa ne biíbi e ? » Báyɛ : « Bítíndétú nɔ́mɔ ; tua sɔ́ŋa tɔ́na hú na tuɔfɔ́ɔ́fɔ́. »

³⁵Aáná Yésus ŋeé límísíkínyi baacɔ ɔ ɔmɛsɛ́.

³⁶E elime eécí, u ŋé hiíte ne biléti bítíndétú nɔ́mɔ eébí na tuɔfɔ́ eétú. U ŋé íínjíé Bandɔ́mɛsɛ́ bitéŋíti, yó biíbi bákáka. U ŋé iínjíékíne baákɔ́nɛ́na ; bé ŋé beébe aafákɛ́na.

³⁷Baacɔ eébé bekime ŋa nyíáka, bé ŋé éécéke. Bá ŋa bɔ́ bándáka bikélékéti a bɛ́ ŋɔ lɔ́bɔ́kɔ ; bó nyióyísíki tɔnjatɛ́ tútíndétú nɔ́mɔ hú mbiɔ́kɛ.

³⁸Ɔmbana ɔ́ baacɔ awɔ́ ú ŋaá nyíáká ŋaá bá tɔ́sɛ́na ínyíse, tɛ́ka ɔ ɔfana ne beénjú na banásɛ́.

³⁹Ɛ́makɛ́la Yésus é yóólísíki baacɔ bekime, u ŋé oofíne ɔ ɔkɔkɔ́ noómi, u ŋé súéte e ekéti yí iisí yɛ́ Makatan.