Read Nomaande Mat 2 Bible Online

Mat 2 - Nomaande bible

Mat 2

¹Aáná Yésus ŋeé bíbíéné a Bɛ́tɛlɛhɛm[7], i iisí ci Yuté, e ekúlú eyí Elóot ŋaá bá otéŋí. E elime eécí, bemenyi bɛsana[8] ŋa ka bɔ́ hátɔ́na náábɔ́ a aháŋá yɛ́ nyɛháma nyɛ́ ɔɔ́cɔ́, bá ŋga hámɔ́kɔ́ná eé Yelúsalɛm.

²Bé ŋe bú túmé o húle báta baacɔ anyía bé beébe tóŋínyi haála ehé bé meé bíéne otéŋí u *Besuif. Yááŋa anyía bá ŋa bɔ́ lɛ́cáka hííyé hinjoti á nɔ́maka náábɔ́ a aháŋá yɛ́ nyɛháma nyɛ́ ɔɔ́cɔ́, buátɛ́ bɔkɔ bá ŋga bɔ́ hátɔ́kɔ́na o okoó wuúci lɛca, anyía bébú wuúci nyemíki.

³Ɛ́makɛ́la Otéŋí *Elóot á lɔ́kɔ́má asana eéyé, bú ŋé wuúci yébíki, na baacɔ bekime bé *Yelúsalɛm áyá.

⁴Aáná u ŋɔɔ́ lɔ́ŋɔ́kɔ́ ne betéŋínyi *beluli nyiínjie bekime ne *beékúnyi bikotí bá búáyɛ́ bunɔŋɔ. Bá ŋa bɔ́ fáákɔ́na, mbá ɔsɛ náábɔ́ : « Háányɛ́ bá á nyɛ́mana bé obíéne Mesíi e ? »

⁵Báyɛ nááyá : « Bá ŋa nyɛmána bé obíéne *Mesíi a Bɛ́tɛlɛhɛm, i iisí ci *Yuté, anyía *muhémúnyi bɛsana mɔ Bandɔ́mɛsɛ́ a mumɔtɛ́ ŋɔ yɔɔ́ŋɔ́kɔ́ ɔsɛ :

⁶“Ɛ́ná, kuɔŋɔ́ Bɛ́tɛlɛhɛm, acɛ́bɛ́ yí Yuté, ɔ tɛ ɔ́ bá hɛbálɛ́kabálɛ́ka a bálɛ́ka cí Yuté ikime. Ɛ ŋɔ mɛ́ ɔ laana ɛsɛ́ otéŋí kéé bíbíéne nɔ́ɔ́wɔ. U káá bá mukendisi buamɛ bú Islayɛ́l[9].” »

⁷Ɛ́makɛ́la Elóot á lɔ́kɔ́máká ɔtáŋa oócí, u ŋɔ́ lɔ́ŋɛ́ta bemenyi bɛsana a hɛtɔkɛ, yó beébe bícónyi ɔsɛ : « E ekúlú ayɛ́ háányɛ́ hinjoti é bítóŋínyi náánɔ́ e ? »

⁸Ɛ́makɛ́la wáá lɔ́kɔ́má nyíábɔ́ nyɛbɛ́káma, u ŋé beébe tɔ́ma a Bɛ́tɛlɛhɛm, ɛ́cɛ ú ma cáŋa o beébe laana ɔsɛ : « Ánɔ cɔbá, nué bícónyíki bɔmbányɛ bɔmbányɛ asana yɛ́ ɔɔ́nɔmbɔ́ oócí. Ekúlú eyí nú ké nú wuúci bɔ́ŋɔ, énu ké mi óókísi mbá yaŋɔ́ tɔ́na, yémi súéte o okoó wuúci lɛca, anyía yémi wuúci nyemíki. »

⁹Ɛ́makɛ́la Elóot á táŋáká aáná, bemenyi bɛsana ŋá hatɔ́na, bé ŋé súéte. Bá ŋá lɛcɔ́tɔ́na hinjoti ahɛ́ bá ŋa bɔ́ lɛ́cáka náábɔ́ a aháŋá yɛ́ nyɛháma nyɛ́ ɔɔ́cɔ́. Bá ŋa bɔ́ bá háyɛ nyitíne nyí bilúŋe o o hiíhi lɛca. Hí ŋe túme o beébe kɔ́kɔ ohónyí, ɔ ɔkɔɔ́háma ayɛ́ hɛ́ ŋaá tálɛ́mɛ́ná ɔ ɔmuaná, haála ahɛ́ ɔɔ́nɔmbɔ́ ŋaá bá.

¹¹Bemenyi bɛsana nyiofokine eényí eé ciíbe, bá ŋá lɛca na ɔɔ́nɔmbɔ́ ne iinyí Malíi. Bé ŋé túméke eŋéndu o onyemi ɔɔ́nɔ́. E elime eécí, bé ŋe bú kúúnéke bíábɔ́ bɛmbalá, bé ŋé iínjíékíne bɛnyɛ́ma eebi : Ne kóolo, na bɔɔlɔ, ne míile.

¹²E elime eécí, Bandɔ́mɛsɛ́ ŋeé beébe óókísí a alamá anyía bá tɛ hálɔ́mɔ́na né Elóot. Ɛ́ɛhɛ́ bé ŋe bú hííte ohónyí ú etémbí ɔ ɔhálɔ́mɔ́na aabɔ́ a bunɔŋɔ.

¹³Ɛ́makɛ́la bemenyi bɛsana ábɔ́ hɔ́la, *elilé yɛ́ bɔsɔ́ma yí Otéŋí a Waáŋá ŋé bítóŋínyi ná Yɔ́sɛb a alamá. Yí ŋé wuúci laána yɛ́sɛ : « Hatɔ́na, é tényí súéténe na ɔɔ́nɔ́ ne iinyí e *Esíbit. Ké ké limékíne hɔ́á ɔ ɔkɔɔ́háma ayɛ́ ɛ ká mɛ ɔ laana anyía á ka hálɔ́mɔ́na. Yááŋa anyía *Elóot yɔ́ cɔba ɔ ɔwaambaka ohónyí wú ɔwɔɔ́nɔ ɔɔ́nɔmbɔ́ oócí. »

¹⁴Yɔ́sɛb nyɛhatɔna ɔhatɔna eényí, u ŋé súéténe na ɔɔ́nɔ́ ne iinyí nebutúé e Esíbit.

¹⁵U ŋé límékíne hɔ́á ɔ ɔkɔɔ́háma ekúlú eyí Elóot ŋeé wé, ananyía bɛsana ebí *muhémúnyi bɛsana a mɔmɔtɛ́ ŋaá cáŋa ɔ kɔɔnaka eé nyiínyi nyí Otéŋí a Waáŋá é bínyioyisikinyi ; u ŋaá kɔ́ɔ́na ɔsɛ : « Ɛ ŋaá mɛ lɔ́ŋɛ́ta uumi ɔɔ́nɔ́ anyía wá hámá a bunɔŋɔ bú Esíbit. »

¹⁶Ɛ́makɛ́la *Elóot áa lɛ́cá anyía bemenyi bɛsana me bú wuúci néŋéke, u ŋá fámɔ́núá ne hilóbi. Yaátɛ́ asana u ŋaá tɔ́ma bicénji ɔ ɔkɔwɔɔ́nɔ́kɔ banásɛ́ a banɔ́mɔcɔ́ bekime, nyióndi ɔ bɔsɔ́ɔ́kɔ́ a bá ŋa bɔ́ hɔ́la tuɔŋɔ túfendí, na a Bɛ́tɛlɛhɛm na ɔ mɔnɔŋɔ ma maabána ; ɔ ɔmɛɛndɛ́ ú tuɔŋɔ etú bemenyi bɛsana ŋe bú wuúci íínjíé.

¹⁷Aáná ɔtáŋa ú *muhémúnyi bɛsana mɔ Bandɔ́mɛsɛ́, Sélémi, ŋeé bínyioyisinyi awɔ́ u ŋaá kɔɔ́na ɔsɛ :

¹⁸« Bá ŋaá lɔ́kɔ́ma nyiónyi húlúkúne a bunɔŋɔ bɔ́ Alama[10] ; na malɛlá na ɛmbɛ́cɔbɛ́ cɛ́ mahana ciéŋí. Alásɛl ŋa lɛ́la bááyɛ́ baáná ; u ti ŋé léne anyía baacɔ ébú wuúci humíkínyi ɔtɛ́má, anyía baáná tɛ abɔ́ bá tɔ́na. »

¹⁹Ɛ́makɛ́la *Elóot é wé, *elilé yɛ́ bɔsɔ́ma yí Otéŋí a Waáŋá ŋá ka laána Yɔ́sɛb a alamá e *Esíbit

²⁰yɛ́sɛ : « Hatɔ́nána na ɔɔ́nɔ́ ne iinyí, beébe hálámánána i iisí ci *Islayɛ́l.[11] Yááŋa anyía baacɔ a bá ŋaá bá bábɔ́ áambaka ɔwɔɔ́nɔ ɔɔ́nɔmbɔ́ me bú wéékúne. »

²¹Aáná Yɔ́sɛb ŋá hatɔ́na, u ŋé súéténe na ɔɔ́nɔ́ ne iinyí, u ŋé eélue a bunɔŋɔ bú Islayɛ́l.

²²Mbá, ekúlú ayɛ́ u ŋaá lɔ́kɔ́ma anyía Alɛkɛlawɔs[12] ú ŋaá bá otéŋí u iisí ci Yuté, e nyilimíné nyɛ́ ciayɛ́ síkíne Elóot, bulíkílíki ŋé wuúci timbie ɔ ɔcɔba hɔ́á. Bandɔ́mɛsɛ́ ŋá táŋáka nááyá a alamá. Aáná Yɔ́sɛb ŋaá cɔ́ba i iisí cɛ Kalilé ;

²³yó ko límekine a bálɛ́ka cɛ *Násalɛt. Aáná ɔtáŋa ú *behémúnyi bɛsana bá Bandɔ́mɛsɛ́ ŋeé bínyioyisinyi ; bá ŋa bɔ́ cáŋa ɔkɔɔna a asana yí *Mesíi báyɛ : « Bé kéé wuúci lɔ́ŋɛ́ta báyɛ ɔɔ́nɔ́ u Násalɛt. »